།གཞན་ཡང་ལས་རྣམ་པར་བཀྲ་བ་རྣམས་ལ་འདི་ལྟ་སྟེ། ལྕེའི་རྣམ་པར་ཤེས་པས་རོ་ཡིད་དུ་འོང་བས་ཡིད་དུ་འོང་བར་འགྱུར་བའི་རོ་རྣམས་མྱངས་པར་གྱུར་ན་ཡང་དགའ་བར་མི་བྱེད་དོ། །ཁྲོ་བར་མི་བྱེད་དོ། །འཆིང་བར་མི་འགྱུར་རོ། །ཚུལ་བཞིན་དུ་ཡིད་ལ་བྱེད་པ་དང་ལྡན་པས་རོ་དེ་ཉིད་རྣམ་པར་འབྱེད་པར་བྱེད་པ་སྟེ། ཇི་ལྟར་རོ་འདི་དག་རྣམས་ནི་བྱུང་ནས་ཀྱང་མེད་པར་འགྱུར་རོ། །ལག་པའི་མཐིལ་གྱིས་བཅུག་པར་གྱུར་པའི་ཟས་འདི་དག་རྣམས་ནི་ལྕེ་ལ་འབབས་སོ། །དེ་རྣམས་ལ་མངར་མྱོས་ཞེས་བྱ་བའི་སྲིན་རྣམས་ཀྱིས་ཀྱང་རེག་ནས་ལྷན་ཅིག་ཏུ་མྱོང་བར་བྱེད་པ་ཉིད་ན་གླད་པ་ལས་སྣབས་ཞེས་བྱ་བའི་བློ་འབྱུང་བའི་གླད་པ་རྣམས་རབ་ཏུ་ཟགས་ནས། སྣའི་སྦུབས་ནང་ན་མར་རབ་ཏུ་འབབས་པར་འགྱུར་ལ། རབ་ཏུ་ཟགས་པའི་རྣག་གི་ཐིགས་པ་དེ་དག་རྣམས་དང་ལྷན་ཅིག་ཏུ་ལྕེས་གཡུགས་ཤིང་། འགྲམ་སོའི་རང་ཐག་གི་དབུས་སུ་ཕྱེ་མར་བཏགས་པ་རྣམས་ལྕེས་མྱོང་བར་བྱེད་པ་གང་གིས་བྱིས་པ་འདི་དག་རྣམས་འཆིང་བར་བྱེད་པ་ཡིན་ནོ། །རོ་དེ་དག་རྣམས་ཉིད་ཡང་དག་པ་ཇི་ལྟ་བ་བཞིན་དུ་འདིས་སེམས་པར་བྱེད་དོ། །དེས་ཚུལ་བཞིན་ཡིད་ལ་བྱེད་པས་རྣམ་པར་འབྱེད་པར་ཡང་བྱེད་དོ། །འདི་ནི་དཀར་པོའི་ཁ་དོག་རྣམས་དང་ཡང་དག་པར་ལྡན་པས་ལྷ་དང་མི་རྣམས་སུ་མཆོག་ཏུ་སྐྱིད་པར་འགྱུར་རོ། །དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་དེ་ལྟར་ལས་རྣམ་པ་སྣ་ཚོགས་པ་རྣམས་ཀྱིས་འཇིག་རྟེན་འདི་རྣམ་པར་བཀྲ་བར་བྱས་པ་དེ་དག་རྣམས་མི་རིག་པར་བསམ་གཏན་བསམ་པར་བྱེད་པ་ན་བར་དུ་གཅོད་པའི་རི་མོ་བཀྲ་བ་གཞན་དག་རྣམས་ཉིད་བྱེད་པ་ཡིན་ནོ། །གཞན་ཡང་ལྕེ་ལ་བབས་པར་གྱུར་པའི་རོ་དེ་དག་ཉིད་ལ་སྲིན་མངར་མྱོས་ཀྱིས་རེག་པར་གྱུར་པ་རྣམས་ལ་མྱོང་བར་བྱེད་པ་ན་བློ་གྲོས་དམན་པའི་ཕྱིར་ན། ཀྱེ་མ་ཟས་འདི་དག་ནི་ཤིན་ཏུ་དགའ་བར་གྱུར་པ། མཆོག་ཏུ་བསོད་པ། མཆོག་ཏུ་མཛེས་པ། མཆོག་ཏུ་རྒྱ་ཆེ་བའི་མདོག་དང་། རོ་དང་། དྲི་དང་ལྡན་པར་གྱུར་པ། མཆོག་ཏུ་གཙང་བར་གྱུར་པ་ཞེས་ཟས་དེའི་རྒྱགས་པས་རྒྱགས་ནས། ལུས་དང་། ངག་དང་། ཡིད་ཀྱིས་ཉེས་པར་སྤྱད་པ་རྣམས་སྤྱོད་པ་འདི་དག་རྣམས་ནི་ཚོན་ནག་པོས་རྣམ་པ་སྣ་ཚོགས་པར་བྱས་ནས་དུད་འགྲོར་སྐྱེ་བར་འགྱུར་རོ། །ཚུལ་བཞིན་མ་ཡིན་པ་ཡིད་ལ་བྱེད་པར་ཀུན་ནས་འཁྲིད་པར་བྱེད་དོ།