།ཁ་ཅིག་ནི་རིན་པོ་ཆེ་གཞན་དག་རྣམས་ཁ་ན་བཟུང་ནས་འོད་ཟེར་གྱི་ཕྲེང་བ་དང་ལྡན་པའི་ཡུལ་ཕྱོགས་གཞན་དང་གཞན་རྣམས་སུ་ཉེ་བར་འདྲེ་བར་བྱེད་དོ། །ཁ་ཅིག་ནི་གཞན་རི་རྣམས་ཀྱི་རྩེ་མོ་རིན་པོ་ཆེ་བདུན་གྱི་འོད་ཀྱིས་སྣང་བར་བྱས་པ་ལ་བསྙེང་ཞིང་སྤྲུགས་ཏེ་སྒྲོའི་ཕྲེང་བ་སྟེང་དུ་རྣམ་པར་བརྐྱང་ནས་གླུ་ལེན་པར་གྱུར་པ་དེས་ཐོས་པས་ཀུན་ཏུ་ཁྲིད་དེ། གང་ན་གླུའི་སྒྲ་དེ་ཡོད་པར་གྱུར་པའི་མེ་ཏོག་གི་ཁང་པ་དེར་འགྲོ་སྟེ། ནམ་མཁའ་ལ་མཛེས་པར་གྱུར་པའི་སྒྲོའི་སྒྲ་རྣམས་ཀྱིས་མཆོག་ཏུ་ཡིད་རབ་ཏུ་དགའ་བར་གྱུར་པར་རོ། །ལྗོན་པའི་ནགས་ཀྱི་ནགས་གཞན་རྣམས་ནས་ཀྱང་སྣ་ཚོགས་པའི་སྒྲོ་རྣམ་པར་བཀྲ་བའི་ལུས་ཅན་གྱི་བྱ་གང་དག་གིས། མེ་ཏོག་རབ་ཏུ་རྒྱས་པའི་འཁྲི་ཤིང་དག་ཁ་ནས་ཁྱེར་ནས་གང་ན་དེ་མེ་ཏོག་གི་ཁང་པའི་ནགས་ཡོད་པ་དེར་བསྙེན་ཏེ་འོང་བར་བྱེད་དོ། །གཞན་ཡང་ཕྱོགས་ཀྱི་ཆ་གཞན་རྣམས་ནས་ཀྱང་གླུ་ལེན་པ་དེ་མངོན་པར་ཐོས་པར་གྱུར་ནས། ངང་པ་དང་ངང་མོ་རྣམས་ཕན་ཚུན་དུ་ཕན་པར་གྱུར་པ་དང་ཕན་ཚུན་དུ་ཁ་ནས་རིན་པོ་ཆེའི་ཕྲེང་བ་རྣམས་ཡོངས་སུ་ཁྱེར་བ། ཁ་དོག་སྣ་ཚོགས་པའི་འོད་ཀྱིས་རྒྱན་དུ་བྱས་པ་རྣམས་གང་ན་མེ་ཏོག་གི་ཁང་པ་ཡོད་པར་ནམ་མཁའི་དཀྱིལ་ན་མཛེས་པར་གྱུར་པས་དེར་འབབས་པར་བྱེད་དོ། །དེ་ལྟར་ན་ནང་དང་ཕྱི་རོལ་རྣམས་ན་རྣམ་པ་དུ་མར་གྱུར་པའི་རི་དགས་དང་བྱ་སྣ་ཚོགས་པའི་གཟུགས་དང་ཆ་བྱད་དང་དབྱིབས་མཆོག་ཏུ་མཛེས་པ་དང་ཡང་དག་པར་ལྡན་པའོ། །ནགས་དེ་ན་ཡང་རྣམ་པ་དེ་སྲིད་ཀྱི་ལྷའི་རིགས་དེ་དག་རྣམས་ཀྱིས་ཀྱང་མཛེས་པར་བྱེད་པར་འགྱུར་རོ། །དེ་ནས་ལྷ་དེ་དག་རྔ་སྐད་ཡན་ལག་ལྔ་དང་ལྡན་པས་ནགས་དེར་ཞེན་པར་བྱས་ནས་སླར་ཡང་དེའི་སྲེད་པས་བསྲེགས་པར་གྱུར་པ་དང་རྣམ་པར་ངོམས་པ་མེད་པར་གྱུར་པས་ཀྱང་གང་ན་དེ་བྱའི་སྒྲ་མངོན་པར་དགའ་བ་ཞེས་བྱ་བའི་ནགས་དེར་ཉེ་བར་འགྲོ་བར་བྱེད་དེ། ལྷན་ཅིག་སྤྱོད་པ་དུ་མས་ཡོངས་སུ་བསྐོར་བར་གྱུར་ནས་དེ་དེ་ཁོ་ན་བཞིན་དུ་གར་བྱེད་པར་གྱུར་ཅིང་ངོ་། །ཁ་ཅིག་ནི་ནམ་མཁའི་ཁམས་གཞན་དུ་གྲོགས་མེད་པར་འགྲོ་བར་བྱེད་དོ། །གཞན་དག་རྣམས་ནི་ངང་པ་རྣམས་ཀྱི་རྒྱབ་ཏུ་ཀུན་ནས་ཞོན་ནས་སོ། །གཞན་དག་རྣམས་ནི་རྨ་བྱ་དག་གི་རྒྱབ་ཏུ་ཞོན་ནས་སོ། །གཞན་དག་རྣམས་ནི་པད་མའི་ནང་ཉིད་ཀྱི་སྙིང་པོ་ལ་ཉེ་བར་གནས་པར་གྱུར་ཅིང་ནམ་མཁའི་དཀྱིལ་དུ་འཕགས་ནས་སོ།