མཐོ་རིས་བདེ་འགྲོ་ལྷའི་རིས་རྣམས་ཀྱི་འཇིག་རྟེན་དམན་པ་དང་། བར་མ་དང་། ཁྱད་པར་དུ་འཕགས་པ་རྣམས་སུ་སྐྱེའོ། །དེ་ལ་འགའ་ཞིག་ནི་འཐབ་བྲལ་གྱི་ལྷ་རྣམས་གང་དག་གི་ནང་དུ་སྐྱེ་སྟེ། དེ་ཇི་ལྟར་ཚུལ་ཁྲིམས་ཀུན་ཏུ་སྤྱད་ཅིང་ཉེ་བར་བསགས་པར་གྱུར་པའི་རྣམ་པ་དེ་ལྟ་བུར་འགྱུར་རོ། །དེ་བཞིན་དུ་ལྷ་རྣམས་ཀྱི་རིས་གཞན་དུ་ཡང་ཚུལ་ཁྲིམས་དགེ་བར་གྱུར་པ་གང་དག་ཁོ་ནས་ཉེ་བར་བསྐྱེད་པར་གྱུར་ནས་ལྷ་རྣམས་བག་མེད་པར་སྤྱོད་པར་འགྱུར་ཏེ། ཅི་སྲིད་ཐ་མར་འཕགས་པའི་ཕྱག་རྒྱ་ཐོབ་པར་གྱུར་པ་དེ་སྲིད་ན་ཕྱིར་ཡང་སྤྱོད་པ་ནི་མ་ཡིན་ནོ། །དེ་དག་རྣམས་བསོད་ནམས་ཟད་ནས་ཕྱིས་ཡང་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེའོ། །བསོད་ནམས་ཟད་པར་གྱུར་པ་ཡང་བག་མེད་པའི་སྐྱོན་གྱིས་ཡིན་ལ་གང་ཡང་བག་མེད་པས་བག་མེད་པར་སྤྱོད་པ་མ་ཡིན་པ་དེ་ནི་བདེ་བ་ནས་བདེ་བའི་གོ་འཕང་དུ་འགྲོ་སྟེ། དེའི་ཚུལ་ཁྲིམས་དེ་ལེགས་པར་བསྒོམས་པ་དང་ཤིན་ཏུ་རྣམ་པར་དག་པར་གྱུར་པའི་གཟི་བརྗིད་ཀྱིས་ཡིན་ནོ། །དེའི་ཕྱིར་ན་བག་མེད་པས་ཅུང་ཟད་ཀྱང་མ་གནས་ཤིག །བག་མེད་པ་རྣམས་ནི་དུག་དང་འདྲ་བའོ། །བྱིས་པའི་སྐྱེ་བོ་ཐམས་ཅད་རབ་ཏུ་འཇོམས་པར་བྱེད་པ་དོན་ཐམས་ཅད་རླག་པར་བྱེད་པ་འཁོར་བ་ཐམས་ཅད་དུ་འཆིང་བར་བྱེད་པ་ཡིན་ནོ། །དེ་ལྟ་བས་ན་བག་མེད་པ་རྣམས་ནི་ལྷའམ་མི་རྣམས་ཀྱིས་ཀྱང་མི་བྱའོ། །གང་ཡང་ལྷ་དང་མི་རྣམས་ཀྱང་རུང་སྟེ། རྣམ་པ་དེ་ལྟ་བུའི་ཚུལ་ཁྲིམས་ཀྱིས་མཛེས་པར་གྱུར་ནས་སྐྱེ་བོ་རྣམས་བག་མེད་པའི་སྐྱོན་གྱིས་འདའ་བར་བྱེད་པ་དེ་ནི་ཤིན་ཏུ་བསླུས་པའི་རྙེད་པ་ཅན་དུ་འགྱུར་ནས། ངན་འགྲོར་གྱུར་པའི་འཁོར་བར་ཡང་དུས་ཡུན་རིང་དུ་ཡང་འཁོར་བར་ཡོངས་སུ་འཁྱམ་པར་འགྱུར་རོ། །དེ་ལྟར་མུ་སུ་ལུན་དྷ་འདིས་ལྷ་དེ་དག་རྣམས་ལ་སྟོན་པར་བྱེད་དོ། །གང་སེམས་ཅན་རྣམས་ལ་ཐུགས་བརྩེ་བ་པོ་བཅོམ་ལྡན་འདས་དེས་ལྷ་དང་མི་རྣམས་ལ་ཕན་པའི་དོན་དུ་རྫུ་འཕྲུལ་མཛད་ནས་སྤྲུལ་པའི་མཆོད་རྟེན་ན་བྱང་བུ་ལ་བྲིས་པ་དེ་ཐོས་ནས་ཀྱང་ལྷ་རྣམས་ཤིན་ཏུ་ཡིད་བྱུང་བར་གྱུར་པས་ཀྱང་འཁོར་བ་ལ་སྐྱོ་བ་སྐྱེའོ། །བག་མེད་པ་རྣམས་ཀྱང་དུག་བཞིན་དུ་སྤོང་ངོ་། །