།གཞན་ཡང་དེ་ཁོ་ན་ལྟར་འཇིག་རྟེན་པའི་རྒྱུ་མཚན་དུ་གྱུར་པ་དམར་རེངས་ཀྱི་མདོག་གི་ཀུན་དུ་ཆ་བྱད་ཀྱིས་ཉི་མ་ནམ་མཁའ་ལ་ཤར་ནས་གནས་པར་རབ་ཏུ་མཐོང་བར་གྱུར་པ་དེ་བཞིན་དུ་འཇིག་རྟེན་ལས་འདས་པའི་རྒྱུ་མཚན་འདི་དག་རྣམས་ཀྱང་ཕྱིས་ཀྱི་རྒྱུ་མཚན་དུ་མཐོང་བ་ཡིན་ཏེ། དམར་རེངས་ཀྱི་མདོག་ནི་དགེ་སྦྱོང་ངན་པ་དང་། བྲམ་ཟེ་ངན་པའི་འཁོར་རྣམས་ཀྱི་ཀུན་དུ་ཆ་བྱད་ཅན་གྱི་ཐམས་ཅད་མཁྱེན་པ་མ་ཡིན་པར་ཐམས་ཅད་མཁྱེན་པར་མངོན་པར་ང་རྒྱལ་བའི་ལོག་པར་ལྟ་བ་ཅན་རྣམས་ཀྱི་ཉི་མ་ངན་པ་ཡིན་ལ། ཐམས་ཅད་མཁྱེན་པ་མ་ཡིན་པར་ཐམས་ཅད་མཁྱེན་པར་ཁས་འཆེས་པ་རིགས་ངན་པའི་རིགས་སུ་གྱུར་པ་རྣམས་ནམ་མཁའ་ལ་ཤར་ནས་གནས་པ་ཡིན་ནོ། །དེ་ལ་རྣམ་པ་འདི་ལྟ་བུའི་ལོག་པར་ལྟ་བའི་ཉི་མ་ཤར་བར་གྱུར་པས་རྩྭ་དང་། ནགས་དང་། ནགས་ཚང་ཚིང་དང་། སྨན་རྣམས་ཐམས་ཅད་སྐམ་པར་འགྱུར་རོ། །འདིས་ནི་སྐྱེས་བུ་རྣམས་ཀྱི་དགེ་བ་ཐམས་ཅད་དང་ཡང་དག་པའི་ལྟ་བ་སྨན་རྣམས་རྩྭ་བཞིན་དུ་སྐེམས་པར་འགྱུར་རོ། །དེ་བཞིན་དུ་འདི་ཡང་འཇིག་རྟེན་ལས་འདས་པའི་བསམ་གཏན་སྒོམ་པ་ན་ཀུན་དུ་གསལ་བར་བྱེད་པ། དོན་དམ་པའི་དེ་ཁོ་ན་ཉིད་གསལ་བར་བྱེད་པ། མཆོག་ཏུ་གྱུར་པའི་བློ་གྲོས་འཇིག་རྟེན་ལས་འདས་པའི་རྒྱུ་མཚན་མཚོན་པར་བྱེད་དོ། །ཉེ་བར་མཚོན་ནས་ཀྱང་སྟོན་པར་བྱེད་དོ། །དེ་དག་ཏུ་གྱུར་པ་གང་ཡིན་པ་རྣམས་ཀྱང་གང་དག་ཅེ་ན། དད་པ་ཅན་གྱི་བྲམ་ཟེ་དང་ཁྱིམ་བདག་དེ་དག་རྣམས་ལ་སྟོན་པར་བྱེད་དོ། །ཇི་སྲིད་དུ་དམ་པའི་ཆོས་ཀྱི་ཉི་མ་ཤར་བར་གྱུར་པ་དེ་སྲིད་དུ་བདེ་བའི་ལས་རྣམས་ལ་རབ་ཏུ་འབད་པར་བྱའོ། །ཕྱི་ནས་ཆོས་ཐམས་ཅད་ནུབ་པར་གྱུར་ནས་ལོག་པར་ལྟ་བའི་ཉི་མ་ཤར་བར་གྱུར་པ་ན་དགེ་སྦྱོང་དགེ་སྦྱོང་དུ་ཁས་འཆེས་པ་རྣམས་དང་། བྲམ་ཟེ་བྲམ་ཟེར་ཁས་འཆེས་པ་རྣམས་ཐམས་ཅད་མཁྱེན་པ་དང་། ཐམས་ཅད་མཁྱེན་པར་ཁས་འཆེས་པའི་དགེ་སྦྱོང་ངན་པ་དང་བྲམ་ཟེའི་ཆ་བྱད་ཅན་རྣམས་ཀྱིས་སྡུག་བསྔལ་བར་བྱས་པར་གྱུར་ཏ་རེ། བློ་མཆོག་རྒྱ་ཆེ་བར་གྱུར་པ་རྣམས་ཀྱི་དེ་ཁོ་ན་ཉིད་ཀྱི་རྒྱུ་མཚན་རྣམས་ནི་ཐམས་ཅད་མཁྱེན་པའི་བསྟན་པའི་མཆོག་འདི་ཡིན་ནོ་ཞེས་དེ་དག་གིས་དེ་ལྟར་སྟོན་པར་བྱེད་དོ། །དེ་བཞིན་དུ་རྒྱུ་མཚན་གྱི་སེམས་རྣམས་ནི་བར་དུ་གཅོད་པར་བྱེད་པ་ཡིན་ནོ། །བསམ་གཏན་སྒོམ་པར་གྱུར་པ་ན་འདི་དག་རྣམས་དང་གཞན་ཡང་འཇིག་རྟེན་པ་རྣམས་ཀྱིས་ནི་བར་ཆད་བྱེད་པར་འགྱུར་རོ།