།ཇི་ལྟར་གང་དག་གཞན་གྱི་རྫས་ཡིན་པ་དེ་རྣམས་ངའི་ཡིན་པར་གྱུར་ན་ཞེས་དེས་དེ་ལྟར་ཡིད་ཀྱིས་བསམས་ནས་ཀྱང་གཞན་རྣམས་ལ་ཡང་དེ་བཞིན་དུ་དགའ་བར་བྱས་ནས་དེས་གཞན་རྣམས་དང་ཡང་ལྷན་ཅིག་ཏུ་གཡོ་སྒྱུ་བྱས་པས་གཞན་རྣམས་སླུ་བར་བྱེད་དོ། །བསླུས་ནས་ཀྱང་རབ་ཏུ་དགའ་བར་འགྱུར་རོ། །ཇི་ལྟ་བུའི་ལེགས་པ་ཅིག་བདག་གིས་བྱ་སྟེ། ཡུལ་དེའི་ཉོ་ཚོང་གིས་གཡོ་ཟོལ་དང་ལྡན་པས་གཞན་རྣམས་ཀྱང་བསླུས་ནས་ནོར་ཕྲོགས་པས་བདག་ལ་འདི་སྙེད་ཅིག་འཕེལ་བ་ཞེས་དེ་ལྟར་དེ་རོ་མྱོང་བར་བྱེད་དོ། །སྒོམ་པར་བྱེད་དོ། །ལན་མང་དུ་བྱེད་དོ། །གཞན་རྣམས་ཀྱང་དེས་སྡུག་བསྔལ་བར་བྱེད་པར་འགྱུར་རོ། །འདོད་པ་མི་བཟད་པས་ཟིལ་གྱིས་མནན་ནས་དེ་ཡུལ་ལྗོངས་རྣམས་འཇོམས་པར་བྱེད་པར་འགྱུར་རོ། །གྲོང་ཁྱེར་རྣམས་དང་ཡུལ་ལྗོངས་རྣམས་ཕུང་བར་བྱེད་པ་པོར་འགྱུར་རོ། །སྐྱེ་བོ་ཐམས་ཅད་ཀྱིས་ཡོངས་སུ་སྤངས་པ་པོར་འགྱུར་རོ། །དེ་བཟང་པོ་རྣམས་ཐམས་ཅད་ཀྱིས་རྣམ་པར་གཤེས་པ་དང་ཡོངས་སུ་སྤངས་པར་ཡང་འགྱུར་ཏེ། ཡུལ་གྱི་ཚེར་མ། གྲོང་གི་ཚེར་མ། གྲོང་ཁྱེར་གྱི་ཚེར་མ། ཡུལ་འཇོམས་པ་པོ་དང་། གྲོང་འཇོམས་པ་པོ་དང་། ཁྱིམ་འཇོམས་པ་པོ་དང་། རིགས་འཇོམས་པ་པོ་དང་ཡང་རྟག་ཏུ་ཡང་དག་པར་ལྡན་པ་གཞན་རྣམས་ལ་གནོད་པར་བྱེད་པ་པོ་ལུས་ཞིག་པ་དང་། ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དེ་ལྟར་འཇིག་རྟེན་པའི་ཡུལ་རྣམས་ལ་འདོད་པ་དང་ལྡན་པས་ནི་མི་རྣམས་ཀྱི་བར་དུ་གཅོད་པར་གྱུར་ཏོ། །འདོད་པ་མི་བཟད་པ་གོམས་པར་བྱས་པ་ནི་སླར་ཡང་རབ་ཏུ་འཕེལ་བར་འགྱུར་ཏེ། ཇི་ལྟར་མེ་རྣམས་ལ་ཤིང་བསྣན་པ་དེ་ལྟ་དེ་ལྟར་རྣམ་པར་འཕེལ་ལོ། །དེ་ཁོ་ན་བཞིན་མི་བཟད་པའི་འདོད་པ་ཇི་ལྟ་ཇི་ལྟར་རྫས་རྣམས་རྙེད་པ་དེ་ལྟ་དེ་ལྟར་ཕྱིར་ཞིང་རབ་ཏུ་འཕེལ་ཏེ། བརྣབ་སེམས་པར་གྱུར་པ་དང་ལྷན་ཅིག་ཏུ་སྤྱོད་པའི་ཕྱིར་རོ། །དེའི་ཕྱིར་ན་སྐྱེས་བུ་ཆོས་བྱེད་པ་རྣམས་ཀྱིས་རབ་ཏུ་བརྩོན་པས་ཀྱང་འདོད་པ་མི་བཟད་པ་རྣམས་རབ་ཏུ་གཞོམ་པར་བྱའོ། །རྒྱུ་གང་གིས་འདོད་པ་འདི་དྲི་མ་རྣམས་ཀྱི་མཆོག་ཡིན་པ་ནི་འདི་ལྟ་སྟེ། ནོར་སྐྱེད་པའི་དྲི་མ་རྣམས་སོ། །དྲི་མ་དེ་དག་གིས་ཉེ་བར་བཅོམ་པའི་སྐྱེས་བུ་རྣམས་ཀྱང་དམྱལ་བར་ཉེ་བར་རྒྱུག་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་གཙུག་ཏོར་ཅན་དེས་ཚིགས་སུ་བཅད་པ་གསུངས་པ།