།གཞན་རྣམས་ཀྱང་རྣ་བའི་རྣམ་པར་ཤེས་པས་སྒྲ་ཉན་པར་བྱེད་པར་གྱུར་པས་ཉེ་གནས་སམ། ལྷན་ཅིག་འགྲོགས་པ་རྣམས་ལམ་ལ་རབ་ཏུ་འགོད་པར་བྱེད་དོ། །རྗེས་སུ་ཡི་རང་བར་མི་བྱེད་དོ། །མཆོག་ཏུ་དགེ་བའི་ལས་ཀྱི་མཐའ་ལ་སྤྱོད་པའི་དགེ་སློང་དེའི་འདོད་པ་རྣམས་ལ་དད་ཆེ་བ་མ་ཡིན་ཞིང་སྒྲ་ལ་བརྐམ་པས་མི་འཁྲིད་དོ། །དེའི་དྲན་པ་ནི་བརྟན་པར་འགྱུར་རོ། །སྒྲ་རྣམས་ཀྱིས་འཕྲོགས་པ་མ་ཡིན་ནོ། །དྲན་པ་གཉིས་པ་དང་ལྡན་པའི་དགེ་སློང་རྣམས་ནི་བརྩོན་འགྲུས་ཡང་དག་པར་བརྩམས་པར་འགྱུར་རོ། །ཤེས་བཞིན་དང་ལྡན་པ་ཚངས་པར་སྤྱོད་པ་ལ་གོམས་པའི་ཚུལ་ཁྲིམས་ལ་རབ་ཏུ་གནས་པ་ཡིན་ནོ། །གཞན་ཡང་དགེ་སློང་དྲན་པ་དང་ལྡན་པས་སྒོམ་པར་མི་བྱེད། རོ་མྱོང་བར་མི་བྱེད། སེམས་ཀྱིས་རབ་ཏུ་རྟོགས་པར་མི་བྱེད་པ་རྣམས་ནི་གང་དག་འདིས་སྔོན་བསྣམས་པར་གྱུར་པ་དྲི་རྣམས་དྲི་ཞིམ་པ་དང་། དྲི་ང་བ་དང་། དམན་པ་དང་། མཆོག་དང་། ཡུལ་ཐག་ཉེ་བ་ན་གནས་པ་དེ་དག་རྣམས་ཀྱང་འདིས་ཀུན་ཏུ་དྲན་པར་མི་བྱེད་དོ། །སེམས་ལ་རབ་ཏུ་འཇོག་པར་མི་བྱེད་དོ། །རྐྱེན་གྱིས་ནང་གི་བདག་ཉིད་དུ་སོན་པ་རྣམས་ཀྱང་ཡོངས་སུ་སྤོང་བར་བྱེད་དོ། །གཞན་ཡང་ཉེ་བར་གནས་སམ། ལྷན་ཅིག་རྒྱུ་བ་རྣམས་ལ་ཡང་སྣའི་རྣམ་པར་ཤེས་པ་དྲི་སྣོམ་དུ་མི་འཇུག་སེམས་ཀྱིས་རབ་ཏུ་དཔྱོད་པར་མི་བྱེད། གང་དང་པོ་ཉིད་ནས་འདིས་ཡིད་རབ་ཏུ་ཟློག་པར་བྱེད་དོ། །རྗེས་སུ་ཡི་རང་བར་མི་བྱེད་དོ། །དགེ་སློང་དེ་བདག་དང་གཞན་དགེ་བ་ལ་སྤྱོད་པར་བྱེད་པ། དགེ་བའི་ཆོས་དང་ལྡན་པ། དྲན་པ་ཉེ་བར་གནས་པ། ཞེན་པ་མེད་པར་ཤེས་བཞིན་དང་ལྡན་པ་ཡིན་ནོ། །འཆུམས་པར་གྱུར་པས་སྣ་འཕྲོགས་པར་མི་འགྱུར་རོ། །དགེ་སློང་དེ་ནི་སྡིག་པ་རྣམས་སྦྱངས་པར་གྱུར་པ་ཡིན་ཞིང་ལེགས་པའི་ཚུལ་ཁྲིམས་དང་ལྡན་པ་དྲན་པ་ཉེ་བར་གཞག་པའོ། །གཞན་ཡང་དྲན་པས་དྲན་པར་མི་བྱེད་པ་ནི་གང་འདིས་སྔོན་མྱངས་པར་གྱུར་པ་དེ་དག་རྣམས་ཏེ། ཡིད་དུ་འོང་བ་རྣམས་དུས་བར་དུ་ཆོད་པ་ན་མྱངས་པའམ། དུས་ཉེ་བ་ན་མྱངས་པར་གྱུར་པ་ཡང་རུང་སྟེ། དེ་དག་རྣམས་འདིས་མྱོང་བར་མི་བྱེད་དོ། །ཀུན་ཏུ་རྟོག་པར་མི་བྱེད་དོ། །རྐྱེན་གྱིས་འོངས་པ་རྣམས་ཀྱང་མེ་བཞིན་དུ་ཡོངས་སུ་སྤོང་ངོ་། །