གནས་སྐབས་ཐམས་ཅད་དུ་ཡང་རབ་ཏུ་ཉམས་པར་འགྱུར་རོ། །གལ་ཏེ་ཤེད་ན་ཡང་ཆུང་ངུར་འགྱུར་རོ། །འདི་ནི་དེའི་དགེ་བའི་ཆོས་ཀྱི་གཟི་བརྗིད་ཡིན་ཏེ་འདི་ལྟ་སྟེ། དྲན་པས་རྗེས་སུ་སྦྲེལ་བའི་རྩ་བ་ཡིན་ནོ། །དགེ་བའི་ཆོས་རྣམས་ཐམས་ཅད་ནི་དེའི་གཞིས་རབ་ཏུ་འཇུག་གོ། །དེ་ལྟ་བུ་ནི་ད་ལྟར་བྱུང་བའི་དྲན་པ་ཡིན་ནོ། །ཇི་ལྟར་ན་མ་འོངས་པའི་ཡུལ་ཉམས་སུ་མ་མྱོང་བ་རྒྱུ་མཚན་གྱི་དབང་དུ་བྱས་པས་ཡུལ་ཉེ་བར་དམིགས་པའི་དྲན་པ་ཡིན་ཞེ་ན། དྲན་པས་མ་འོངས་པ་རྣམས་ལ་ཡང་ལེགས་པར་དྲན་ཏེ། འབྲས་བུའི་རྒྱུ་མཚན་དམིགས་པས་མ་འོངས་པ་རྣམས་ཡང་དྲན་ཞིང་ཀུན་ཏུ་དྲན་ནོ། །འདི་ལྟ་སྟེ། ལུས་དང་། ངག་དང་། ཡིད་ལེགས་པར་སྤྱད་པ་སྤྱོད་པའི་སྐྱེས་བུ་རྣམས་མངོན་པར་མཐོང་བར་གྱུར་ནས་ལྷ་དང་ལྷ་ཙམ་དུ་འབྱུང་བར་འགྱུར་རོ་ཞེས་འདི་དག་དྲན་ནོ། །དེ་ལྟར་དམ་པར་བྱས་པའི་ལས་རྣམས་མངོན་པར་མཐོང་ནས་ལེགས་པར་དྲན་ནོ། །ཉེས་པར་སྤྱད་པའི་ལས་ཀྱི་མཐའ་སྤྱད་པ་རྣམས་ལས་དམྱལ་བ་རྣམས་འབྱུང་བ་ཡང་ཀུན་ཏུ་དྲན་ནོ། །དེ་ལ་དྲན་པ་ཞེས་བྱ་བའི་ཆོས་ལྔ་པ་འདི་དེ་ལྟར་ལྷ་དང་མི་རྣམས་ལ་གཅེས་པར་གྱུར་པ་ཡིན་ནོ། །གཞན་ཡང་ཆོས་དྲུག་པ་ལྷ་དང་མི་རྣམས་ལ་གཅེས་པར་བྱ་བ་ཡོད་དེ། གང་ཞེ་ན་འདི་ལྟ་སྟེ། གཞན་ལ་གདུང་བར་མི་བྱེད་པའོ། །འདི་ན་ལ་ལ་ཉེ་བར་གདུང་བར་མི་བྱེད་པར་གྱུར་པ་བློ་ཤིན་ཏུ་རབ་ཏུ་དང་བ། གང་ཟག་རྣམས་ལ་རབ་ཏུ་དཔྱོད་པར་ཡང་མི་བྱེད་ལ་ཚངས་པར་སྤྱོད་པ་རྣམས་ལ་རབ་ཏུ་དཔྱོད་པར་ཡང་མི་བྱེད་པ་དང་། སེམས་འདུལ་བར་མི་བྱེད་པ་མ་ཡིན་པ་གནས་མལ་དང་། ནད་ཀྱི་རྐྱེན་སྨན་དང་། ཡོ་བྱད་རབ་ཏུ་མང་པོ་མངོན་པར་མཐོང་བ་ན་གཞན་ལ་སྨོད་པར་མི་བྱེད། བདག་ལ་སྟོད་པར་མི་བྱེད་དོ། །རང་གི་དབང་དུ་བྱས་པའི་ཚུལ་ཁྲིམས་བསྔགས་པར་མི་བྱེད་ཅིང་། གཞན་གྱི་ཚུལ་ཁྲིམས་ཀྱང་དགེ་བ་མ་ཡིན་པར་ཐོས་ནས་སྦྱིན་པ་པོ་དང་སྦྱིན་བདག་རྣམས་ལ་སོ་སོར་གོ་བར་མི་བྱེད། གྲོགས་པོ་དང་གྲོགས་པོ་མ་ཡིན་པ་རྣམས་དང་བྲལ་བས་མཚུངས་པའི་བློར་གྱུར་པ། དེའི་ཡིད་དཀོན་མཆོག་གསུམ་ལ་སོང་བར་གྱུར་པའི་དོན་གྱིས་ཚུལ་ཁྲིམས་འཆལ་བར་མི་བྱེད། ཚུལ་ཁྲིམས་དང་བཅས་པ་ལ་སྐུར་པར་མི་བྱེད་དོ། །ཞབས་འབྲིང་བར་ཀུན་ཏུ་སྟོན་པ་མ་ཡིན་གྱི་སྙིང་རྗེས་སེམས་འཇུག་པར་འགྱུར་རོ།