ལོང་ཀར་གྱུར་པ་ལ་རྒྱུས་པའི་འཁྲུལ་འཁོར་གྱིས་ཀུན་ནས་སྦྲེལ་བ་ཇི་ལྟར་མཐོང་བའི་ལོགས་ལ་རྒྱུས་པའི་དྲ་བས་ཀུན་ནས་སྦྲེལ་བ་ནང་ན་ཟས་ཀྱི་རོ་རྣམས་རུལ་བ་ནི་དེ་མ་ཐག་ཏུ་སྐྱུག་པ་ལྟ་བུའི་བད་ཀན་རྣམས་དང་ལྡན་པས་ནད་རྣམས་གང་བར་གྱུར་པ་ཤིན་ཏུ་འཇིགས་སུ་རུང་བའི་ཤིན་ཏུ་དྲི་མི་ཞིམ་པ་རྣམས་ཀྱིས་མགྲིན་པ་དང་། མིག་མཆུ་རྒྱུས་པ་དང་། གནད་དང་། རུས་པ་ཀུན་ཏུ་བཀང་ཞིང་ཀུན་ནས་འཛིན་པ་ནི་ལས་ཀྱིས་བསྐྱེད་པའི་རླུང་འབའ་ཞིག་གིས་སེམས་དང་སེམས་ལས་བྱུང་བ་རྣམས་ལྷན་ཅིག་ཏུ་འཛིན་པར་གྱུར་པ་དང་། འགྲོ་བར་གྱུར་པ་ན་ཡང་ལུས་ལ་སོ་སོར་རྟོག་པར་བྱེད་དོ། །གཞན་ཡང་ལུས་དེ་ཉིད་རབ་ཏུ་གཡོ་བར་གྱུར་པ་ན་ཡང་སོ་སོར་རྟོག་པར་བྱེད་དོ། །དགེ་སློང་དེས་ཇི་ལྟ་བར་ཁ་དང་། འགྲམ་རུས་དང་། ཀླད་ཕོར་གྱི་ཚོགས་འདུས་པ་དང་། མིག་ཕོར་གཉིས་དང་གཅིག་ལྷག་པ་འཛུམས་པ་དང་། འབྱེད་པ་དང་། འབྲས་བུ་གཉིས་དང་། བདག་གི་དེ་དག་རྣམས་ཤིང་གི་འཁྲུལ་འཁོར་གྱི་བུད་མེད་བཞིན་དུ་རྒྱུས་པའི་འཁྲུལ་འཁོར་གྱིས་ཀུན་ཏུ་སྦྲེལ་བ། སྐད་ཅིག་དང་སྐད་ཅིག་ལ་སྐྱེ་བར་འགྱུར་ཞིང་འཆི་བར་འགྱུར་ལ་འཕོ་བར་འགྱུར་བས་གྲོང་དང་། གྲོང་ཁྱེར་དང་། གྲོང་ཆུང་རྣམས་སུ་བདག་འགྲོ་བར་བྱེད་པ། ལུས་ཀྱི་གོང་བུའི་ཁོག་ཙེ་སྦྲུལ་དུག་ཅན་གྱི་ཁོག་པ་ཉིད་གཅེས་པར་འཛིན་པ་ཡིན་པས་རྒྱགས་པས་རྒྱུ་བར་མ་བྱེད། ཟས་ཀྱི་དོན་དུ་ཀུན་ཏུ་འཆུམས་པར་མི་བྱ་བ་དང་། བདག་གིས་རབ་ཏུ་བགད་པར་ཡང་མི་བྱའོ། །འགྲོ་བའི་དབང་དུ་བྱས་ནས་དེས་དེ་ལྟར་བགྲོད་པར་བྱེད་པའི་དགེ་སློང་ནི་རྣམ་པ་གཉིས་པ་རྒལ་བར་མི་འགྱུར་རོ། །གྲོང་དང་། གྲོང་ཁྱེར་དང་། གྲོང་ཆུང་རྣམས་སུ་བསོད་སྙོམས་ལ་ཞུགས་པར་གྱུར་པ་ལ་ཇི་ལྟ་བ་བཞིན་དུ་བདག་ཉིད་ཀྱི་ལུས་ལས་སོ་སོར་དཔྱོད་པར་བྱེད་དེ། དེ་ལྟར་དེ་ལུས་ལེགས་པར་བསྒོམས་པ་དང་། བརྩོན་འགྲུས་བརྩམས་པར་གྱུར་པས་བུད་མེད་རྣམས་ཉིད་དང་། སྐྱེས་པ་རྣམས་ཐམས་ཅད་ལ་ཡང་དེ་དེ་ལྟར་འདོད་ཆགས་ལ་སོགས་པའི་དྲི་མ་རྣམས་སྙིང་ལ་མི་འཇུག་གོ། །རྣམ་པ་དེ་ལྟ་བུ་རྣམས་ལས་ནི་དེས་སྲོག་གི་དབང་པོའི་ཕྱིར་ཡང་རྒལ་བར་མི་བྱ་སྟེ། རྣམ་པ་འདི་རྣམས་ནི་དགེ་སློང་ངེས་པར་ལེགས་པར་འདོད་པ་རྣམས་ཀྱིས་རྒལ་བར་མི་བྱའོ།