།ཡང་འདི་ལྟ་སྟེ་མེ་ལྔ་འབར་བ་ལ་རླུང་གིས་བསྐྱོད་པར་གྱུར་པས་རི་རབ་ཏུ་འབར་བར་བྱེད་པས་མཆོག་ཏུ་སྲེག་པར་བྱེད་པའི་ཤུགས་དང་ལྡན་པ་ལ་ཤིང་སྐམ་པོ་ཅི་ལྟ་ཅི་ལྟར་རབ་ཏུ་བཅུག་པ་དེ་ལྟ་དེ་ལྟར་མེ་ཆེས་ཕལ་ཆེ་བར་འགྱུར་ཏེ་བུད་ཤིང་རྣམས་སྲེག་པར་འགྱུར་བའི་ཕྱིར་རོ། །དེ་བཞིན་དུ་དབང་པོ་འདི་དག་རྣམས་ཀྱང་རྟག་ཏུ་སྲེད་པ་དང་ལྡན་པ་རྣམས་ནི་མེ་དང་མཚུངས་པ་ཡིན་ལ་རྣམ་པར་རྟོག་པའི་རླུང་གིས་བསྐྱོད་པར་གྱུར་ཅིང་། ཚུལ་བཞིན་མ་ཡིན་པ་ཡིད་ལ་བྱེད་པའི་རིའི་རྩེ་མོ་རྣམས་སུ་ཡུལ་གྱི་བུད་ཤིང་རྣམས་རབ་ཏུ་འབར་བར་གྱུར་པས། དབང་པོ་ལྔའི་འདོད་པའི་མེ་རྣམས་རབ་ཏུ་འབར་བར་འགྱུར་རོ། །དེ་བཞིན་དུ་དབང་པོ་འདི་དག་རྣམས་ཀྱི་ཡུལ་གྱི་ཤིང་རྣམས་དང་ཕྲད་པར་གྱུར་ན། དེ་ལྟ་དེ་ལྟར་མེ་བཞིན་དུ་རབ་ཏུ་འབར་བར་འགྱུར་རོ། །ཇི་ལྟ་ཇི་ལྟར་ཡང་མེ་དང་མར་མེར་ཕྱེ་མ་ལེབ་རབ་ཏུ་ལྷུང་བར་འགྱུར་ན་དེ་ལྟ་དེ་ལྟར་སྲེག་པར་བྱེད་དོ། །དེ་ཁོ་ན་བཞིན་དུ་སྲེད་པ་དང་ལྡན་པ་རྣམས་ཡུལ་གྱི་མེས་རབ་ཏུ་ལྟུང་བར་གྱུར་པས་ཀྱང་འཆི་བར་འགྱུར་བ་ཡིན་ནོ། །དེའི་ཕྱིར་ན་ཕྱེ་མ་ལེབ་ལྟ་བུར་གྱུར་པ་ནི་སྲེད་པ་དང་ལྡན་པ་རྣམས་ཐམས་ཅད་ཡིན་ནོ། །དེའི་བདག་ཉིད་དུ་གྱུར་པ་དེ་གོ་བར་གྱུར་པ་ཡང་མ་ཡིན་ནོ། །ཕྱེ་མ་ལེབ་ལྟ་བུར་གྱུར་པའི་ལྷ་དེ་དག་རྣམས་རབ་ཏུ་སྲེག་པར་གྱུར་པས་ཡུལ་ལྔའི་མེར་རབ་ཏུ་ལྷུང་བར་གྱུར་ནས་ནགས་དང་ཉེ་བའི་ནགས་རྣམས་སུ་ཡང་འགྲོ་བར་བྱེད་དེ། ལྷའི་བུ་མོའི་ཚོགས་དང་བཅས་པས་བསྐོར་བར་གྱུར་ནས་པད་མའི་ཚལ་ནས་པད་མའི་ཚལ་རྣམས་དང་། དེ་བཞིན་དུ་བདུད་རྩིའི་ཡུལ་ཕྱོགས་ནས་གཞན་བདུད་རྩིའི་ཡུལ་ཕྱོགས་རྣམས་སུ་དང་། དེ་བཞིན་དུ་བཏུང་བའི་བུམ་པ་ནས་ཡུལ་ཕྱོགས་གཞན་བཏུང་བའི་བུམ་པ་རྣམས་སུ་དང་། མར་གྱིས་ཀུན་ཏུ་བཏབ་པར་གྱུར་པའི་མེ་བཞིན་དུ་ཡུལ་གྱི་མེ་རྣམས་ཀྱིས། དེ་བཞིན་དུ་དེ་ཁོ་ན་ལྟར་རབ་ཏུ་འབར་བར་འགྱུར་རོ། །ལྷ་དེ་སྐྱེས་པ་ནས་ཡུལ་ཕྱོགས་དེ་རིན་པོ་ཆེ་བདུན་གྱིས་རྣམ་པར་བརྒྱན་པར་གྱུར་པ་གང་ཡིན་པ་རྣམས་རྣམ་པ་དུ་མར་ཤིན་ཏུ་ཡིད་འཕྲོག་པར་བྱེད་པའི་ལྷ་དང་ལྷ་མོའི་ཚོགས་བརྒྱ་སྟོང་དུ་མས་གང་བ་མཐོང་ངོ་། །རབ་ཏུ་དགའ་བར་གྱུར་པའི་རྒྱན་དང་ཆ་བྱད་དུ་མའི་གཟུགས་འཛིན་པ་གང་ཡིན་པ་རྣམས་ཀྱིས་ཡོངས་སུ་གང་བར་མ་གྱུར་པ་ནི། ཡུལ་ཕྱོགས་འདི་ན་ཡོད་པ་ནི་མ་ཡིན་ནོ། །ཡུལ་ཕྱོགས་དེ་ཡང་གང་རྒྱུན་མི་འཆད་པར་ལྷའི་ཚོགས་དང་ལྡན་པར་མི་འགྱུར་བ་ཡང་ནི་མ་ཡིན་ཏེ།