།རྟག་ཏུ་མངོན་པར་དགའ་བའི་ལོགས་གཞན་གསུམ་པ་དེའི་ལོགས་ཀྱི་ཉེ་འཁོར་ན་ཉེ་བའི་ནགས་དག་དང་ལྡན་པ་ཁ་དོག་གཅིག་ཏུ་གྱུར་པས་ཀྱང་ཤིན་ཏུ་ཁྱད་པར་དུ་འབར་བར་བྱེད་པར་གྱུར་པ་ནི་མཐིང་ག་རབ་ཏུ་དང་བའི་མདོག་དང་ལྡན་པས་ཉེ་འཁོར་ཀུན་དུ་འོད་ཟེར་གྱིས་སྣང་བར་བྱེད་དོ། །དེའི་འོད་རྣམས་ཀྱིས་ཀྱང་དེ་ལས་གཞན་པའི་ནམ་མཁའི་དཀྱིལ་རྣམས་ཀྱང་དེ་བཞིན་དུ་སྔོན་པོས་ཤིན་ཏུ་བར་ཡང་མཛེས་སོ། །འཛམ་བུ་གླིང་པའི་ནམ་མཁར་ཇི་ལྟ་བ་བཞིན་དུ་བཻ་ཌཱུརྱ་དེའི་འོད་རྣམས་ཀྱིས་དེ་དག་རྣམས་མཛེས་པར་བྱེད་དོ། །རྟག་ཏུ་མངོན་པར་དགའ་བའི་ནགས་དེ་ན་ཕལ་ཆེ་བ་ཉིད་དུ་གཞན་ཡོད་པ་ནི་མ་ཡིན་གྱི་ཉེ་བའི་ནགས་ཤེལ་གྱི་རང་བཞིན་དུ་གྱུར་པ་ཉེ་འཁོར་ན་མཆོག་ཏུ་དང་བར་གྱུར་པའི་འོད་རྣམས་ཀྱིས་རྣམ་པར་སྣང་བར་བྱེད་དོ། །རྩ་བ་དང་འདབ་མ་དང་ཡལ་ག་དང་ཡལ་ག་ཕྲ་མོ་དང་ལྡན་པས་ཆེན་པོར་གྱུར་པ་ཆུ་ཀླུང་དང་འབབ་ཆུ་དང་རྫིང་བུ་ཕུན་སུམ་ཚོགས་པ་དུ་མ་དང་ལྡན་པར་གྱུར་པའོ། །ནགས་ཆེན་པོ་དེ་ཉིད་ཀྱི་ལོགས་གཞན་ལ་ཡང་ནགས་རྣམ་པར་སྣང་བར་བྱེད་པ་ནི་ཨིན་དྲ་ནཱི་ལའི་ལྗོན་ཤིང་གི་ནགས་ཡིན་ཏེ། རྩ་བ་དང་ཡལ་ག་དང་འདབ་མ་དང་ཟེ་བ་དང་ལྡན་པར་གྱུར་པ་ཉེ་འཁོར་རྣམས་ནི་མཆོག་ཏུ་སྔོ་བ་དང་ལྡན་པས་ཡིད་འཕྲོག་པར་གྱུར་པའི་འཁྲི་ཤིང་གི་ཤིང་རྣམས་དང་ལྡན་པ་ལ་རྣམ་པ་སྣ་ཚོགས་པར་ཡིད་འཕྲོག་པར་བྱེད་པའི་བདེ་བའི་སྒྲ་དང་ལྡན་པར་གྱུར་པའི་བྱ་རྣམས་ཀྱིས་གང་བ། པད་མའི་རྫིང་བུ་རྣམ་པ་དུ་མ་དག་གིས་ཀྱང་ཉེ་བར་མཛེས་པར་གྱུར་པའི་ཉེ་བའི་ནགས་རྣམས་ཀྱི་རྣམ་པར་སྣང་བར་བྱེད་དོ། །དེ་ན་འོད་ཟེར་འཕྲོ་བའི་ལྷ་དེ་རང་གིས་ལས་རྣམ་པར་འཕྲོ་བའི་འོད་ཀྱིས་ཀུན་ནས་བརྒྱན་པའི་ལུས་ཅན་རྣམས་གང་ན་རྟག་ཏུ་མངོན་པར་དགའ་བའི་ནགས་ཡོད་པ་དེར་ཉེ་བར་ལེགས་པར་འགྲོ་བར་བྱེད་ལ། བལྟ་བར་འདོད་པས་དང་རྩེ་བར་འདོད་པའི་ཕྱིར་ཏེ། ནགས་དང་ཉེ་བའི་ནགས་དེ་དག་རྣམས་སུ་རྩེད་མོས་རྒྱུ་བར་འདོད་པ་རྣམས་སྲེད་པའི་རྒྱན་རྒྱུན་གྱིས་ཀུན་ནས་བཅིངས་ཤིང་འདོད་པའི་ཡོན་ཏན་ལྔས་ངོམས་པ་མེད་པས་ཀུན་ནས་དྲངས་ནས་ལྷ་དེ་སླར་ཡང་ཀུན་དུ་དགའ་བར་གྱུར་པ་དང་རྩེ་བར་གྱུར་པས་གང་ན་རྟག་ཏུ་མངོན་པར་དགའ་བའི་ནགས་ཞེས་བྱ་བའི་མིང་ཅན་དེར་དེ་ཉེ་བར་འགྲོ་བར་བྱེད་དོ། །ནགས་དེའི་ནང་ན་ཡང་ཐམས་ཅད་རྣམ་པར་བཀྲ་བར་གྱུར་པ་སྟེ། རྣམ་པ་སྣ་ཚོགས་པའི་ཁ་དོག་གི་མེ་ཏོག་དུ་མ་རྣམས་དང་ལྡན་པ་དང་འབྲས་བུས་གང་བར་གྱུར་པའི་ནགས་དེ་ཡང་ལྗོན་ཤིང་མཆོག་ཏུ་དྲི་ཞིམ་པ་དང་ལྡན་པ་རྣམས་ཀྱིས་ཁྱབ་པར་གྱུར་པའོ།