སླར་ཡང་ཡུལ་གྱི་སྲེད་པས་གདུངས་པར་གྱུར་ནས་ནགས་དང་ཉེ་བའི་ནགས་རྣམས་སུ་རྣམ་པར་རྒྱུ་བ་རྣམས་རབ་ཀྱི་མཆོག་ཏུ་རངས་པར་གྱུར་པའི་ཡིད་ཅན། ཕྱིར་ཡང་བྱའི་སྒྲས་མངོན་པར་དགའ་བར་གྱུར་པའི་ནགས་དེ་ཉིད་དུ་རབ་ཏུ་ཞུགས་པར་འདོད་པར་གྱུར་ཅིང་ཐམས་ཅད་ཀྱང་ལྟ་བ་ལ་མཆོག་ཏུ་བྱེད་པས་ནགས་དེ་རབ་ཏུ་ལྟའོ། །དེ་ནས་ཞུགས་པར་གྱུར་པ་ན་ནགས་དེའི་རང་བཞིན་ཉིད་ཀྱིས་བྱའི་ཀུན་ནས་བརྗོད་པ་རྣམས་ཀྱིས་མངོན་པར་དགའ་བ། ལྗོན་ཤིང་ཐམས་ཅད་གསེར་གྱི་རང་བཞིན་དང་བཻ་ཌཱུརྱའི་རང་བཞིན་དང་དངུལ་གྱི་རང་བཞིན་དང་ཤེལ་གྱི་རང་བཞིན་དང་། ཨིན་དྲ་ནཱི་ལའི་རང་བཞིན་དང་པད་མའི་སྡོང་པོའི་རང་བཞིན་གྱི་ཤིང་རྣམས་ཀྱིས་མར་མེ་དང་འདྲ་བར་ཐམས་ཅད་རྣམ་པ་སྣ་ཚོགས་པར་མཛེས་པར་གྱུར་པ་དང་ལྡན་པའི་ཁ་དོག་དང་དབྱིབས་དུ་མ་ཅན་གྱི་བྱའི་སྒྲོ་རྣམ་པར་བཀྲ་བར་བྱས་པ་རྣམས་ལ་གང་དག་གི་མདོག་དང་དབྱིབས་བརྗོད་པར་སླ་བ་ཡང་མ་ཡིན་པ་རྣམས་སོ། །དེ་ཅིའི་ཕྱིར་ཞེ་ན། ལས་དུ་མ་སྣ་ཚོགས་པ་རྣམས་ཀྱིས་རྣམ་པར་བཀྲ་བར་བྱས་པའི་རྣམ་པར་བཀྲ་བ་ཡང་རྣམ་པ་སྣ་ཚོགས་པའི་ལས་ཀྱིས་བྱས་པ་ཡིན་ལ། ལས་དེའི་འབྲས་བུ་རྣམས་རྣམ་པ་དུ་མར་རྣམ་པར་བཀྲ་བ་ཡིན་ནོ། །དེ་དག་རྣམས་ནི་བརྗོད་པར་སླ་བ་མ་ཡིན་ནོ། །སེམས་ཡང་མོར་ཡོངས་སུ་འཇུག་པའི་རྒྱུར་འགྱུར་བའི་རྒྱུ་འདིས་དེ་འདིར་རྣམ་པར་བཀྲ་བ་ཉིད་བརྗོད་པར་བྱ་བར་ཡང་མི་ནུས་སོ། །མཐོ་རིས་ཀྱི་སྲིད་པ་རྣམས་ཐམས་ཅད་དུ་ཅུང་ཟད་ཅིག་རྗེས་སུ་དཔགས་པར་གྱུར་པས་ཀྱང་ལས་དང་འབྲས་བུ་རྣམས་ཀུན་ཏུ་བསྟན་པའི་དོན་དུ་འདི་དག་བརྗོད་པར་ཟད་དོ། །ཇི་ལྟར་མཆོག་ཏུ་བག་མེད་པས་ནགས་དང་ཉེ་བའི་ནགས་དང་འབབ་ཆུ་དང་རྫིང་བུ་དང་རི་དང་རི་བོའི་རྩེ་མོ་དང་། པད་མའི་ཚལ་དང་བྱ་དང་རིན་པོ་ཆེ་སྣ་ཚོགས་དང་བུད་མེད་ཀྱི་ཚོགས་ཡིད་འཕྲོག་པའི་ཡུལ་རྣམས་ལ་ལེགས་པར་བྱས་པའི་ལས་རྣམས་ཀྱིས་བྱས་པའི་འབྲས་བུ་ཉེ་བར་སྤྲུལ་པའི་ལྷའི་འཇིག་རྟེན་དེ་ཡིན་པའི་རྒྱུ་འདིས་ན་དགའ་བར་བརྗོད་དོ། །ཇི་ལྟར་ལེགས་པར་བྱས་པའི་ལས་རྣམས་ཀྱི་འབྲས་བུ་རྣམ་པར་སྨིན་པ་རབ་ཏུ་མ་བསྟན་ན། བྱས་པའི་འབྲས་བུ་རྣམ་པར་སྨིན་པ་རྣམས་ཀྱང་ཐོབ་པ་མ་ཡིན་པར་འགྱུར་རོ། །འདི་ནི་འདིར་བདེ་བ་སྟེན་པར་བྱེད་པའི་རྒྱུ་གཞན་གཉིས་པ་ཡིན་ནོ།