ལེགས་པར་བཤད་པ་རྣམས་ལྷ་དེ་དག་ཁ་ཅིག་གིས་ཐོས་པར་གྱུར་ནས་སྐྱེ་བ་གཞན་དག་དྲན་པ་དང་ལྡན་པར་གྱུར་ཏོ། །དེ་ལས་དེས་ལས་རྣམས་ཀྱི་འབྲས་བུ་རྗེས་སུ་དྲན་པར་གྱུར་ནས་ཡུད་ཙམ་ཞིག་འདོད་པ་རྣམས་ལ་བག་མེད་པ་དང་ལྡན་པར་མི་བྱེད་དོ། །དགེ་བ་རྗེས་སུ་དྲན་པ་ཡང་ཀུན་ཏུ་སྐྱེས་པར་འགྱུར་རོ་དེ་དག་རྣམས་ཀྱིས་འདིར་ཡུད་ཙམ་ཅིག་ཕན་པར་འགྱུར་བ་དང་བདེ་བར་འགྱུར་བ་དང་སྐྱེ་བ་གཞན་བརྒྱ་སྟོང་འཕེན་པར་བྱེད་པ་རྣམས་ཀྱང་ཀུན་ཏུ་བྱུང་བར་གྱུར་པ་ནི་གཞན་ལ་ཕན་པ་ལ་རབ་ཏུ་ཞུགས་པའི་བྱང་ཆུབ་སེམས་དཔའ་རྣམ་པར་བཀྲ་བ་དེས་ཚིགས་སུ་བཅད་པ་དེ་དག་རྣམས་བཤད་པའི་རྒྱུས་བྱས་པ་ཡིན་ནོ། །དེ་ནས་སླར་ཡང་དབང་པོ་དེ་ཉིད་ཀྱིས་ཀུན་ནས་ཁྲིད་པར་གྱུར་ནས་ནགས་དེ་ཉིད་ཀུན་ཏུ་ལྟ་བར་རྩོམ་པར་བྱེད་དེ། དེ་དག་རྣམས་ཀྱི་མགོ་བོ་ལ་པད་མའི་ཕྲེང་བ་ཅན་རང་གི་འོད་དང་ལྡན་པ་ལྷ་རྫས་ཀྱི་རྒྱན་གྱིས་ཀུན་ནས་བརྒྱན་པ་རྔ་སྐད་ཡན་ལག་ལྔ་དང་ལྡན་པས་ཀུན་ནས་བསྒྲགས་པའི་སྒྲའི་རྒྱགས་པས་རྒྱགས་པ་རྣམས་སོ། །ནགས་དེ་ན་ནི་རབ་ཏུ་ཕལ་ཆེ་བར་གྱུར་པའི་ཤིང་ལྗོན་པ་དང་། འབྲས་བུ་དང་ཆུ་ཀླུང་དང་འབབ་ཆུ་དང་རྫིང་བུ་དང་ཆུ་མིག་རྣམས་ཕུན་སུམ་ཚོགས་པར་གྱུར་པ་རྣམས་ཤིན་ཏུ་ཁྱད་པར་དུ་འཕགས་པར་ཡིད་དགའ་བར་གྱུར་པ་རྣམས་མཐོང་ངོ་། །ལྷ་རྣམས་བག་མེད་པར་གྱུར་པ་ལ་རོ་གཅིག་ཏུ་བྱས་ནས་སྐྱེ་བ་དང་རྒ་བ་དང་འཆི་བའི་འཇིགས་པ་དང་རྣམ་པར་བྲལ་བར་གྱུར་པས། དེ་དག་རྣམས་དེ་ལྟར་གར་བྱེད་པར་གྱུར་ཅིང་། མེ་ཏོག་གི་ཕྲེང་བའི་ནགས་ཞེས་བྱ་བའི་ནགས་གཞན་དུ་ལེགས་པར་རྗེས་སུ་ཕྱིན་པར་གྱུར་ཏོ། །ནགས་དེ་ན་ཡང་ཤིང་ཤཱ་ལིའི་འཁྲི་ཤིང་བརྒྱ་སྟོང་དུ་མ་དང་ལྡན་པ་ཤིང་དང་མེ་ཏོག་དུ་མ་ཀུན་ཏུ་འབྱུང་བར་འགྱུར་བ་རྣམས་ཀྱི་མདོག་དང་དྲི་དང་དབྱིབས་དང་འདབ་མ་དང་མྱུ་གུ་དང་ཟེའུ་འབྲུར་གྱུར་པའི་མེ་ཏོག་རྣམས་ཀྱིས་ཉེ་བར་མཛེས་པར་བྱས་པ། མེ་ཏོག་དེ་དག་རྣམས་ཐམས་ཅད་ནི། འཁྲི་ཤིང་ལ་ལེགས་པར་རབ་ཏུ་བརྒྱུས་པ་རྣམས་ཡིན་ནོ། །དེ་དག་རྣམས་ཀྱི་ནགས་དག་ཅིག་ན་ཡོད་པ་རྣམས་ནི་རིན་པོ་ཆེ་བདུན་གྱི་རང་བཞིན་དུ་གྱུར་པའི་རྣམ་པར་བཀྲ་བའི་གཟུགས་དང་སྒྲ་མཆོག་ཏུ་སྙན་པར་གྱུར་པའི་དབྱངས་རྣམ་པ་དུ་མ་དང་ལྡན་པའི་བུང་བ་རྣམས་ཀྱིས་ཉེ་བར་མཛེས་པ་དང་། མེ་ཏོག་གི་ཕྲེང་བའི་ནགས་དེ་ན་རྣམ་པར་འགྱུར་བ་དུ་མའི་མེ་ཏོག་གི་ཕྲེང་བ་རྣམས་ཀྱིས་ལྷ་དེ་དག་རྣམས་རྣམ་པ་སྣ་ཚོགས་པའི་རྩེད་མོ་རྩེ་བར་བྱེད་དོ།