ཇི་ལྟར་ལྷ་རྣམས་ཀྱི་བར་ཆད་དུ་འགྱུར་ན་འདི་ན་ལེ་ལོ་ཅན་འཇིག་རྟེན་པའི་ལམ་གྱིས་གལ་ཏེ་ན་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་སམ། གལ་ཏེ་ལེགས་པར་བྱས་པ་རྣམས་ལ་དམིགས་པར་གྱུར་པས་སམ། གལ་ཏེ་དེ་ལྟར་སྐྱེས་པར་གྱུར་ལ་དེ་ལེ་ལོ་དེ་ཉིད་ཀྱིས་ཉེ་བར་བཅོམ་པས་ཐམས་ཅད་དུ་འདོད་པའི་སྒྲ་དང་། རོ་དང་། རེག་བྱ་དང་། གཟུགས་དང་། དྲི་རྣམས་ལ་ཡང་ཀུན་དགའ་བར་མི་འགྱུར་རོ། །སྐྱེད་མོས་ཚལ་དགའ་བར་གྱུར་པ་རྣམས་དང་། རྒྱུག་པ་དང་སྙོང་བའི་རང་བཞིན་ཅན་དུ་མི་འགྱུར་རོ། །གླུའི་སྒྲའི་རང་བཞིན་ལ་མི་དགའོ། །གླུ་ལེན་པར་མི་བྱེད་དོ། །ནམ་མཁའི་དཀྱིལ་དུ་འཕགས་པར་མི་བྱེད་དོ། །རིའི་རྩེ་མོ་ནས་རིའི་རྩེ་མོར་མི་འགྲོའོ། །རླབས་ཀྱི་ཕྲེང་བ་ནས་རླབས་ཀྱི་ཕྲེང་བ་རྣམས་ལ་བྱའི་རྒྱབ་ཏུ་ཞོན་ནས་རྩེ་བར་མི་བྱེད་དོ། །བདེ་བ་དེ་ཉིད་ཀྱིས་ཉེ་བར་བཅོམ་པ་དེའི་དྲུང་དུ་ཡང་འཐབ་བྲལ་གྱི་བདག་པོ་འགྲོ་བར་འགྱུར་ལ། དེས་ཡུལ་ཐམས་ཅད་ལས་ཀྱང་ལེགས་པར་སྦྱོར་བར་མི་བྱེད་དོ། །དེ་ལ་ཡུལ་དེ་དག་ཐམས་ཅད་དགྲའི་ཚོགས་སུ་གྱུར་པའི་ལེ་ལོ་འཇིག་རྟེན་པ་རྣམས་ཡིན་ནོ། །ཇི་ལྟར་འཇིག་རྟེན་ལས་འདས་པའི་ལམ་གྱི་བར་ཆད་ཡིན་ན། ལེ་ལོ་ཅན་རྣམས་འདི་ན་ལྷ་གཞན་གང་དག་དམ་པའི་ཆོས་ཉན་པའི་རང་བཞིན་ཅན་དུ་གྱུར་པ་རྣམས་དང་། དེ་དམ་པའི་ཆོས་ལ་དགའ་བར་གྱུར་པ་རྣམས་ལ་ཡང་དེ་དག་ལེགས་པར་སྟེན་པར་མི་བྱེད་དོ། །དེ་དམ་པའི་ཆོས་ལ་ཁ་ཕྱིར་ཕྱོགས་པར་འགྱུར་རོ། །དེས་མ་ཐོས་པའི་ཆོས་རྣམས་མི་ཉན་ནོ། །ཐོས་པ་རྣམས་ཀྱང་འཛིན་པར་མི་བྱེད་དོ། །གོམས་པར་ཡང་མི་བྱེད་དོ། །བླ་མ་ལ་ཉེ་བར་སྟེན་པར་མི་བྱེད་དོ། །ཤེས་པ་དང་རྣམ་པར་ཤེས་པ་དང་ལྡན་པའི་རང་བཞིན་ཅན་མ་ཡིན་ནོ། །དེ་དམ་པའི་ཆོས་ལས་ཕྱི་རོལ་ཏུ་གྱུར་པ་དགེ་བ་ཐམས་ཅད་དང་རྣམ་པར་བྲལ་བ། འཁོར་བ་ན་རྟག་ཏུ་ཡང་འཁོར་བར་གྱུར་པ་སྟེ། རྟག་ཏུ་ཡང་སྡུག་བསྔལ་གྱི་སྐལ་བ་ཅན་དུ་འགྱུར་རོ། །དེ་ཅིའི་ཕྱིར་ཞེ་ན། ཡང་དག་པའི་ལམ་དང་བྲལ་བའི་ཕྱིར་ན་མི་རྟོགས་ཤིང་ཡོངས་སུ་མི་འགྲོལ་ལོ། །དེ་ལེ་ལོས་ཉེ་བར་ཉམས་པས་དམྱལ་བ་དང་། ཡི་དགས་དང་། དུད་འགྲོ་དང་། མི་རྣམས་སུ་སྐྱེ་བར་འགྱུར་རོ། །དེ་རྒ་བ་དང་འཆི་བའི་ཁོག་ཙེས་བཅིངས་པས་ཤིན་ཏུ་སྡུག་བསྔལ་བས་ཡོངས་སུ་འཁྱམ་མོ།