།དེ་ཉན་པ་ལ་བློ་ཞུགས་པར་གྱུར་ན་ཡང་དམ་པའི་ཆོས་འབྱུང་བར་དོན་མེད་དེ་ཕྱིར་ལོག་ནས་འགྲོའོ། །གང་བསྐལ་པ་སྟོང་ཕྲག་བརྒྱར་ཡང་རྙེད་པར་མི་འགྱུར་བ་གང་ཡིན་པ་དེ་དག་རྣམས་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་དེ་ལྟར་ཉམས་པར་བྱེད་དོ། །ཐོས་པ་ངན་པ་སྙན་དངགས་སྡེབ་པར་བྱེད་པ་ལ་ནི་གཞན་ཡང་སྐྱོན་ཆེན་པོ་ཡོད་དེ། སྐྱེས་བུ་ངན་པ་དེ་སྙན་དངགས་ཀྱི་འདོད་པ་དང་། ཐོས་པ་ངན་པ་དག་གི་བསྟོད་པས་ཀྱང་ཕྱིན་ཅི་ལོག་ཏུ་སྨྲ་བར་བྱེད་དོ། །དེ་ཀུན་དུ་སྤྱོད་པར་གྱུར་པ་རྣམས་ལ་སྟེན་པར་བྱེད་དོ། །སྨྱོན་པ་བཞིན་དུ་གནས་རྣམས་ཐམས་ཅད་ལ་རབ་ཏུ་གཡོ་བའི་བློ་དང་ལྡན་པར་འགྱུར་རོ། །ལོག་པར་རྗོད་པར་བྱེད་པ་རྣམས་ཀྱིས་བཅིངས་པར་གྱུར་པའི་བསྟོད་པ་བསྡེབས་པ་རྣམས་ལ་ནི་དོན་མེད་པ་ཡིན་ནོ། །འདུ་བྱེད་ཐམས་ཅད་ཡོངས་སུ་ཟད་པར་འགྱུར་བ་ཡིན་པའི་ཕྱིར་ཡང་འདི་ལ་དོན་མེད་པ་ཡིན་ནོ། །སྙན་དངགས་ཀྱི་རྒྱགས་པས་ཟིན་པར་གྱུར་པ་དེ་དག་རྣམས་ནི་ཧ་ཅང་ཐལ་ཆེས་པར་ཤིན་ཏུ་ཉམས་པར་གྱུར་ནས་ཆང་གི་བཏུང་བ་སྟེན་པར་བྱེད་དོ། །དེ་ལ་སྟེན་པར་གྱུར་པའི་བློ་རྣམ་པར་གཡེང་བས་ཀྱང་ཕན་ཚུན་དུ་དོན་བྱེད་དོ། །ཆང་གིས་ཀུན་ནས་གཡེངས་པར་གྱུར་པའི་བློས་དོན་ཆུང་ཟད་ཅིག་བྱེད་པར་འགྱུར་བ་ཡང་མ་ཡིན་ནོ། །སེམས་ཀྱང་རྣམ་པར་གཡེང་བར་བྱེད་པར་འགྱུར་བ་ཡིན་པའི་ཕྱིར་དང་། དོན་མ་ཡིན་པ་རྣམས་ལ་འཇུག་པ་པོ་ངན་སོང་གི་སྒོར་གྱུར་པའི་ཆང་སྟེན་པར་བྱེད་པ་ཡིན་ནོ། །དེ་ཆང་གིས་ཟིན་པས་མི་དགེ་བ་རྣམས་ཐམས་ཅད་བྱེད་དོ། །བུད་མེད་དག་མངོན་པར་མཐོང་ནས་ཚུལ་བཞིན་མ་ཡིན་པའི་ཡིད་ལ་བྱེད་པས་འཁྲིད་པར་འགྱུར་རོ། །དེ་ཉེ་བར་ཁྲིད་པར་གྱུར་ནས་དགེ་སྦྱོང་ངན་པ་མི་ཚངས་པར་སྤྱོད་པར་བྱེད་དོ། །དེ་ནི་རྒྱུད་ཚིག་པར་གྱུར་པ། ནང་རུལ་བར་གྱུར་པ། ཐོས་པ་དང་མི་ལྡན་པ། སྲེད་པའི་རིགས་སུ་གྱུར་པ། བི་དུ་ལའི་མེ་ཏོག་བཞིན་དུ་འབྲས་བུ་མེད་པའོ། །བྲིས་པའི་མར་མེ་བཞིན་དུ་འོད་མེད་པ་བྲིས་པའི་ཟླ་བ་བཞིན་དུ་གྱུར་པ། གྲང་བ་བཞིན་དུ་རྣམ་པར་སྨད་པར་བྱ་བ་དེ་ནི་དེ་དག་རྣམས་ཁོ་ན་བཞིན་དུ་གྱུར་པས་འདི་ནི་གོས་ཀྱིས་གཡོགས་པ་ཙམ་འབའ་ཞིག་ཡིན་ནོ། །དགེ་སྦྱོང་གི་གཟུགས་དགེ་སྦྱོང་མ་ཡིན་ནོ། །ཐོས་པ་ངན་པ་སྙན་དངགས་བསྡེབས་པར་གྱུར་པའི་སྐྱོན་གྱི་རྩ་བ་དེ་ལས་ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བར་སྐྱེའོ།