།འཆི་བའི་དུས་སུ་རྣམ་པར་རིག །ཡུལ་རྣམས་ཀྱིས་ནི་འཁྲིད་བྱེད་པ། །ལྷ་གང་སེམས་ནི་རྨོངས་པ་ཡིན། །གང་གི་བློ་ནི་ཡོན་ཏན་ལྡན། །འདོད་པའི་དབང་རྗེས་དེ་མི་འགྲོ། །ད་ལྟར་བ་ཡི་འདོད་པ་ལ། །ཁྱད་པར་དུ་ནི་སྐྱོན་ཅན་ལ། །གང་ཞིག་བདེ་བས་མི་རྨོངས་པ། །དེ་ནི་བརྟན་པ་ཞེས་བརྗོད་དོ། །སྐྱོན་གྱིས་འཇིགས་པས་བརྐམ་ཆགས་མེད། །འདོད་རྣམས་དབང་དུ་འདི་མི་འགྲོ། །དེས་ནི་སྡིག་ཀྱང་རྣམ་འཇིག་བྱེད། །དེ་ནི་བརྟན་པ་ཞེས་བརྗོད་དོ། །བདེ་བ་ཡིས་ནི་འཕངས་པའི་ཡིད། །སྡིག་པའི་འཇིགས་པ་མ་མཐོང་བ། །དགའ་བ་ཤིན་ཏུ་དེས་སྟེན་པ། །རྨོངས་པ་གང་ནི་རབ་ཏུ་འཇོམས། །དགའ་བ་རྙེད་ནུས་ཐོབ་གྱུར་ནས། །ཅི་ཕྱིར་འདོད་པས་ཉམས་པར་བྱེད། །རྟེན་པ་དེ་དག་ཤིས་པ་མིན། །ངན་སོང་ཤིན་ཏུ་ཆེན་པོར་འགྱུར། །འཇིག་རྟེན་གློག་དང་སྨིག་རྒྱུ་བཞིན། །དྲི་ཟའི་གྲོང་ཁྱེར་དང་མཚུངས་པར། །ཐམས་ཅད་སླུ་བའི་བདག་ཉིད་ཅན། །འདོད་པ་མི་བཟད་པར་རབ་བརྗོད། །དེ་ལྟར་ངོས་ན་སྤྱོད་པའི་བྱས་ཤིན་ཏུ་བག་མེད་པར་གྱུར་པའི་ལྷ་གསར་དུ་སྐྱེས་པ་དེ་དག་མངོན་པར་མཐོང་ནས་ཚིགས་སུ་བཅད་པ་དེ་དག་བརྗོད་དོ། །གསར་པ་དེ་ཡང་ཡུལ་གྱིས་ཀུན་ནས་ཕྲོགས་པར་གྱུར་པའི་ཕྱིར་ན་བྱ་དེ་དག་གིས་ཅི་བརྗོད་ཅེས་ཟེར་ནས་གོ་བར་མི་འགྱུར་རོ། །དེ་ནས་ཕན་པ་དེ་དག་རྣམས་མ་བགྲངས་པར་སླར་ཡང་དེ་ཁོ་ན་བཞིན་དུ་ངང་པའི་ནགས་ཀྱི་ཆེས་ནང་དུ་ཞུགས་པར་གྱུར་པ་ན། ཡུལ་གཞན་མང་པོ་རྣམས་ལས་འདོད་པའི་རྒྱགས་པས་ཟིན་པ་རྣམས་ཀྱིས་ངང་པའི་ནགས་སུ་ཆེས་མཆོག་ཏུ་དགའ་བར་གྱུར་པའི་ཁྱད་པར་གྱི་དངོས་པོ་ཕལ་ཆེ་བ་ཉིད་ལས་དང་པོར་འཁྲི་ཤིང་གི་དྲ་བས་གཡོགས་པར་གྱུར་པ་རྣམས་རྟོགས་སོ། །དེ་ལྟ་དེ་ལྟར་མཆོག་ཏུ་བླ་ན་མེད་པ་རྣམས་དང་ལེགས་པར་ལྡན་པ་ལས་དེས་རྒྱང་རིང་བ་ཉིད་ནས་ནོར་བུའི་ནགས་ཞེས་བྱ་བ་མཐོང་སྟེ། ངང་པའི་ནགས་དེ་ཉིད་ཀྱི་འོད་ཟེར་གྱི་ཕྲེང་བ་བརྒྱ་སྟོང་དང་ལྡན་པའི་ནོར་བུ་རྣམས་གང་ཡིན་པའི་ཁྱད་པར་གྱིས་ལྷ་རྣམས་ཉིད་ཀྱིས་ངེས་པར་བལྟ་བར་ནུས་པ་ཡང་མ་ཡིན་ཏེ། འོག་གི་ས་ན་གནས་པར་གྱུར་པའི་ལྷ་སུམ་ཅུ་རྩ་གསུམ་པའམ་རྒྱལ་ཆེན་རིས་བཞི་པ་རྣམས་ཀྱང་རུང་སྟེ་གཞན་འགའ་ཞིག་ན་ཡང་རྣམ་པ་དེ་སྲིད་ཀྱི་གཟི་བརྗིད་ཅན་ནི་ཡོད་པ་མ་ཡིན་ནོ།