།དེ་བཞིན་དུ་མིག་གིས་རྣམ་པར་ཤེས་པར་བྱ་བའི་ཡུལ་རྣམས་ལ་གང་གི་ཚེ་འདི་ཆགས་པར་གྱུར་ནས་ཡང་དག་པ་ཇི་ལྟ་བ་ཡིན་པར་གོ་བར་བྱེད་པར་གྱུར་པ་དེའི་ཚེ་ནག་པོའི་ལས་རྣམས་བྱེད་པར་འགྱུར་རོ། །དེས་ནག་པོའི་ལས་རྣམས་མ་རྟོགས་པར་བློ་དམན་པ་དེ་ཚོན་རྣམས་ཀྱིས་རྣམ་པར་བཀྲ་བར་བྱེད་དོ། །དེའི་ཕྱིར་ན་བསམ་གཏན་ལ་སྙོམས་པར་འཇུག་པ་ན་རྣམ་པར་སྲེག་པར་འགྱུར་བའི་ལས་རྣམས་མི་བྱའོ། །བྱས་པར་གྱུར་པ་རྣམས་ཀྱང་དགེ་སྦྱོང་གིས་ཡིད་ལ་མི་བྱའོ། །གང་དག་ཅེ་ན། འདི་ལྟ་སྟེ། རྣ་བས་རྣམ་པར་ཤེས་པར་བྱ་བའི་སྒྲ་ཡིད་དུ་འོང་བ་རྣམས་ཡང་སྟེ། དེ་ལ་ཡིད་དུ་འོང་བ་རྣམས་ལ་གང་གི་ཚེ་ཆགས་པར་གྱུར་པ་ན་ཡང་དག་པ་ཇི་ལྟ་བ་བཞིན་ཀུན་ནས་ལྟ་བར་བྱེད་དེ། ཇི་ལྟར་སྒྲ་འདི་དག་རྣམས་ནི་མི་བརྟན་པ། མི་རྟག་པ། རབ་ཏུ་རྣམ་པར་ཉམས་པར་འགྱུར་བའི་ཆོས་ཅན་ནོ་ཞེས་དེ་ལྟར་རྣམ་པར་ཤེས་པ་ཆགས་པར་མི་བྱེད་དོ། །ཀུན་ཏུ་སྤྲོ་བར་མི་བྱེད་དོ། །རབ་ཏུ་རྟོག་པར་མི་བྱེད་དོ། །དེའི་ཚེ་འདིས་དཀར་པོའི་མཐའ་རྣམས་བྱས་པར་གྱུར་པ་ཡིན་ནོ། །མཆོག་ཏུ་རྒྱ་ཆེ་བའི་ཚོན་དེས་ཀྱང་ལྷ་དང་མི་རྣམས་སུ་སྐྱེ་བར་འགྱུར་བར་མཆོག་ཏུ་རྣམ་པར་བཀྲ་བར་བྱས་པར་གྱུར་པ་ཡིན་ནོ། །དེ་ལ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་སྒྲ་རྣམ་པར་བཀྲ་བ་དེ་ལ་དཔྱོད་པར་མི་བྱེད་པ་ནས་ཇི་སྲིད་དུ་རི་མོའི་ལས་གཞན་རྣམས་བྱེད་པས་བསམ་གཏན་ལ་སྙོམས་པར་ཞུགས་པ་ན་རབ་ཏུ་སྲེག་པར་འགྱུར་རོ། །གཞན་ཡང་སྒྲ་དེ་ཉིད་ཐོས་པར་གྱུར་ནས་སྨན་པ་བློ་རབ་ཏུ་དམན་པ་ཐོས་པ་དང་མི་ལྡན་པ། བྱིས་པ་སོ་སོའི་སྐྱེ་བོ་དེ་ལྟར་རབ་ཏུ་འཇུག་པར་བྱེད་དོ་ཇི་ལྟར་ཡིད་དུ་འོང་བའི་སྒྲ་ཚིམ་པ་སྐྱེད་པར་བྱེད་པ། ཡིད་འཕྲོག་པར་གྱུར་པ་དེ་ཉིད་ཀྱི་དེ་ཚུལ་བཞིན་མ་ཡིན་པ་ཡིད་ལ་བྱེད་པས་རབ་ཏུ་རྟོག་པར་བྱེད་དོ། །འདུན་པ་སྐྱེད་པར་བྱེད་དོ། །དེ་ལ་ཆགས་པ་དང་ལྡན་པ་འགྱུར་རོ། །དེ་དག་ནི་ནག་པོའི་ཚོན་དང་ལྡན་པས་སེམས་རི་མོ་མཁན་གྱིས་དམྱལ་བ་དང་། ཡི་དགས་དང་། དུད་འགྲོ་རྣམས་ཉེ་བར་བྲིས་པ་ཡིན་ནོ། །དགེ་སྦྱོང་ངན་པ་འདི་ལས་རྣམ་པར་བཀྲ་བ་དེ་དག་བཏང་ནས་གཞན་དག་ཉིད་དུ་རི་མོ་བཀྲ་བར་བྱེད་དོ། །བསམ་གཏན་ལ་སྙོམས་པར་འཇུག་པ་ན་རྣམ་པར་སྲེག་པར་འགྱུར་རོ།