བག་མེད་པ་སྟེན་ཅིང་བསྒོམས་ལ་ལན་མང་དུ་བྱས་པས་ནི་དམྱལ་བར་འགྱུར་རོ། །བག་མེད་པ་སྟེན་པ་རྣམས་ནི་ཡི་དགས་སམ་དུད་འགྲོ་རྣམས་སུ་ཡང་སྐྱེ་བར་འགྱུར་རོ། །བག་ཡོད་པས་གནས་པ་རྣམས་ལ་ནི་ཡོན་ཏན་ལྔ་པོ་འདི་དག་རྣམས་ཡོད་དེ། བག་ཡོད་པ་རྣམས་ཀྱིས་བསྔགས་པའོ། །ལྔ་གང་ཞེ་ན། འདི་ལྟ་སྟེ། སྤྱོད་པ་ཀུན་ནས་བསྡམས་པར་འགྱུར་བ་དང་། བློ་ཀུན་དུ་ལེགས་པར་གནས་པ་དང་། བྱ་བ་བྱེད་པ་དང་བློ་མཉམ་པར་བཞག་པ་དང་གཅིག་ཏུ་ཕན་པ་བྱེད་པ་དང་། དུག་རྣམས་བཞིན་དུ་བག་མེད་པ་ཡོངས་སུ་སྤོང་བར་བྱེད་དོ། །དེས་རྣམ་པ་གསུམ་ཀུན་དུ་རིག་གོ། །འདི་ནི་བག་ཡོད་པ་ལ་མངོན་པར་དགའ་བར་གྱུར་པ་རྣམས་ཀྱི་ཡོན་ཏན་དང་པོའོ། །གཞན་ཡང་བག་ཡོད་པ་ལ་མངོན་པར་དགའ་བར་གྱུར་པའི་ཡོན་ཏན་གཉིས་པ་ཡོད་པ་ལ། འདི་གང་ཞེ་ན། འདི་ལྟ་སྟེ། ལས་རྣམས་ཀྱི་ལྕི་བ་ཉིད་ཀུན་དུ་ཤེས་པའོ། །དེ་སྐྱེས་བུ་དམ་པ་ལ་རྟེན་པར་གྱུར་པས་ལས་དང་བཅས་པའི་འབྲས་བུ་རིག་ནས་བྱ་བ་དག་བྱེད་དོ། །སྐྱེས་བུ་དམ་པ་མ་ཡིན་པ་ལ་མི་རྟེན་ནོ། །དམན་པའི་ལས་རྣམས་མི་བྱེད་དོ། །གང་ལ་ཡང་རྟག་ཏུ་རྣམ་པར་སྨོད་པར་འགྱུར་བ་དང་གང་ལས་སྐྱོན་མཐོང་བ་དེ་དག་རྣམས་ཡོངས་སུ་སྤོང་བར་བྱེད་དོ། །གང་ལ་ཡོན་ཏན་མཐོང་བར་གྱུར་པ་དེ་དག་ལ་ཉེ་བར་བསྟེན་ནོ། །ཡོན་ཏན་དང་ལྡན་པ་དང་ཡོན་ཏན་ཤེས་པར་གྱུར་པའི་བློ་གྲོས་བཟང་པོ་རྣམས་ལ་སྡིག་པ་མི་འབྱུང་ངོ་། །གཞན་ཡང་བག་མེད་པ་སྤངས་པར་གྱུར་པ་དང་བག་ཡོད་པ་སྟེན་པར་བྱེད་པའི་ཡོན་ཏན་གསུམ་པ་ཡོད་དེ། གང་ཞེ་ན། དེ་བཞིན་དུ་སྲོག་གི་མཐར་ཐུག་པར་གྱུར་ཀྱང་བུད་མེད་རྣམས་ཀྱི་དབང་དུ་འགྲོ་བ་མ་ཡིན་ནོ། །ཚིག་རྣམས་ལ་ཡང་དད་པར་མི་བྱེད་དོ། །རྟག་ཏུ་དེའི་རང་བཞིན་ལ་རྗེས་སུ་རྟོག་གོ། །འཇིག་རྟེན་གཉིས་སུ་འཆིང་བར་བྱེད་པ་ཡང་གང་གི་ཕྱིར་བུད་མེད་དག་ཡིན་པར་གྱུར་པ་དེ་བཞིན་དུ་ཡང་རིག་ལ་གཟུགས་ཀྱི་འཁྲུལ་བར་ཡང་མི་འགྱུར་རོ། །ཚིག་ལ་ཡང་དད་པར་མི་བྱེད་དོ། །དེ་དེ་བཞིན་དུ་ཡང་དག་པ་ཇི་ལྟ་བ་ཁོ་ན་བཞིན་དུ་སོ་སོར་རྟོག་པར་བྱེད་དོ། །དེའི་གར་དང་གླུ་དང་རྒོད་པ་དང་འགྱིང་བག་དང་རྒྱན་ཆས་ཀྱང་ཀུན་ནས་འཁྲིད་པར་མི་བྱེད་དོ། །བག་ཡོད་པ་དང་བག་ཡོད་པར་གྱུར་པའི་སྐྱེས་བུ་དེ་རྣམས་ཀྱིས་ཀྱང་གཞན་རྣམ་པ་དེ་ལྟ་བུའི་བག་མེད་པའི་གནས་རྣམས་མི་བྱེད་དོ།