།འཇིག་རྟེན་གཉིས་ལ་ཕན་པར་འགྱུར་བའི་དོན་དུ་ཡང་མངོན་པར་མཐོང་ནས་རྟོག་མི་བཞིན་དུ་བློས་རྣམ་པར་དཔྱོད་པར་བྱེད་དོ། །དེ་ལྟར་དེ་ནི་སྙིང་པོ་རབ་ཏུ་རྣམ་པར་དཔྱོད་པའི་བློ་ཡིན་ནོ། །དགེ་བའི་ལས་ཀྱི་འབྲས་བུའི་སྙིང་པོ་དེ་དག་གཞན་ལས་ཐོས་པའམ། དེ་གལ་ཏེ་ཤེས་ན་རང་ཉིད་ཀྱིས་ཀྱང་རབ་ཏུ་རྣམ་པར་དཔྱད་ནས་དེ་ཁོ་ན་ཉིད་ལ་མངོན་པར་འཇུག་གོ། །དེ་ལྟ་བུ་ནི་དེ་ཁོ་ན་ཉིད་ལ་མངོན་པར་འཇུག་པ་ལ་སྤྱོད་པ་ཡིན་ནོ། །བློ་གྲོས་བརྟན་པ་རྣམས་ནི་འདིར་མང་དུ་ཐོས་པར་གྱུར་ནས་སྙིང་པོ་མེད་པས་མི་ཁྲིད་དོ། །དེ་ལྟར་ན་བློ་གྲོས་བརྟན་པ་ཡིན་ནོ། །འདི་ན་ཡོན་ཏན་དེ་དག་དང་མཚུངས་པའི་བདག་ཉིད་ཅན་གཞན་རྣམས་ལ་ཡང་སྟེན་པར་བྱེད་ལ། གཞན་དག་རྣམས་ཀྱི་ཆོས་སུ་གྱུར་པ་ཆོས་ལྟར་འཆོས་པས་ཁྲིད་པར་མི་བྱེད་དོ། །དེ་ལྟར་ཡོན་ཏན་བདུན་དང་ལྡན་པའི་གྲོགས་པོ་སྟེན་པའི་སྐྱེས་བུ་རྣམས་ནི་བདག་ཅག་གི་འཇིག་རྟེན་ལས་ཤི་འཕོས་ནས་ལྷའི་འཇིག་རྟེན་དག་ཏུ་སྐྱེ་བར་འགྱུར་རོ། །ཆོས་འདི་དག་ནི་དང་པོར་བསྟེན་པ་ཡིན་ནོ། །ཡང་ལྷ་དག་ཆོས་གཞན་བདུན་པོ་གང་དག་གིས་ལྷའི་འཇིག་རྟེན་རྣམས་འཕེལ་བར་བྱེད་པ་ཡིན་ཞེ་ན། འདི་ལྟ་སྟེ། དགེ་བའི་བཤེས་གཉེན་སྟེན་པ་དང་། ཐོས་པ་དང་ལྡན་པར་གྱུར་པ་དང་། སྒྲུབ་པ་དང་ལྡན་པར་གྱུར་པ་དང་། ལེ་ལོ་མེད་པར་གྱུར་པ་དང་། དྲན་པ་དང་ལྡན་པ་དང་། གཞན་ལ་གདུང་བར་མི་བྱེད་པ་དང་། ཚུལ་འཆོས་པ་མེད་པ་དང་སྟེ། ཇི་ལྟར་བསྟན་པའི་ཆོས་བདུན་པོ་དེ་དག་རྣམས་ཀྱིས་སྐྱེས་བུ་ལུས་ཞིག་པ་ན་བདེ་འགྲོ་མཐོ་རིས་ཀྱི་འཇིག་རྟེན་ལས་ལྷ་རྣམས་ཀྱི་ནང་དུ་སྐྱེའོ། །འདི་ལྟ་སྟེ། ཤིང་རྟ་ཆེན་པོ་བདུན་དང་ལྡན་པས་ནི་རྒྱལ་པོའམ། རྒྱལ་པོའི་བློན་པོ་ཡང་རུང་སྟེ་བདེ་བས་སྐྱེད་མོས་ཚལ་གྱི་ལྟད་མོ་ལ། གླུ་དང་། རྔ་སྒྲ་དང་། ཕྲེང་བ་དང་བཅས་པས་ཇི་ལྟ་བ་བཞིན་འགྲོ་བར་བྱེད་དོ། །དེ་བཞིན་དུ་ཆོས་བདུན་པོ་དེ་དག་དང་ཡང་དག་པར་ལྡན་པའི་སྐྱེས་བུ་རྣམས་ནི་ལྷའི་འཇིག་རྟེན་དུ་འགྲོ་བར་འགྱུར་རོ། །རྣམ་པ་དེ་ལྟ་བུར་གྱུར་པའི་ཐོས་པ་དེ་ཡང་གང་ཡིན་ཞེ་ན། འདི་ན་ཐོས་པ་དང་ལྡན་པར་གྱུར་པའི་མི་ནི་གང་སྙིང་པོར་གྱུར་པ་ཉན་པའོ། །དེ་དག་ཐོས་ནས་ཀྱང་རྒོད་བག་དང་ལྡན་པར་མི་འགྱུར་རོ། །