།གང་དག་བར་མའི་རིགས་སུ་སྐྱེས་པ་དེ་དག་ནི་དམར་པོའི་ཚོན་གྱིས་མངོན་པར་བྲིས་སོ། །གང་དག་ཉུང་བར་གྱུར་པ་དེ་དག་ནི་ནག་པོའི་ལས་རྣམས་ཀྱི་ཚོན་གྱིས་སེམས་རི་མོ་མཁན་གྱིས་མངོན་པར་བྲིས་སོ། །གང་ཡང་རྒྱལ་པོའམ་རྒྱལ་པོའི་བློན་པོ་ལེགས་པར་བྱས་པའི་ལས་རྣམས་འདས་ནས་མདུན་དུ་མི་དགེ་བ་མང་པོ་རྣམས་བྱེད་པར་གྱུར་པ་དེ་དག་རྣམས་ཀྱི་དཀར་པོའི་མདོག་འདི་དག་རྣམས་ནི་ཉམས་ནས་ཀྱང་ནག་པོ་ཉེ་བར་འཕེལ་བར་འགྱུར་རོ། །གང་ཡང་དབུལ་པོར་གྱུར་པ་རིགས་ཤིན་ཏུ་དམན་པར་སྐྱེས་པ་དེའི་ཁ་དོག་ནག་པོའི་ལས་བྱས་པ་རྣམས་ནི་ནུབ་པར་གྱུར་ནས་ཀྱང་དཀར་པོའི་མདོག་རྣམས་ཀྱང་རབ་ཏུ་འབྱུང་བར་འགྱུར་རོ། །གང་ཡང་བར་མའི་རིགས་སུ་གྱུར་པ་གཟུགས་ཕུན་སུམ་ཚོགས་པ་དང་། ལས་ཀྱང་བར་མ་རྣམས་བྱེད་པར་གྱུར་པ་དེ་དག་རྣམས་ནི་སེམས་རི་མོ་མཁན་གྱིས་དཀར་པོ་དང་དམར་པོ་དག་གིས་བཀྲ་བར་བྱས་སོ། །དེ་ལྟར་ཚོན་དུ་མ་རྣམས་ཀྱིས་མིའི་འཇིག་རྟེན་མཆོག་ཏུ་བཀྲ་བར་གྱུར་པས་མཆོག་ཏུ་བཀྲ་བར་མངོན་པར་བྲིས་སོ། །གཞན་ཡང་འགྲོ་བ་གཞན་ལ་རྣམ་པར་བལྟ་བར་བྱ་སྟེ། གང་དག་ཅེ་ན། འདི་ལྟ་སྟེ་དམྱལ་བའི་འོ་དམྱལ་བ་རྣམས་ཡང་སེམས་རི་མོ་མཁན་གྱིས་གཉིས་ཀྱིས་མངོན་པར་བྲིས་པར་གྱུར་པ་ལ་འདི་ལྟ་སྟེ། སེར་པོ་དང་ནག་པོས་ཀྱང་ངོ་། །དེ་ལ་ཇི་ལྟར་སེར་པོས་ཡིན་ན་འདི་ལྟ་སྟེ། ཞེ་སྡང་ངོ་། །ཚོན་ནག་པོས་ཡང་འདི་ལྟ་སྟེ། ཕྲག་དོག་གོ། །དམན་པ་དང་བར་མར་གྱུར་པའི་དམྱལ་བར་སྐྱེས་པ་རྣམས་ནི་མདོག་གཉིས་ཉིད་ཁོ་ནས་རྣམ་པར་བཀྲ་བར་བྱས་པར་གྱུར་པ་འདི་ལྟ་སྟེ། སྔོན་པོ་དང་ནག་པོ་དག་གིས་སོ། །དེ་ལྟར་དམྱལ་བ་རྣམས་ཚོན་རྣམས་ཀྱིས་རྣམ་པར་བཀྲ་བར་བྱས་པ་ངེས་པར་རྟོགས་པར་གྱུར་པ་དང་། ཡང་འགྲོ་བ་གཞན་ལ་རྣམ་པར་བལྟ་བར་བྱ་སྟེ། གང་ཞེ་ན། འདི་ལྟ་སྟེ། ཡི་དགས་རྣམས་སོ། །ཡི་དགས་རྣམས་ཀྱང་མཆོག་ཏུ་སྡུག་བསྔལ་བར་གྱུར་པ་སྟེ། ཕྲག་དོག་དང་སེར་སྣ་དག་གིས་རྣམ་པར་བཀྲ་བར་གྱུར་པའོ། །དེ་དག་རྣམས་ནི་ནག་པོའི་ཚོན་རྣམས་ཉིད་ཀྱིས་ཀྱང་རྣམ་པར་བཀྲ་བར་བྱས་ཏེ། ཁ་དོག་ནག་པོར་གྱུར་པའི་མུན་པ་རྣམས་ན་རྒྱུ་ཞིང་སྤྱོད་པར་འགྱུར་རོ། །བཀྲེས་པ་དང་སྐོམ་པས་བསྲེགས་པའི་ཡི་དགས་རྣམས་ནི་ལས་ནག་པོ་དང་ནག་པོའི་ལུས་དེ་དག་ཐམས་ཅད་ཉིད་ཀྱང་ལས་གཅིག་གི་ཚོན་གྱིས་རྣམ་པར་བཀྲ་བར་བྱས་པའོ།