།ཚུལ་ཁྲིམས་དང་ལྡན་པ་མཆོག་ཏུ་དགེ་བ་ཡང་དག་པའི་དོན་ལ་སྤྱོད་པ་པོའི་དགེ་སློང་རྣམས་ནི་བཞི་པོ་དེ་དག་རྣམས་རབ་ཏུ་དང་བར་འགྱུར་རོ། །ཐམས་ཅད་དུ་ཤིན་ཏུ་རབ་ཏུ་དང་བས་བདེ་བར་ཉལ་ལོ། །དེ་ཉལ་བ་ན་ཆོས་དང་ལྡན་ཞིང་ཆོས་དང་རབ་ཏུ་འབྲེལ་པའི་རྨི་ལམ་བཟང་པོ་མཐོང་བར་འགྱུར་རོ། །དེ་བཞིན་དུ་དེ་རྒྱགས་པ་མ་ཡིན་པ་བག་དང་ལྡན་པར་རྒྱུ་བས་ཆོས་བདུན་འཕེལ་བར་འགྱུར་ཏེ། བདུན་གང་ཞེ་ན། འདི་ལྟ་སྟེ། དགེ་བའི་ཆོས་རྣམས་དཔྱོད་པའི་དབང་དུ་བྱས་པའི་ཆོས་ཀྱི་སྤོབས་པ་དང་། དེ་དགེ་བའི་ལས་ཀྱི་མཐའ་རྣམས་ལ་སྤྱོད་པའི་དགའ་བ་དང་ལྡན་པར་འགྱུར་རོ། །དེའི་དགའ་བ་ཡང་མངོན་པར་འཕེལ་བར་འགྱུར་རོ། །དགའ་བ་རྒྱ་ཆེ་བར་གྱུར་པ་གང་གི་ཕྱིར་མིང་དང་གཟུགས་དག་ཕན་ཚུན་གྱི་དབང་གིས་འཕེལ་བར་འགྱུར་རོ། །འཕེལ་ཞིང་རྒྱས་པའི་རྒྱུ་འདིས་ལུས་ཀྱི་ནད་མེད་པའི་ལུས་དང་སེམས་དག་ཀྱང་ཕན་ཚུན་གྱི་དབང་གིས་བདེ་ལེགས་སུ་གྱུར་པས་ཡིད་གཞུངས་པར་གྱུར་ཏེ། ཡིད་གཞུངས་པའི་མིང་ནི་སྔོན་བྱས་པའི་དགེ་བའི་ཆོས་རྣམས་རྗེས་སུ་དྲན་པ་ཡིན་ཏེ། འདིའི་ཡིད་གཞུངས་པ་དེ་ཡང་འཕེལ་ལོ། །དགེ་བའི་ཆོས་རྣམས་ལ་རྟག་ཏུ་ཡང་དྲན་པ་འཕེལ་ལོ། །དགེ་བའི་ཆོས་རྗེས་སུ་དྲན་པ་རྣམས་འཕེལ་བ་བསམས་ནས་ཀྱང་འདིའི་བདེ་བ་རྣམས་ཀྱང་འཕེལ་ལོ། །བདེ་བར་གྱུར་པ་རྣམས་ཀྱི་ཡང་སྟོབས་འཕེལ་བར་འགྱུར་རོ། །ཆོས་བདུན་འཕེལ་བ་རྣམས་ནི་བདེ་བས་མཚན་མོ་འདའ་བར་བྱེད་ལ་ཉལ་བ་ན་ཡང་མཚན་མོ་ལུས་སྒོམ་པ་དང་། སེམས་ཀྱང་སྒོམ་པར་འགྱུར་རོ། །དེ་ལྟར་དུས་རྣམས་དྲན་པ་ཡིན་ནོ། །ཇི་ལྟར་ན་དགེ་སློང་ཉིན་མོ་དང་མཚན་མོ་དུས་དྲན་པ་དང་ཡང་དག་པར་ལྡན་པ་ཡིན་ཞེ་ན། དགེ་སློང་དག་འདི་ན་དགེ་སློང་གིས་མིག་བཙུམས་པ་དང་ཕྱེ་བ་རྟོགས་པར་བྱེད་དེ་སྐད་ཅིག་པའི་མིག་བཙུམས་པ་དང་། ལྷན་ཅིག་ཏུ་བདག་གིས་དུས་སུ་གྱུར་པ་གང་ཞིག་ལེགས་པར་རབ་ཏུ་ཐོབ་པ་དང་དེ་དང་ལྷན་ཅིག་འགྲོགས་པའི་སེམས་དང་སེམས་ལས་བྱུང་བའི་ངོ་བོ་དེ་རྣམས་ནི་དུས་མི་རིང་བ་ན་ཞིག་ཅིང་རུལ་བར་འགྱུར་བའོ། །དེ་ལ་དུས་འདི་གང་དག་རིམ་གྱིས་འགག་པ་དང་སྐྱེ་བ་ཡང་ཡིན་ཞེ་ན།