བྱའི་རྒྱལ་པོ་ཡང་ཇི་ལྟ་བ་བཞིན་དུ་ཐོས་པར་གྱུར་ནས་ལྷ་གསར་དུ་སྐྱེས་པ་དེས་ལྷ་དེ་དག་རྣམས་ཀྱི་ནང་ནས་ཞབས་འབྲིང་བྱེད་པ་ལ་འདི་སྐད་ཅེས་བརྗོད་དེ། གང་ན་ངང་པའི་རྒྱལ་པོ་དེ་དང་འཐབ་བྲལ་གྱི་བདག་པོ་མུ་སུ་ལུན་དྷ་ཡང་ཡོད་པ་དེར་བདག་ཅག་རྣམས་ཇི་ལྟ་བ་བཞིན་དུ་འགྲོ་བར་བྱའོ། །དེ་ནས་དེ་བཞིན་དུ་ལྷ་མོ་དེ་དག་རྣམས་དང་ལྷ་དེ་དག་གང་ན་ང་ནགས་དེའི་ནང་ན་ཡོད་པ་དེར་ཉེ་བར་ལེགས་པར་ཕྱིན་ནོ། །ཞུགས་པར་གྱུར་པ་ན་མཐོང་བ་རྣམས་ལ་ལྗོན་ཤིང་གི་ཚལ་རྣམ་པ་སྣ་ཚོགས་པ་རྣམ་པ་དུ་མ་དང་རྣམ་པ་སྣ་ཚོགས་པའི་རི་དགས་རྣམས་དང་། བྱ་རྣམས་ཀྱིས་ཀུན་ཏུ་གང་བར་གྱུར་ཅིང་རི་དགས་ཀྱི་ཁྱུ་རྣམས་ཀུན་ཏུ་རྒྱུ་བ་རྣམས་ལ་ཁ་དོག་རྣམ་པ་དུ་མ་རྣམས་དང་རིགས་སྣ་ཚོགས་པ་རྣམས་ལྷན་ཅིག་སྤྱོད་པ་རྣམས་དང་བཅས་ནས་དེ་དག་ལ་སྤྱོད་པར་བྱེད་དོ། །སྤྱད་པར་འོས་པའི་ཟས་རྣམས་ལྷན་ཅིག་ཏུ་ཟ་བར་བྱེད་ཅིང་ལྷ་རྫས་ཀྱི་ནགས་རྣམས་ཀྱི་རྩ་བའི་ཟས་ཀྱང་སྟེ། རིན་པོ་ཆེ་བདུན་གྱིས་སྤྲས་པའི་ལུས་ཅན་རྣམས་ནགས་རྣམས་ཀྱི་ནང་དུ་དང་། ནགས་ཀྱི་ཚང་ཚིང་རྣམས་སུ་དང་ཆུ་ཀླུང་གི་ངོགས་རྣམས་སུ་དང་། པད་མའི་ཚལ་གྱི་འགྲམ་རྣམས་ལ་དང་། མཚེའུ་གཞན་རྣམས་ལ་དང་། སྨན་ལྗོངས་རྣམས་སུ་དང་། རིའི་ཁོང་སེང་རྣམས་ལ་ཡང་། ཁྱུ་རྣམས་དགའ་བར་བྱེད་ཅིང་ཀུན་རྗོད་པར་ཡང་བྱེད་དོ། །དེ་དག་རྣམས་མངོན་ཏུ་ལེགས་པར་མཐོང་བས་ཀྱང་ལྷ་རྣམས་ཀྱི་མིག་དང་ཡིད་མཆོག་ཏུ་འཕྲོག་པར་འགྱུར་ཞིང་རྣམ་པ་དུ་མར་ཡང་རབ་ཀྱི་མཆོག་ཏུ་དགའ་བར་གྱུར་ནས། གཞན་ཡང་ངོ་མཚར་བས་མིག་ཀུན་ཏུ་བསྐྱོད་པར་འགྱུར་ཞིང་དེ་དང་དེ་དག་རྣམས་མིག་གཏོད་པར་བྱེད་ཅིང་ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་བར་གྱུར་ནས་ཀྱང་ཉེ་བར་ལེན་པར་བྱེད་ཅིང་སླར་ཡང་ངང་པའི་ནགས་དེ་ཉིད་དུ་རབ་ཏུ་འཇུག་གོ། །རབ་ཏུ་ཞུགས་པར་གྱུར་པ་ཉིད་ན་ཀུན་ཏུ་ལྟ་བར་བྱེད་དོ། །བརྒྱ་ཕྲག་དུ་མར་གྱུར་པའི་རྨ་བྱའི་ཁྱུ་རྣམས་ཀྱང་ལྗོན་ཤིང་གི་ཚང་ཚིང་དང་ཉེ་བར་གྱུར་པ་རྣམས་ན་ཉེ་བར་རྟོག་སྟེ། ཁ་ཅིག་ནི་མགྲིན་པ་ནས་དབྱངས་སྒྲོགས་པའོ། །ཁ་ཅིག་ནི་ཕན་ཚུན་དུ་མདོངས་ཕྱི་རོལ་ཏུ་བྱས་ནས་ཀྱང་རྩེ་བར་བྱེད་པས་ལྷན་ཅིག་སྤྱོད་པ་རྣམས་ཀྱི་སྔོན་དུ་གར་བྱེད་དོ། །ཁ་ཅིག་ནི་གཅིག་པུ་ཞིག་ཏུ་གྱུར་ནས་ཤིང་འཐུག་པོ་རྣམས་ཀྱི་ནང་དུ་ནོར་བུ་བདུན་གྱིས་སྤྲས་པའི་ཐིག་ལེས་རྣམ་པར་བཀྲ་བ་རྣམས་ལྗོན་ཤིང་གི་འདབ་མ་རྣམས་དང་ལྷན་ཅིག་ཏུ་རྩེ་བར་བྱེད་དོ།