ལེགས་པར་འཛིན་པར་བྱེད་དོ། །མ་ཉམས་པ་དང་། མ་ཆད་པ་དང་། མ་ཟགས་པར་ཇི་སྲིད་འཚོའི་བར་དུ་འཛིན་པར་བྱེད་དོ། །དེ་ལ་སྔར་བཤད་པའི་དགེ་བསྙེན་བཞི་པོ་དེ་དག་རྣམས་དང་ཕྱིས་ཀྱི་བཞི་པོ་རྣམས་ཏེ། དེ་ལས་དེ་དག་རྣམས་ཀྱི་དམན་པ་དང་། བར་མ་དང་། ཁྱད་པར་དུ་འཕགས་པ་ནི་རིམ་པ་ཇི་ལྟ་བ་བཞིན་དུ་སྔར་གྱི་མཆོག་དང་། འདིར་ནི་ཀུན་ནས་ཚོགས་པར་སྤྱོད་པ་ཡིན་ནོ། །ཐམས་ཅད་ལས་ཉུང་བ་ནི་སྔ་ཕྱིར་བསླབ་པའི་གཞི་ལ་སྤྱོད་པའོ། །ཐམས་ཅད་ལས་ཉུང་བར་གྱུར་པའི་དགེ་བསྙེན་སྐད་ཅིག་ཙམ་སྡོམ་པ་འཛིན་པར་བྱེད་པ་དེའི་ཡང་གཞལ་དུ་མེད་པ་ཡིན་པས་ན་གཞན་ལྷ་རྣམས་དང་བདུད་ལ་སོགས་པ་དང་། དབང་པོ་རྣམས་ཀྱིས་ཀྱང་མཚུངས་པར་འགྱུར་བ་ནི་མ་ཡིན་ནོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པས་ཡོངས་སུ་བསྡུས་པའི་ངོ་བོ་ཡིན་པའི་ཕྱིར་རོ། །ལྷ་དེ་དག་རྣམས་ཐམས་ཅད་ཀྱང་མྱ་ངན་ལས་འདས་པའི་གྲོང་ཁྱེར་དུ་འགྲོ་བ་མ་ཡིན་པའི་ཕྱིར་རོ། །སྡོམ་པ་སྔོན་དུ་འཛིན་པ་ནི་སའི་གནོད་སྦྱིན་གྱིས་སྔོན་ལ། ལེགས་པར་མངོན་པར་མཐོང་ནས་མཆོད་པར་བྱེད་དོ། །ཕྱག་འཚལ་བར་བྱེད་དོ། །བར་སྣང་ལ་རྒྱུ་བའི་གནོད་སྦྱིན་གྱིས་མངོན་པར་མཐོང་ནས་མཆོད་པར་བྱེད་དོ། །ཕྱག་འཚལ་བར་བྱེད་དོ། །ཆོས་དང་ལྡན་པའི་བསམ་པས་ཀྱང་འདི་ལ་ལྷན་ཅིག་ཞབས་འབྲིང་བྱེད་ཅིང་འགྲོའོ། །ལྷ་རྣམས་ལ་ཡང་གོ་བར་བྱེད་དོ། །མཐོང་བའི་ཆོས་ཀྱི་འབྲས་བུ་ཡང་རྒྱལ་པོ་དང་རྒྱལ་པོའི་བློན་པོ་རྣམས་ཡུལ་གྱི་བདག་པོ་དག་གིས་ཀྱང་མཆོད་པར་བྱེད་དོ། །དེ་དག་རྣམས་ཀྱིས་ཡང་ལེགས་པར་སྦྱོར་བར་བྱེད་དོ། །གང་ཡང་འདི་ཕྱི་བཞིན་དུ་ལྷ་རྣམས་ཉེ་བར་གནས་པར་གྱུར་པས་དེ་རྫུ་འཕྲུལ་ཆེ་བར་འགྱུར་བ་དང་། སྟོབས་ཆེ་བར་འགྱུར་རོ། །གནོད་སྦྱིན་ཆོས་བྱེད་པ་མ་ཡིན་པ་གཞན་རྣམས་ཀྱིས་ཀྱང་ཐོ་བཙམ་པར་མི་ནུས་སོ། །གང་གི་ཚེ་སེམས་ཁྲལ་མང་པོ་སྣ་ཚོགས་པ་ཡོད་པར་གྱུར་པ་དེ་དག་རྣམས་ཀྱང་འདིས་བདེ་བར་འགྲུབ་པར་འགྱུར་རོ། །འདིའི་ལས་ཀྱི་མཐའ་རྣམས་ཀྱང་ཚེགས་མེད་པར་འགྲུབ་པར་འགྱུར་རོ།