སྔ་ཕྱིར་བསླབ་པའི་གཞི་ལ་སྤྱོད་པ་དང་། ཀུན་ཏུ་ཉམས་པ་མེད་པར་སྤྱོད་པ་དང་། འགྱོད་ནས་སྤྱོད་པ་དང་། ཐམས་ཅད་ཀུན་ཏུ་ཉམས་པར་སྤྱོད་པའོ། །དེ་ལ་དགེ་བསྙེན་བསླབ་པའི་གཞི་ལ་སྔ་ཕྱིར་སྤྱོད་པ་ནི་གང་བསླབ་པའི་གཞི་རྒྱ་མཚོ་ལ་སྔ་ཕྱིར་བགྲོད་པར་བྱེད་པས་སྔ་ཕྱིར་བགྲོད་པར་བྱེད་དོ། །དེ་དང་པོ་ཁོ་ནར་གསུམ་ལ་སྐྱབས་སུ་འགྲོ་བའི་དགེ་བསྙེན་དུ་འགྱུར་རོ། །ཕྱི་ནས་དུས་སྔ་ཕྱིར་སེམས་ཀྱིས་བསྒོམས་ནས་ཡོན་ཏན་ལེགས་པ་དང་ལྡན་པར་བྱས་ཏེ། བསླབ་པའི་གཞི་གཅིག་ལེགས་པར་འཛིན་ནོ། །དེ་ཡང་མ་ཉམས་པ། མ་ཆད་པ། མ་ཟགས་པར་འཛིན་པར་བྱེད་དོ། །དེ་ལ་མ་ཉམས་པའི་རྣམ་པ་འདི་ལྟ་བུ་གང་ཡིན། མ་ཆད་པའི་རྣམ་པ་འདི་ལྟ་བུ་གང་ཡིན། མ་ཟགས་པའི་རྣམ་པ་དེ་ལྟ་བུ་གང་ཡིན་ན། མ་ཉམས་པ་ཞེས་བྱ་བ་ཇི་སྲིད་འཚོའི་བར་དུ་བདག་ཉིད་ཀྱིས་འཛིན་པ་སྟེ། སེམས་ཀྱིས་ཀྱང་སྡོམ་པ་ལས་འདའ་བར་འགྱུར་བ་སེམས་པར་མི་བྱེད་དོ། །གཞན་བྱེད་པ་ན་ཡང་རྗེས་སུ་ཡི་རང་བར་མི་བྱེད་དོ། །བྱེད་པ་ཡང་འགོག་པར་བྱེད་དོ། །དེ་དག་རྣམས་ཆོས་ལ་ཡང་འགོད་པར་བྱེད་དོ། །འདི་ནི་མ་ཉམས་པ་ཞེས་བརྗོད་དོ། །དེ་ལ་མ་ཆད་པ་གང་ཞེ་ན། དེ་ཉིད་ཀྱིས་འདིར་བརྒྱ་ལ་ན་བསླབ་པའི་གཞི་རྣམས་གཏོང་བར་བྱེད་དོ། །གལ་ཏེ་ན་འཛིན་པར་བྱེད་དོ། །ཡང་དང་ཡང་དུ་བཏང་ནས་སླར་ཡང་ལེན་པར་བྱེད་དོ། །རྣམ་པ་འདི་ལྟ་བུ་ནི་ཆད་པ་ཡིན་ནོ། །དེ་ལ་འདིས་ནི་ཆད་པ་དང་བྲལ་བར་བྱས་ཤིང་འཛིན་པར་བྱེད་དོ། །ཇི་ལྟར་ན་མ་ཟགས་པ་འཛིན་པ་ཡིན་ཞིང་ཟགས་པ་ཡང་ཇི་ལྟར་ཡིན་ན། འདི་ནི་བསླབ་པའི་གཞི་ལ་དང་པོ་ཉིད་དུ་རབ་ཏུ་དང་བའི་སེམས་ཀྱིས་དགེ་བའི་བཤེས་གཉེན་གྱི་དྲུང་ནས་བཟུང་བ་ལས་དེ་ཕྱི་ནས་འགྱོད་པ་དང་བཅས་པར་གྱུར་ནས་མི་འཛིན་ནོ། །རྣམ་པར་རྟོག་པའི་ཆུ་བོས་ཁྱེར་རོ། །དེ་སེམས་རྙོག་པ་དང་བཅས་པས་སྤྱོད་པར་བྱེད་དོ། །སེམས་ལ་སྟོབས་མེད་པར་འགྱུར་རོ། །དེ་ཕྱི་ནས་འགྱོད་པའི་མེས་སྲེག་པར་བྱེད་ལ། བསྲེགས་པར་གྱུར་ནས་ཀྱང་ཡོངས་སུ་གཏོང་ངོ་། །ཡོངས་སུ་བཏང་ནས་ཀྱང་ཕྱིར་མི་འཛིན་ཏོ། །འདི་ནི་ཟགས་པ་ཞེས་བརྗོད་དོ།