གཞན་དུ་ན་དེ་དག་རྣམས་ཀྱི་ངག་གི་ངལ་བ་འབྲས་བུ་དང་བཅས་པ་ནི་གང་འཕགས་པའི་བདེན་པ་བཞིའོ། །འཕགས་པའི་བདེན་པ་བཞི་པོ་རྣམས་ཀྱི་གཏམ་ཡང་རྗོད་པར་བྱེད་དོ། །དེ་དག་རྣམས་ཀྱི་ལུས་ངལ་བ་དོན་ཡོད་པ་ནི་གང་སངས་རྒྱས་དང་། ཆོས་དང་། དགེ་འདུན་རྣམས་ལ་ཐལ་མོ་སྦྱོར་བའི་ལས་ཀྱིས་རབ་ཏུ་བཏུད་དེ་ལུས་ཀྱིས་ཀྱང་སྐྱོ་བ་སྐྱེའོ། །དེ་དག་རྣམས་བདག་ཉིད་ངལ་བའི་ཡིད་ཀྱི་ངལ་བ་འབྲས་བུ་དང་བཅས་པར་གྱུར་པ་ནི་རང་གི་མཚན་ཉིད་དང་། སེམས་ཀྱི་སྤྱིའི་མཚན་ཉིད་རྣམས་ལ་ཡིད་འབྱུང་བར་བྱེད་པའོ། །དེ་དག་རྣམས་ཀྱི་ཡོངས་སུ་ངལ་བ་འབྲས་བུ་དང་བཅས་པ་རྣམ་པ་གསུམ་པོ་རྣམས་ཀྱིས་ཇི་ལྟར་ན་མྱ་ངན་ལས་འདས་པ་དང་ཉེ་བར་འཇུག་པ་ཡིན་ཞེ་ན། གང་དག་ཡོངས་སུ་གོམས་པར་བྱེད་པའི་ཐབས་ཐམས་ཅད་ཀྱིས་ཚོགས་པ་འདུས་པ་ལ་དགའ་བར་མི་བྱེད་ཅིང་སྡིག་པའི་གྲོགས་པོ་རྣམས་སྟེན་པར་མི་བྱེད་པ། ཡིད་ལེགས་པར་སྡོམ་པར་བྱེད་པ་དང་། ཡིད་ཤིན་ཏུ་བར་ཡང་མཉམ་པར་གཞག་པར་ཡང་གསུམ་གྱིས་ཏེ། འདི་དག་རྣམས་ཀྱིས་ནི་ཇི་ལྟ་བ་བཞིན་དུ་མྱ་ངན་ལས་འདའི། གསུམ་པོ་རྣམས་གང་ཞེ་ན། འདི་ལྟ་སྟེ། དབུགས་རྔུབ་པ་དང་། འབྱུང་བ་དྲན་པ་དང་། མི་སྡུག་པ་དང་། ཁམས་ཀྱི་རབ་ཏུ་དབྱེ་བའོ། །དེ་ལ་ཐམས་ཅད་ཉིད་ཀྱང་ལམ་དེ་དག་རྣམས་ལས་སེམས་མཉམ་པར་བཞག་པར་འགྱུར་རོ། །སེམས་མཉམ་པར་བཞག་པ་མ་ཡིན་པ་རྣམས་དང་། སེམས་མཉམ་པར་འཇོག་པར་མི་བྱེད་པ་ཡང་ཚོགས་པ་འདུས་པ་སྟེ། ལམ་གསུམ་སུན་འདོན་པར་བྱེད་པ་ཡང་ཡིན་ནོ། །དམྱལ་བ་དང་། ཡི་དགས་དང་། དུད་འགྲོ་རྣམས་སུ་འགྲོ་བར་བྱེད་པའི་ཞགས་པར་གྱུར་པ་ཐབས་མ་ཡིན་པས་ཀུན་ནས་བཅིངས་ནས་སྐྱེས་བུ་དམྱལ་བ་རྣམས་སུ་རྒྱུག་པར་བྱེད་དོ། །ཡི་དགས་དང་། དུད་འགྲོའི་འགྲོ་བ་ཡང་སྟེ། དེ་དག་རྣམས་ནི་ཚོགས་པ་འདུས་པ་ལ་དགའ་བས་བསླུས་པ་ཡིན་ནོ། །དེའི་ཕྱིར་ཚོགས་པ་འདུས་པ་ནི་དུག་དང་། མཚོན་ཆ་དང་། མེ་དང་། གཅན་གཟན་ཁྲོ་བོ་དང་། གཡང་ས་རྣམས་བཞིན་དུ་བློ་དང་ལྡན་པའི་དགེ་སློང་བསམ་གཏན་ལ་སྙོམས་པར་འཇུག་པ་རྣམས་ཀྱིས་རྟག་ཏུ་ཡོངས་སུ་སྤང་བར་བྱའོ།