།འཇིག་རྟེན་པ་དེ་དག་རྣམས་ནི་འཁོར་བར་ཀུན་ནས་འཇུག་པར་བྱེད་པ། འདོད་ཆགས་ཞེ་སྡང་གཏི་མུག་རྣམས་ཀུན་ནས་སྐྱེད་པར་བྱེད་པ་ཡིན་ནོ། །གང་ཡང་དུས་དང་། གཟའ་དང་། རྒྱུ་སྐར་དེ་དག་རྣམས་འཇིག་རྟེན་ལས་འདས་པའི་ལམ་གྱིས་བསམ་པར་བྱ་བར་བཤད་པ་དེ་དག་རྣམས་རྣལ་འབྱོར་དཔྱོད་པས་བསམས་ཤིང་བསྒོམས་ཏེ། ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་པས་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་སྟོང་ཕྲག་བརྒྱ་ལས་རྣམ་པར་གྲོལ་བའི་གོ་འཕང་འཐོབ་པར་འགྱུར་ཏེ། རྟག་ཏུ་རྒས་པ་མེད་པ་དང་། འཆི་བ་མེད་པ་དང་། ཟག་པ་མེད་པའི་མྱ་ངན་ལས་འདས་པའི་མཆོག་དེ་ལྟ་བུ་དེ་དག་རྣམས་ལ་བསླབ་པར་བྱའོ། །དགེ་སྦྱོང་རྣམས་དང་། དགེ་སྦྱོང་དུ་དམ་བཅས་པ་རྣམས་དང་། སྡུག་བསྔལ་ཟད་པར་འདོད་པ་རྣམས་ཀྱིས་འཁོར་བའི་སྡུག་བསྔལ་ཟད་པར་འགྱུར་བའི་རྒྱུ་སྐར་རྣམས་ལ་དཔྱད་པ་བསྒོམ་པར་བྱའོ། །དུས་དཔྱོད་པ་ཡང་རང་བཞིན་ཇི་ལྟ་བུ་མ་ཡིན་པའི་ཀུན་ནས་ཉོན་མོངས་པ་ཅན་གྱི་ཤེས་པ་རྣམས་དང་བདེ་བའི་མཐར་ཐུག་པར་འགྱུར་བ་མ་ཡིན་ནོ། །ཤེས་པར་འགྱུར་བ་མ་ཡིན། མྱ་ངན་ལས་འདས་པའི་མཐར་ཐུག་པར་འགྱུར་བ་ཡང་མ་ཡིན་གྱི། དགེ་སློང་དེས་བསམ་གཏན་སྒོམ་པར་གྱུར་པ་ན་རྣམ་པར་སྲེག་པར་བྱེད་པ་འབའ་ཞིག་ཏུ་གྱུར་པ་དང་། རྒྱུ་སྐར་འགྲང་བ་དང་སེམས་པར་བྱེད་པ་ན་དགེ་སློང་ལ་རྣམ་པར་གཤེ་བར་བྱེད་པར་ཡང་འགྱུར་རོ། །གཞན་ཡང་ཆོས་དྲུག་པར་གྱུར་པ་བསམ་གཏན་སྒོམ་པ་ན་བར་དུ་གཅོད་པར་བྱེད་པ་རྣམས་ནི་དགེ་སྦྱོང་དང་དགེ་སྦྱོང་དུ་ཁས་འཆེས་པ་རྣམས་ཀྱིས་བསམ་པར་ཡང་མི་བྱའོ། །འདི་ཡང་གང་ཞེ་ན། འདི་ལྟ་སྟེ། རྒྱུ་མཚན་སེམས་པ་དགེ་སྦྱོང་གིས་མི་བྱའོ། །འཇིག་རྟེན་པ་ཀུན་ནས་ཉོན་མོངས་པ་འདོད་ཆགས་དང་། ཞེ་སྡང་དང་། གཏི་མུག་རྣམས་ཀུན་དུ་གསལ་བར་བྱེད་པར་གྱུར་པ་དགེ་བའི་ཆོས་རྣམས་ཀྱི་བར་དུ་གཅོད་པར་བྱེད་པ་རྣམས་ཀུན་དུ་འཕེལ་བར་བྱེད་པ་ནི་རྒྱུ་མཚན་སེམས་པ་ལས་ཡིན་ཏེ། དེ་ལ་ས་གཡོ་བ་འབྱུང་བ་རྣམས་ཉིན་མོ་དང་། མཚན་མོར་ཡང་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་རྣམས་ནི་ཀུན་ནས་ཉོན་མོངས་པའི་ས་གཞི་ལས་ཀྱི་རྒྱུ་མཚན་ཉེ་བར་མཚོན་པར་བྱེད་དོ།