།བསྡམས་མིན་རང་བཞིན་ཞགས་པ་ཡིས། །དྲི་མ་མཁས་པས་ནམ་སྤངས་པ། །ཚུལ་ཁྲིམས་འཆལ་པ་སྡིག་པ་ཅན། །ཚུལ་ཁྲིམས་སྤངས་པས་འདྲེན་པར་བྱེད། །བསྡམས་པ་མེད་པར་ཚུལ་འཆལ་བ། །སྡིག་པ་དང་ནི་ལྷན་ཅིག་འགྲོགས། །འདོད་པ་རྣམས་ནི་སྟེན་པ་ཡང་། །འདི་དག་དམྱལ་བའི་ཕོ་ཉ་ཡིན། །མ་བསྡམས་པ་དང་རྨོངས་པ་དང་། །རྩབ་ཧྲལ་གྱི་ནི་ཁྱད་པར་གྱིས། །སྡིག་པའི་ལས་དང་མངོན་ལྡན་པ། །དམྱལ་བ་ཤིན་ཏུ་རིང་བ་མིན། །ལས་རྣམས་ཅི་འདྲའི་འབྲས་ཡིན་ན། །ཅི་ཡི་ཕྱིར་ན་དེར་མི་འགྲོ། །བདག་ཉིད་འཇོམས་བྱེད་ཀུན་རྨོངས་པ། །གང་ལ་དགའ་བས་རྣམ་པར་རྨོངས། །སྡིག་པའི་ཆུ་བོ་བཟོད་དཀའ་བ། །ཉིན་དང་མཚན་དུ་འཕེལ་བ་ཡིན། །སྡུག་བསྔལ་རླབས་ཕྲེང་རྦ་རླབས་ཅན། །དེས་ཀྱང་རང་གི་སྐྱེ་བོ་འཕྲོག །གང་དག་གིས་ནི་ཆོས་བསླུས་པའི། །དེ་རྣམས་ཡིད་ནི་བདེ་མ་ཡིན། །སྡོམ་པ་མེད་གནས་སྐྱེས་བུ་ནི། །དགེ་བའི་ཆོས་རྣམས་རྣམ་པར་སྤངས། །དགེ་བའི་ལམ་འདི་བདེ་ལེགས་ཡིན། །ཆོས་གང་གོ་འཕང་བདག་ཉིད་ཅན། །གོ་འཕང་དེ་ཐོབ་རྗེས་སྐྱེས་པ། །འགྱུར་མེད་གོ་འཕང་རབ་ཏུ་འགྲོ། །རང་འབྱུང་བསྙེན་གནས་བསམ་གཏན་དང་། །གང་ཞིག་དམ་པའི་སྤྱོད་མངོན་དགའ། །སྡོམ་པ་ལ་གནས་རྟག་ཏུ་དུལ། །དེ་རྣམས་ལ་ནི་སྡུག་བསྔལ་མེད། །སྡོམ་མིན་དྲི་མ་འདི་དག་གིས། །དྲི་མ་བྱེད་པའི་མི་གང་ནི། །བསླབ་པའི་གཞི་ལས་ཡོངས་ཉམས་པ། །དེ་ནི་དམྱལ་བའི་སྐལ་ལྡན་ཡིན། །དེ་ལྟར་རྟོགས་ནས་མི་རྣམས་ཀྱིས། །སྡོམ་པ་ཐམས་ཅད་རབ་ཏུ་སྒྲུབས། །སྲིད་པའི་རྒྱ་མཚོ་ཐམས་ཅད་དུ། །གང་ཕྱིར་སྡོམ་དེ་ཉམས་མྱོང་འགྱུར། །དེ་ལྟར་མི་རྣམས་ཐམས་ཅད་ལ་མ་བསྡམས་པས་འཇིག་རྟེན་ལས་འདས་པའི་ལམ་ལ་བར་ཆད་བྱེད་པར་འགྱུར་རོ། །ཇི་ལྟར་སྡོམ་པ་མ་ཡིན་པས་ལྷ་རྣམས་ཀྱི་བར་ཆད་བྱེད་པར་འགྱུར་ན། འདི་ན་ལས་དང་འབྲས་བུའི་ས་པའི་འཇིག་རྟེན་འདིར་ཚུལ་ཁྲིམས་རྣམ་པ་བདུན་པོ་རྣམས་ཀྱིས་ཉེ་བར་བསྐྱེད་པའི་བདེ་བ་གང་ཡིན་པ་དེ་མཐོ་རིས་འདིར་བག་མེད་པར་གནས་པས་ཟད་པར་བྱེད་དོ། །དེ་དག་རྣམས་ཀྱི་དེ་ཟད་པ་དང་སླར་ཡང་མི་འབྱུང་སྟེ། ཇི་ལྟར་མར་མེའི་སྣུམ་དང་སྡོང་བུ་ཟད་པས་འོད་ཟེར་ཟད་པར་འགྱུར་རོ།