།གཞན་ཡང་བདེ་བའི་ཕྲེང་བའི་རྒྱ་ཆེན་པོའི་རིའི་རྩེ་མོའི་ནམ་མཁའ་ལ་རྣམ་པར་རྒྱུ་བའི་བྱ་རྣམས་ཀྱིས། རིན་པོ་ཆེ་བདུན་གྱི་རང་བཞིན་རྣམ་པ་སྣ་ཚོགས་པའི་ཚིག་གིས་རྣམ་པར་རྟོག་པ་རབ་ཏུ་བཅོམ་པའི་ལྷ་རྣམས་ལ་རྗོད་པར་བྱེད་དེ། ཇི་ལྟར། རྣམ་པར་རྟོག་པས་ཉེར་བཅོམ་དང་། །འདི་ནི་ཡུལ་གྱིས་བསླུས་པའང་ཡིན། །སྲིད་པ་ཡིས་ནི་རྨོངས་འདི་དག །འཆི་བདག་རྒྱལ་པོ་ཤིན་ཏུ་གནས། །འདོད་ལོངས་སྤྱོད་ལ་ཀུན་ཏུ་ཆགས། །ལམ་དང་ལམ་མིན་རིག་མིན་པའི། །འདོད་པའི་མིང་ཅན་ཡུལ་རྣམས་ཀྱིས། །སྐྱེ་བོ་རྣམ་པར་རྨོངས་ཐམས་ཅད། །སྣ་ཚོགས་འགྲོ་ཀུན་དུ་འགྱུར་བ། །སྣ་ཚོགས་ལས་ཀྱི་རྗེས་སུ་འགྲོ། །སྣ་ཚོགས་སེམས་ཀྱི་དབང་གིས་ནི། །སེམས་ཅན་འགྲོ་བ་ལྔ་ན་འཁྱམ། །དེ་ལྟར་བྱ་དེས་མཆོག་ཏུ་བག་མེད་པའི་ལྷ་རྣམས་མཐོང་ནས་རྗེས་སུ་འདོམས་པར་བྱེད་དེ་སྔ་མ་བཞིན་ནོ། །དེ་ནས་ལྷ་དེ་དག་གིས་དེ་མ་བརྩིས་པར་སླར་ཡང་དེ་ཁོ་ན་བཞིན་དུ་ཡུལ་རྣམས་ལ་བག་མེད་པར་གྱུར་ཅིང་འདོད་པ་ལྔས་ཡིད་འཕྲོག་པས་དེ་ཁོ་ན་བཞིན་དུ་དགའ་བར་བྱེད་པ་དང་རྩེ་བར་ཡང་བྱེད་དོ། །དུས་དེ་སྲིད་དུ་སྟེ། ཇི་སྲིད་དུ་དགེ་བའི་ལས་རྣམས་བྱས་ཤིང་བསགས་པ་ཟད་པར་མ་གྱུར་གྱི་བར་དུའོ། །དེའི་གཏིང་ལ་ནམ་ཞིག་ན་ལྷའི་འཇིག་རྟེན་ནས་འཆི་འཕོ་བར་འགྱུར་རོ། །ཤི་འཕོས་ནས་ཀྱང་ཇི་ལྟར་ལས་རྣམས་ཀྱིས་ཉེ་བར་འགྲོ་བར་གྱུར་པའི་དམྱལ་བ་དང་ཡི་དགས་དང་དུད་འགྲོའི་འགྲོ་བར་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་འཐུན་པར་མིར་སྐྱེ་བར་གྱུར་ན་ཡང་ལན་གྲངས་གཞན་ལ་མྱོང་བར་འགྱུར་བའི་ལས་རྣམས་ཀྱིས་དེ་མཆོག་ཏུ་སྐྱིད་པ་དང་མཆོག་ཏུ་བློ་རྒྱ་ཆེ་བར་འགྱུར་རོ། །མཆོག་ཏུ་རབ་ཏུ་དགའ་བའི་ཡིད་ཀྱིས་རྩེ་བ་ལ་ཆེད་ཆེར་བྱེད་པའམ་རབ་ཏུ་དགའ་བར་གྱུར་པའི་ལྷ་རྣམས་སུའམ། དེ་ཡང་ན་གསེར་གླིང་དུའམ་དེ་ཡང་ན་སིང་ཧ་ལའི་གླིང་དུ་ལོངས་སྤྱོད་དང་ལྡན་པར་འགྱུར་རོ། །ཁྱིམ་བདག་ཏུ་ཡང་ལས་དེའི་རྒྱུ་འཐུན་པར་འགྱུར་རོ། །རྣམ་པར་འདྲེས་པའི་ཁོར་ཡུག་ན་རྒྱུ་བའི་ལྷ་རྣམས་ཀྱི་ས་སྟེ་ལྔ་པ་རྫོགས་སོ།། །།གཞན་ཡང་དགེ་སློང་ལས་དང་འབྲས་བུའི་རྣམ་པར་སྨིན་པ་ཤེས་པ་དེ་འཐབ་བྲལ་བ་རྣམས་ཀྱི་ས་ལ་ཀུན་ཏུ་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་རབ་ཀྱིས་འཐབ་བྲལ་བའི་ལྷ་རྣམས་ཀྱི་ས་ཡང་དག་པར་ལྡན་པ་ཞེས་བྱ་བ་མཐོང་ངོ་།