།གཞན་ཡང་བག་མེད་པ་རྣམས་ལ་སྐྱོན་གཉིས་པ་ཡོད་དེ། གང་ཞེ་ན་འདི་ལྟ་སྟེ། དགོས་པ་དང་དགོས་པ་མ་ཡིན་པ་རྣམས་ཀྱང་མི་ཤེས་པའོ། །བག་མེད་པས་ཉམས་པར་གྱུར་པའི་བློས་རྟོགས་པར་མི་འགྱུར་ཏེ། བདག་གི་ལེགས་པར་བྱས་པའི་དོན་རྣམས་ནི་ཅི་ཡིན། ཅི་ནི་བྱ་བ་མ་ཡིན་པ་ཡིན། དེའི་ལས་དེ་དག་རྣམས་ཀྱི་འབྲས་བུ་ནི་རྣམ་པ་ཅི་འདྲ་བ་ཅིག་ཏུ་འགྱུར། དེ་ཇི་ལྟར་ལས་རྣམས་ཤེས་པ་མ་ཡིན་པ་དེ་དེ་ལྟར་རྣམ་པར་སྨིན་པ་རྣམས་ཡང་མི་ཤེས་སོ། །དེ་ལས་དང་འབྲས་བུ་རྣམས་ལ་རྣམ་པར་རྨོངས་པར་གྱུར་ཅིང་རྨོངས་པ་ནི་ལུས་ཞིག་པར་གྱུར་ནས་བག་མེད་པ་དེའི་སྐྱོན་གྱིས་ངན་སོང་ལོག་པར་ལྟུང་བར་གྱུར་པ་དམྱལ་བ་རྣམས་སུ་སྐྱེ་བར་འགྱུར་རོ། །གཞན་ཡང་སྐྱོན་གསུམ་པ་བག་མེད་པ་ལ་ཡོད་དེ། བག་མེད་པ་ལ་ཀུན་ཏུ་འཁྲིད་པར་གྱུར་པའི་ལྷའམ་མི་རྣམས་ཀྱང་རུང་སྟེ་གྲོགས་པོ་དམ་པ་མ་ཡིན་པ་སྟེན་པར་བྱེད་ལ། དཀོན་མཆོག་གསུམ་ལ་སྙེན་པར་མི་བྱེད་པ་དང་། ཤེས་རབ་དང་ཚུལ་ཁྲིམས་ལ་ཡང་མ་ཡིན། བླ་མ་རྣམས་ལ་ཡང་སྟེན་པར་མི་བྱེད་དོ། །སྐྱོན་དང་ཡོན་ཏན་གྱི་ཁྱད་པར་རྣམས་ཀྱང་ཀུན་ཏུ་མི་ཤེས་སོ། །འཁོར་བའི་སྡུག་བསྔལ་རྣམས་ཀྱང་ཤེས་པར་མི་འགྱུར་རོ། །ལས་རྣམ་པ་སྣ་ཚོགས་པ་རྣམས་ཀྱང་ཀུན་ཏུ་མི་རྟོགས་སོ། །སྲོད་དང་ཐོ་རངས་མི་ཉལ་བར་བརྩོན་པར་གནས་པའི་རང་བཞིན་ཅན་མ་ཡིན་ནོ། །དེ་ཤི་བར་གྱུར་པའི་འོག་ཏུ་བག་མེད་པ་དེའི་སྐྱོན་གྱིས་ངན་སོང་ལོག་པར་ལྟུང་བ་དམྱལ་བར་སྐྱེའོ། །གཞན་ཡང་སྐྱོན་བཞི་པ་བག་མེད་པ་ལ་ཡོད་དེ། དེ་གང་ཞེ་ན། འདི་ལྟ་སྟེ། དེ་ཁོ་ནར་སྐྱེས་པར་གྱུར་པའི་སྐྱེས་བུ་རྣམས་དང་ལྷ་རྣམས་ཀྱང་དེ་ཁོ་ན་བཞིན་དུ་ཚེའི་འདུ་བྱེད་རྣམས་ཟད་པར་འགྱུར་ཞིང་ལེགས་པར་བྱས་པའི་ལས་རྣམས་ཟད་པར་གྱུར་ནས་ནི་འཆི་བདག་གི་རྒྱལ་པོ་འོང་བར་འགྱུར་ལ། གང་དང་ལྷན་ཅིག་ཏུ་སྐྱེས་པར་གྱུར་པའི་བག་མེད་པ་སྟེན་པར་བྱེད་པ་རྣམས་ལ་དེ་དང་ལྷན་ཅིག་ཏུ་རྣམ་པར་འབྲལ་བ་འབྱུང་བར་འགྱུར་རོ། །བཞི་པོ་འདི་དག་རྣམས་གང་ཡིན་པ་དང་ནི་ངེས་པ་ཁོ་ནར་ལྷན་ཅིག་ཏུ་འབྲལ་བར་འབྱུང་བར་འགྱུར་རོ། །བཞི་གང་ཞེ་ན། འདི་ལྟ་སྟེ། ལང་ཚོ་དང་ནད་མེད་པ་དང་སྲོག་དང་ཕུན་སུམ་ཚོགས་པ་རྣམས་སོ། །བཞི་པོ་འདི་དག་རྣམས་དང་ནི་ངེས་པ་ཁོ་ནར་ལྷན་ཅིག་ཏུ་འབྲལ་བར་བྱ་དགོས་སོ།