དེ་བཞིན་དུ་གཞན་གྱི་བུ་དང་བུ་མོ་འཕྲོག་པ་ཡོངས་སུ་སྐྱོབ་པར་བྱེད་པའོ། །དེ་ལ་སྲོག་བྱིན་པས་ནི་ལྷ་དང་མི་རྣམས་སུ་ཚེ་རིང་བར་འགྱུར་རོ། །ནོར་འཕྲོག་པ་རྣམས་ཡོངས་སུ་བསྐྱབས་པ་ལས་རྐུན་མ་ལས་ལེགས་པར་བསྲུངས་པར་འགྱུར་རོ། །ནོར་རྣམས་དང་ཡང་ལྡན་པར་ཡང་འགྱུར་རོ། །རྒྱལ་པོ་དང་། རྐུན་མ་དང་། ཆུ་ལ་སོགས་པས་འདིའི་ནམ་ཡང་རྫས་རྣམས་འཕྲོག་པར་མི་འགྱུར་རོ། །རྒྱལ་པོར་འགྱུར་བ་དང་། རྒྱལ་པོའི་བློན་པོ་རྣམས་སུ་འགྱུར་བ་དང་། ལས་དེའི་འབྲས་བུས་རྫུ་འཕྲུལ་ཆེ་བར་འགྱུར་བ་དང་། དབང་ཆེ་བ་དང་། སྐྱེ་བ་གཞན་ཐམས་ཅད་དུ་ཡང་ནོར་དང་ལྡན་པར་འགྱུར་རོ། །བུ་དང་བུ་མོ་རྣམས་ཀྱི་མི་འཇིགས་པ་བྱིན་པས་ནི་བུ་དང་བུ་མོ་རྣམས་ལེགས་པར་བཟུང་བར་འགྱུར་རོ། །ལྷ་དང་མི་རྣམས་སུ་འཆི་འཕོ་བའི་དུས་ཀྱི་ཚེ་ན་ཡང་དེ་ལྟར་རྣམ་པར་མི་སྤོང་ངོ་། །ལྷ་དག་དེ་ལ་ཆོས་ཀྱི་སྦྱིན་པ་གང་ཞེ་ན། དེ་ལ་རྣམ་པ་གཉིས་ཏེ། འཇིག་རྟེན་པ་དང་། འཇིག་རྟེན་ལས་འདས་པའོ། །དེ་ལ་འཇིག་རྟེན་པ་ནི་བསམ་གཏན་བཞིར་ཉེ་བར་འགྲོ་བའི་འཇིག་རྟེན་པའི་ཤེས་པ་དང་ཡང་དག་པར་ལྡན་པ་བྱིན་པས་ལྷ་དང་མི་རྣམས་སུ་བདེ་བར་འགྱུར་ཏེ། ལྷ་དང་མི་རྣམས་ཀྱི་ནང་དུ་སྟེ། གལ་ཏེ་ལོག་པར་ལྟ་བར་མ་གྱུར་ནའོ། །འཇིག་རྟེན་ལས་འདས་པའི་ཆོས་ཀྱི་སྦྱིན་པ་རྣམས་བཏང་བས་རྣམ་པར་བྱང་བའི་ལྷར་འདོད་པ་ན་སྤྱོད་པ་རྣམས་སམ། གཟུགས་ན་སྤྱོད་པ་རྣམས་སུའོ། །དེ་གལ་ཏེ་འདོད་པ་ན་སྤྱོད་པར་སྐྱེས་ན་དེ་དགུ་བཅུ་རྩ་བརྒྱད་ཀྱི་ས་ལ་སྤྱོད་པའི་འདོད་པ་ན་སྤྱོད་པའི་ལྷའི་རིས་དྲུག་ཇི་ལྟ་བའི་གཙོ་བོ་རྣམས་སུ་སྐྱེའོ། །གཟུགས་ན་སྤྱོད་པ་རྣམས་སུ་ཡང་སྐྱེ་སྟེ། མྱ་ངན་ལས་འདས་པ་རྟོགས་པར་ཡང་འགྱུར་རོ། །འབྲས་བུའི་ཁྱད་པར་ཆེ་བ་རྣམས་ནི་བློའི་ཁྱད་པར་རྣམས་ཀྱིས་མྱ་ངན་ལས་འདས་པ་ལྷག་པར་རྟོགས་པར་འགྱུར་རོ། །གནས་གཙང་མའི་རྣམས་སུ་ཡང་སྐྱེའོ། །ཡོངས་སུ་བསྔོ་བའི་ཁྱད་པར་གྱིས་རྒྱལ་པོར་ཡང་འགྱུར་ཏེ། འཁོར་ལོས་གླིང་བཞི་ལ་སྒྱུར་བ་གསེར་གྱི་འཁོར་ལོ་ཅན་རིན་པོ་ཆེ་དང་ཉེ་བ་བཅུ་བཞི་དང་ཡང་ཡང་དག་པར་ལྡན་པའོ། །ཡོངས་སུ་བསྔོ་བའི་ཁྱད་པར་གྱིས་ཁ་དོག་དང་ལྡན་པར་འགྱུར་རོ།