གྲོང་ཁྱེར་རམ། གྲོང་ངམ། ཚོང་འདུས་སམ། གཞན་ཡང་རྣམ་པ་དེ་ལྟ་བུ་རྣམས་དེས་གལ་ཏེ་དེས་དོན་དུ་གཉེར་བར་བྱེད་པ་ཡིན་ན་གཞན་ཅི་ཞིག་ཚོལ་བར་མི་བྱེད། དེ་ལྟར་ན་ཡང་དགེ་སློང་འདོད་པ་ཆེ་བར་མི་འགྱུར་རམ། གལ་ཏེ་ཚོལ་བར་མི་བྱེད་ན་ཡང་སྤྱད་པ་རྣམས་དོན་མེད་པར་ཉོན་མོངས་པར་འགྱུར་རོ། །བསམ་གཏན་ལ་བསམ་གཏན་དུ་བྱེད་པ་ལས་ཀྱང་ཡོངས་སུ་ཉམས་པར་འགྱུར་རོ། །དེའི་ཐར་པའི་ལམ་ལ་ཡང་དག་པར་གནས་པ་ལས་འཆིང་བའི་ལམ་རྣམས་ལ་རྗེས་སུ་འགྲོའོ། །དེ་ལྟར་ན་དགེ་སློང་རྣམས་ཀྱིས་རྒྱལ་པོ་ལ་བསྟེན་པར་མི་བྱའོ། །ཡང་ཇི་ལྟར་བསྟེན་པར་མི་བྱ་ཞེ་ན། དེ་ལ་སྟེན་པར་མི་བྱེད་པ་རྣམས་ཀྱིས་ཀྱང་ཡང་དག་པ་མ་ཡིན་པའི་འདུ་འཛི་རྣམས་ཡོངས་སུ་སྤང་བར་བྱའོ། །འདུ་འཛི་རྣམས་ཡོངས་སུ་སྤང་བ་ཡང་གང་དག་ཏུ་བྱ་ཞེ་ན། འདི་ལྟ་སྟེ། སྡིག་པའི་གྲོགས་པོ་དང་། ཀུན་ནས་ཉོན་མོངས་པའི་ཡུལ་ལྔ་པོ་སྒྲ་དང་། རེག་བྱ་དང་། རོ་དང་། དྲི་དང་། གཟུགས་རྣམས་ལ་ཚུལ་བཞིན་མ་ཡིན་པར་ཡིད་ལ་བྱེད་པ་དང་། གཉིད་དང་། རྨུགས་པ་དང་། མཐའ་འཁོབ་ཀྱི་གྲོང་དུ་གནས་པ་བསྟེན་པར་མི་བྱའོ། །ལེ་ལོ་ཅན་དང་ལྷན་ཅིག་གནས་པར་མི་བྱའོ། །ཚུལ་འཆོས་ཅན་རྣམས་དང་འགྲོགས་པར་མི་བྱའོ། །སྟན་བཟང་པོ་ཅན་དང་ལྷན་ཅིག་གནས་པར་མི་བྱའོ། །ཚོང་པ་དང་ལྷན་ཅིག་འདྲི་རྨེད་ཀྱང་མི་བྱའོ། །གཞན་སྡུག་བསྔལ་བར་བྱས་པས་འཚོ་བ་རྣམས་དང་མ་ཡིན། རང་བཞིན་གྱིས་དྲི་མ་ཅན་དང་མ་ཡིན། ལྟ་བ་ལོག་པ་དང་མ་ཡིན། རྐོ་ཏྲོག་ཅན་དང་མ་ཡིན། ང་རྒྱལ་ཅན་དང་མ་ཡིན། ཁེངས་པ་དང་མ་ཡིན། ལྷུང་བར་གྱུར་ནས་ལངས་པ་དང་མ་ཡིན། རྒྱན་པོས་འཚོ་བ་དང་མ་ཡིན། ཆང་འཚོང་བ་དང་མ་ཡིན། འཐབ་ཀྲོལ་ཅན་དང་མ་ཡིན། བུད་མེད་ལ་དད་ཆེ་བ་དང་མ་ཡིན། ཉོ་ཚོང་གིས་ཉེ་བར་འཚོ་བ་དང་མ་ཡིན། དུད་པའི་མིག་ཅན་དང་མ་ཡིན། སྐྱེས་བུ་ཉུལ་མ་དང་མ་ཡིན། བྱ་བ་མང་བ་དང་མ་ཡིན། སྤྲོས་པ་ཅན་རྣམས་དང་མ་ཡིན། མུ་སྟེགས་ཅན་ཞུགས་པ་དང་མ་ཡིན། སྐྱེ་བོ་ཐམས་ཅད་དང་ཞེ་འགྲས་པ་རྣམས་དང་མ་ཡིན་ཏེ། ལྷན་ཅིག་ཏུ་འགྲོགས་པ་དང་། ངག་བརྗོད་པའམ། ལམ་དུ་འགྲོགས་པ་ཡང་དགེ་སློང་གིས་མི་བྱའོ།