སྐྱེ་བོ་ཐམས་ཅད་ཀྱང་དགའ་བར་འཛིན་པ་དང་བྲལ་བར་འགྱུར་རོ། །བགྲོད་པར་བྱ་བ་མ་ཡིན་པ་དེའི་རྗེས་སུ་འབྲེལ་པའི་དྲི་མ་ལྷན་ཅིག་སྐྱེས་པར་ཕྱི་བཞིན་རྗེས་སུ་སྦྲེལ་བ་གཞན་ནི་སྤྱོད་པ་འབྱེད་པའོ། །སྤྱོད་པ་འབྱེད་པ་ཡང་གཞན་མེད་པས་མེད་པར་འགྱུར་རོ། །གང་ཞེ་ན་འདི་ལྟ་སྟེ། རྩོད་པ་ལ་དགའ་བས་སོ། །རྩོད་པ་ལ་དགའ་བ་མེད་པས་དེའི་རྗེས་སུ་འབྲང་བའི་དྲི་མ་གཞན་རྣམས་ཀྱང་མེད་པར་འགྱུར་བ་ནི་འདི་ལྟ་སྟེ། ཡུལ་ལྗོངས་འཇོམས་པའོ། །རྩོད་པ་ལ་དགའ་བ་དང་བྲལ་བས་ཡུལ་ལྗོངས་འཇིག་པ་རྣམས་ཀྱང་དེ་མེད་པས་མེད་པར་འགྱུར་རོ། །གང་ཡང་ཕན་ཚུན་དུ་ཞེ་འགྲས་པས་མཚོན་ཆས་གཏུབ་པ་ལ་དགའ་བ་དང་། སྐྱེས་པ་རྣམས་ཕན་ཚུན་དུ་རྣམ་པ་སྣ་ཚོགས་པར་གྱུར་པ་དེ་དག་རྣམས་ཀྱང་གང་གི་ཕྱིར་ཕལ་ཆེར་ནི་བུད་མེད་ཀྱི་རྒྱུ་ལས་ཡིན་པའི་ཕྱིར་ཏེ། རྒྱུ་གཞན་རྣམས་ཀྱིས་ནི་མ་ཡིན་ནོ། །དེའི་ཕྱིར་དེས་དེ་ལྟར་འདོད་ཆགས་རབ་ཏུ་བཅོམ་པའི་ཕྱིར་གཅིག་གི་སྟེང་ན་གཅིག་གནས་པའི་དྲི་མ་དེ་དག་རྣམས་ཐམས་ཅད་ཀྱང་མེད་པར་འགྱུར་རོ། །དེ་དང་རབ་ཏུ་འབྲེལ་པ་དང་། དེས་གང་བར་གྱུར་པ་དེ་ལྟ་བུའི་རང་བཞིན་ཅན་གྱི་བུད་མེད་རྣམས་ཀྱི་སེམས་ནི་དགེ་བའི་བཤེས་གཉེན་གྱི་ཁ་ནས་ཐོས་པའི་སངས་རྒྱས་ཀྱི་བཀའ་མ་གཏོགས་པ་གཞན་རྣམས་ཀྱིས་ནི་འཇམ་པོར་བྱ་བར་ནུས་པ་ཡང་མ་ཡིན་ཏེ། གཞན་དུ་ནི་བུད་མེད་གང་དག་དེ་བཞིན་དུ་མི་འགྱུར་རོ། །དེའི་ཚེ་ཁྱིམ་གྱི་གནས་ཤིན་ཏུ་སྤང་བར་དཀའ་བ་སྤངས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་སྟེ། གང་གི་ཚེ་ན་ཟག་པ་རྣམས་ཟད་པར་བྱ་མི་ནུས་པ་ཡང་དེའི་ཚེ་ལེགས་པར་བསྒོམ་པའི་ཚུལ་ཁྲིམས་ངེས་ཏེ། དེ་ལྟར་ཡང་སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དང་། ཚིག་རྩུབ་དང་། ཕྲ་མ་དང་། ཀུན་ཏུ་འབྲེལ་པ་མེད་པ་རྣམས་རྣམ་པར་སྤངས་ཤིང་ལེགས་པར་བསྒོམས་ལ་ཡང་དང་ཡང་དུ་བསྟན་ཅིང་བསྒོམས་ལ་ལན་མང་དུ་བྱས་པའི་བུད་མེད་རྣམས་ནི་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་གྱི་ལྷ་རྣམས་སུ་སྐྱེའོ། །གང་དག་འདོད་པ་རྣམས་ལ་འདོད་ཆགས་དང་བྲལ་བའི་ལམ་མ་ཐོབ་པ་རྣམས་ནི་ལས་དང་སེམས་ཀྱི་དབང་གིས་འདོད་པ་ན་སྤྱོད་པ་རྣམས་ལས་འཐབ་བྲལ་བ་རྣམས་ཀྱི་ནང་གི་ཚོགས་པ་རྒྱུ་བ་ན་རྣམ་པར་སྤྱོད་པ་གང་ཡིན་པའི་སར་སྐྱེའོ།