དེ་ནི་ཕ་རོལ་འགྲོ་རྟག་ཞི། །མྱ་ངན་འདས་པའི་མཐའ་ལ་གནས། །འཆི་འཕོ་འབྱུང་བའི་ལྷ་ཡི་ནི། །དབང་པོ་བརླབས་པར་གྱུར་པའི་སེམས། །སྡུག་བསྔལ་བརྗོད་པར་སླ་མིན་གང་། །དེ་ལ་འདི་ན་དཔེ་ཡོད་མིན། །ཇི་ལྟ་ཇི་ལྟར་བདེ་ཆེན་པོ། །སེམས་ནི་སྲེད་པས་ཉེར་བཅོམ་པ། །དེ་ལྟ་དེ་ལྟར་འཆི་འཕོ་བའི། །སྡུག་བསྔལ་ཆེན་པོ་བཟོད་པར་དཀའ། །ལེགས་བྱས་ལས་ནི་མ་བྱས་དང་། །ལས་ཀྱི་གནས་ལུགས་མི་ཤེས་པ། །སྡུག་བསྔལ་ཆེན་པོ་ཀུན་འབྱུང་བས། །ཕྱིས་ནི་གདུང་བས་སྲེག་པར་བྱེད། །ཇི་སྲིད་འཆི་བ་མ་འོངས་དང་། །ཇི་སྲིད་དལ་འབྱོར་ཕུན་སུམ་ཚོགས། །དེ་སྲིད་རང་ལ་ཕན་པར་མནོས། །ལམ་འདི་རྣམས་ནི་བདེ་བ་འབྱུང་། །ལྷ་ཡི་འཇིག་རྟེན་རྣམས་འཆི་འཕོ། །འཆི་བ་མི་ཡི་ས་རྣམས་ལ། །རིག་ནས་ཉེ་བར་འཚེ་བཅས་པའི། །སྲིད་ན་སྐྱེས་བུ་སུ་གནས་བྱེད། །དེ་ལྟར་ཡང་འཆི་འཕོ་བར་གྱུར་པའི་ལྷ་རྣམས་ལས་ཀྱི་ཐག་པས་དྲངས་པར་གྱུར་པ་སོ་སོར་ཉེ་བར་བསྟན་པས་འཇིགས་པ་ཆེན་པོ་དང་བཅས་པ་རབ་ཏུ་སྐྱེའོ། །དེའི་ཕྱིར་ན་ལྷ་དེ་དག་དུད་འགྲོ་དང་འདྲ་བར་གྱུར་པ་ཡིན་ཏེ། གང་དག་ཡུལ་རྣམས་ལ་རྣམ་པར་འཆུམས་པའི་ཡིད་ཀྱིས་རང་ཉིད་ལ་ལེགས་པར་མི་བྱེད་དོ། །དེ་ལྟ་བས་ན་བག་མེད་པར་ཡང་མ་བྱེད་ཕྱི་ནས་འགྱོད་པར་འགྱུར་བར་མ་བྱེད་ཅིག །དེ་ལྟར་ལྷ་མུ་སུ་ལུན་དྷས་ཚོགས་པ་རྒྱུ་བ་ན་རྣམ་པར་རྒྱུ་བའི་ལྷ་རྣམས་ལ་རྣམ་པར་གཟིགས་ཀྱིས་མཛད་པའི་མཆོད་རྟེན་མཐོང་བར་བྱས་ནས་དེ་ལ་རྗེས་སུ་བསྔགས་པར་བྱེད་དོ། །ངེས་པར་ལེགས་པ་ལ་སྦྱོར་བར་བྱེད་དོ། །འདོད་པ་རྣམས་ཀྱི་ཉེས་དམིགས་རྣམས་ཀྱང་རབ་ཏུ་སྟོན་པར་བྱེད་དོ། །རྣམ་པར་སྨད་པར་བྱ་བའི་ཕྱིན་ཅི་ལོག་བཞི་ཡང་དག་པར་སྟོན་པར་བྱེད་དོ། །འཆི་བའི་དུས་མ་འོངས་པ་ཡང་ལེགས་པར་སྟོན་པར་བྱེད་དོ། །ཀུན་ཏུ་སྐྲག་པར་བྱེད་དོ། །དེའི་ཕྱིར་འཇིགས་སུ་རུང་བའི་འཆི་བ་ལས་སྡུག་བསྔལ་དུ་མས་ཚང་ཚིང་དུ་གྱུར་པའི་ལམ་ལྷ་དེ་དག་རྣམས་ལ་བསྟན་པར་གྱུར་པ་ན། དེས་རབ་ཏུ་དང་བས་ཡིད་འཕྲོག་པར་བྱེད་པའི་བདེ་བ་སྐྱེད་པར་བྱེད་པའི་ཕྱིར་ན་ལྷ་རྣམས་ལ་རྗེས་སུ་སྟོན་ཏོ། །མདོ་དྲུག་པ་ལས་རྣམ་པར་གཟིགས་ཀྱིས་མཛད་པའི་མདོ་སྡེ་གཉིས་པ་རྫོགས་སོ།། །།