།དེ་ལུས་ཞིག་པར་གྱུར་པ་ན་ངན་སོང་ལོག་པར་ལྟུང་བར་ལྷུང་ནས་དམྱལ་བར་སྐྱེའོ། །གཞན་ཡང་ཚོགས་པ་འདུས་པ་ལ་སྐྱོན་ཆེན་པོ་རྣམས་ཡོད་དེ། ཚོགས་པ་འདུས་པ་ལ་མངོན་པར་དགའ་བའི་དགེ་སློང་ངན་པ་ཚུལ་ཁྲིམས་འཆལ་བ་རྟག་ཏུ་ཚོགས་པ་འདུས་པ་ལ་མངོན་པར་དགའ་བའི་སྒྲ་རྣམས་ཉན་པར་བྱེད་པ་ནི་རྒོད་པར་འགྱུར་རོ། །མ་བསྡམས་པ་བློ་རབ་ཏུ་མ་ཞི་བ་དེའི་བློ་ལ་ལྟོས་ནས་སྦྱིན་བདག་དང་སྦྱིན་པ་པོ་རྣམས་དབང་ཆེ་བར་འགྱུར་ཏེ། རྙེད་པ་དང་བཀུར་སྟིས་ཟིལ་གྱིས་མནན་པར་གྱུར་པའི་ཕྱིར་རོ། །གཞན་ཡང་རབ་ཏུ་བྱུང་བས་གཞན་དག་རྣམས་ཁ་དྲག་པའི་སྐྱོན་ཡོད་དོ། །གཞན་ཡང་ཚོགས་པ་འདུས་པའི་སྐྱོན་རྣམས་གང་ཞེ་ན། འདི་ལྟ་སྟེ། བདག་ཉིད་རང་ཤིན་ཏུ་ཚོགས་པ་འདུས་པ་པོ་ཡིན་པས་རབ་ཏུ་བྱུང་བ་གཞན་དག་རྣམས་ཀྱང་ཚོགས་པ་འདུས་པ་དེ་ལ་དགའ་བ་ཁོ་ནར་བྱེད་དོ། །དམ་པའི་ཆོས་ལས་ཡོངས་སུ་ཉམས་པར་བྱེད་དོ། །དེ་ལ་འདིས་བདག་ཉིད་རང་ཆུད་གཟན་ནས་གཞན་རྣམས་ཡང་ཆུད་གཟོན་པར་བྱེད་དོ། །བདག་ཉིད་རང་ཡོངས་སུ་ཉམས་པར་འགྱུར་བའི་བསམ་པ་ལ་སྦྱོར་རོ། །རྣམ་པ་དེ་ལྟ་བུའི་སེམས་ཅན་དེ་ནི་དགེ་འདུན་ཐམས་ཅད་ཀྱིས་སྤང་བར་བྱ་སྟེ། འདིས་ནི་དགེ་སློང་ཚུལ་ཁྲིམས་དང་ལྡན་པ་རྣམས་ཀྱང་ཆུད་གཟོན་པར་བྱེད་དོ། །ཚུལ་ཁྲིམས་ཅན་གྱིས་འདི་ཡོངས་སུ་སྤང་བར་བྱ་སྟེ། སྡིག་པའི་གྲོགས་པོའི་རང་བཞིན་ཅན་འདི་ནི་ཚངས་པ་མཚུངས་པར་སྤྱོད་པ་ཐམས་ཅད་ཀྱིས་རྣམ་པར་སྨད་པ་ཡིན་ནོ། །གཞན་ཡང་ཚོགས་པ་འདུས་པའི་སྐྱོན་རྣམས་ནི་གང་གི་ཕྱིར་ཚོགས་པ་འདུས་པ་རྣམས་ནི་རྣམ་པ་སྣ་ཚོགས་པ་ཡིན་ནོ། །གང་གི་ཕྱིར་ཚོགས་པ་འདུས་པ་རྣམས་ནི་སྒྲ་སྣ་ཚོགས་པ་ཡིན་ནོ། །རྣམ་པར་བཀྲ་བ་སྣ་ཚོགས་པའི་སྒྲ་རྣམས་ཀྱིས་སེམས་དགའ་བར་བྱེད་པ་ཡང་ཡིན་ཏེ། སྒྲ་ལ་ཤིན་ཏུ་ཆགས་པས་དེ་དག་ལ་ཡིད་བརྟན་པར་གྱུར་ནས་ཆེས་རབ་ཏུ་གཡོ་བར་གྱུར་པའི་ཡིད་ཀྱིས་དགའ་བ་མངོན་པར་རྫོགས་པར་བྱེད་དོ། །ཆགས་པར་གྱུར་པའི་བློ་དད་པ་མེད་པ་དེ་ནི་དོན་གང་ལ་ཡང་དད་པར་མི་འགྱུར་རོ། །གང་དག་ཆོས་མ་ཡིན་པའི་ཆོས་རྣམས་ལ་འཇུག་པར་བྱེད་དོ། །དེ་དེ་ལ་ཡང་དད་པར་མི་བྱེད་དོ། །དེ་བདེ་བས་རྐྱེན་དང་བཅས་པའི་ལོག་པར་ལྟུང་བ་ཀུན་ཏུ་སྤྱོད་པར་བྱེད་པ་ཡིན་ནོ།