།དེའི་དགེ་སློང་འདིའི་གང་དག་གསོན་པའི་རྒྱགས་པར་གྱུར་པ་གཅིག་ཏུ་ཆགས་པར་བྱེད་པའི་ལོག་པར་ཡོངས་སུ་ཞེན་པས་བྱས་པ་དེ་བསྙུངས་པར་གྱུར་པའམ། རྣམ་པ་ཐམས་ཅད་དུ་ཡང་མེད་པར་འགྱུར་རོ། །དྲན་པ་རྣམས་ཀྱི་ནང་ན་མཆོག་ནི་འདི་ཡིན་ཏེ། འདི་ལྟར་འཆི་འཕོ་དང་སྐྱེ་བ་དྲན་པའོ། །དེའི་ཕྱིར་མྱ་ངན་ལས་འདས་པའི་གྲོང་ཁྱེར་དུ་འཇུག་པར་འདོད་པ་རྣམས་ཀྱིས་འདི་བསྟེན་པར་བྱའོ། །ཡིད་ལ་བྱའོ། །རྒྱུ་གང་གིས་སེམས་ཅན་འདི་དག་རྣམས་དྲིན་མེད་པར་འགྱུར་བ་ནི་རྟག་པའི་གོ་འཕང་ཚོལ་བར་བྱེད་པ་དོན་མེད་དོ། །གང་གི་ཕྱིར་སྲེད་པའི་ཞགས་པས་ཀུན་ཏུ་བཅིངས་ནས་འཁོར་བ་ན་ཡོངས་སུ་འཁྱམ་པ་རྣམས་ཀྱིས་རྟག་པའི་གོ་འཕང་འཐོབ་པར་འགྱུར་རམ། དེ་ནས་དེའི་ཚེ་ཚིགས་སུ་བཅད་པ་གསུངས་པ། ཇི་ལྟར། སྲིད་པའི་འཇིགས་ལས་རྣམ་གྲོལ་ཞིང་། །ཐམས་ཅད་ལ་ཡང་ཆགས་མེད་པས། །འདོད་དང་བྲལ་བའི་བརྟན་པ་ནི། །གོ་འཕང་མྱ་ངན་འདས་ལ་གནས། །སྲིད་པའི་སྐྱོན་དུ་བྱིང་བ་ལ། །དཀའ་ཐུབ་སྤྱོད་པས་དགའ་བ་ཡི། །དེ་ཡི་ཡིད་རྣམས་ངལ་སོས་ཀྱང་། །ཞི་བར་འགྱུར་བ་ཡིན་ནམ་ཅི། །གང་གི་ཡིད་ཀྱང་རྣམ་འཁྲུལ་བས། །ལུས་རྣམས་ལ་ནི་རབ་ཏུ་རྒྱུགས། །དེ་ནི་ཆོས་ཀྱི་ལམ་ནོར་བས། །དམྱལ་བར་སྐྱེ་བར་འགྱུར་བ་ཡིན། །བག་མེད་པས་ནི་སེམས་དཀྲུགས་པས། །དེ་ཉིད་རྗེས་སུ་མཐོང་བ་མིན། །བག་མེད་པ་ཡང་མེ་དང་འདྲ། །དེ་ཕྱིར་འབད་པས་ཡོངས་སུ་སྤོངས། །བག་མེད་པས་ནི་རྣམ་འཇོམས་པའི། །སྐྱེས་བུ་ལས་ཀྱི་སྐྱེ་གནས་སྐྱེས། །ལམ་ཡང་རྣམ་བརྒྱད་དེས་ལེགས་པ། །ཐམས་ཅད་ཉིད་དུ་མི་མཐོང་ངོ་། །བག་མེད་ཡུལ་ན་བསྟེན་པ་ཡིས། །ཆོས་བཅུ་རྣམ་པར་ཉམས་པ་ཡིན། །དེ་ནི་རྟག་ཏུ་བག་མེད་པས། །བསམ་གཏན་ཡང་ནི་རབ་ཏུ་ཉམས། །བག་མེད་སེམས་ཅན་ཐམས་ཅད་ཀྱི། །འཆིང་བ་རྣམས་ཀྱི་མཆོག་ཡིན་ནོ། །བདེ་བའི་གོ་འཕང་རྟག་པར་ཡང་། །བག་ཡོད་པར་ནི་རབ་བརྗོད་དོ། །འཁོར་བའི་འཇིགས་པ་སྟོན་པ་ལས། །གང་གི་བློ་ནི་རྨོངས་མེད་པ། །དེ་ནི་ངན་སོང་འཇིགས་གྲོལ་ནས། །རབ་ཞི་ལེགས་པར་གནས་ཞེས་བརྗོད། །