།དེ་སྐྱེ་བོ་ཐམས་ཅད་ལ་བརྣབ་སེམས་དང་གནོད་སེམས་མང་བར་འགྱུར་རོ། །ཕྱིན་ཅི་ལོག་ཏུ་དོགས་པ་འཆལ་བ་དང་། ཡོངས་སུ་རྟོག་པ་དང་། བློ་གདུག་རྩུབ་ཅན་དུ་འགྱུར་རོ། །དེ་སེམས་ཅན་ཐམས་ཅད་ལ་ཞེ་འགྲས་པ་དང་། གནོད་སེམས་དང་། ང་རྒྱལ་དང་། བཞིན་རྣམ་པར་འགྱུར་ཞིང་གདུག་པ་དང་། རང་གི་ཡིད་རྣམ་པར་གཡེང་བ་དང་། དབུལ་བར་འགྱུར་རོ། །དེ་སྡོམ་པ་མ་ཡིན་པའི་རྒྱུས་དེ་དག་རྣམས་ཀྱིས་ལུས་ཞིག་ནས་ཤི་བའི་འོག་ཏུ་ཐབས་མ་ཡིན་པར་ལྷུང་ནས་དམྱལ་བར་སྐྱེ་བར་འགྱུར་རོ། །དེའི་ཕྱིར་ན་རྟག་ཏུ་ཕན་པར་འདོད་པའི་སྐྱེས་བུས་སྡོམ་པ་འཇིག་རྟེན་པ་རྣམས་ཀྱང་བསྲུང་བར་བྱའོ། །སྡོམ་པ་ལ་གནས་པའི་རྒྱུ་དེས་ཡིད་ཤིན་ཏུ་བརྟན་པར་འགྱུར་རོ། །སེམས་ཀྱི་རྒྱུད་ཤིན་ཏུ་བཟང་བར་ཤེས་ནས་ཀྱང་གྲོགས་པོ་རྣམས་ཀྱིས་ཀྱང་ཡིད་ཆེས་པར་འགྱུར་རོ། །མཆོག་ཏུ་གསང་བར་གྱུར་པའི་རྒྱལ་པོའི་དོན་མཆོག་ཏུ་རྒྱ་ཆེ་བའི་རིན་པོ་ཆེ་རྣམས་སམ། གསེར་དང་རྫས་ཀྱི་རིགས་གཞན་རྣམས་ལ་ཡང་རུང་སྟེ། སྡོམ་པའི་སེམས་དང་ལྡན་པ་ལ་ཀུན་གཏོད་པར་བྱེད་དོ། །བྱས་ནས་ཀྱང་ཞེ་སྡང་བ་རྣམས་ཀྱིས་དེ་དག་ཇི་ལྟ་བ་བཞིན་དུ་སྡོམ་པར་བྱེད་པ་རྣམས་ལ་གནོད་པ་བྱ་བར་ཡང་མི་ནུས་སོ། །གྲོས་བློ་རྣམས་ཀྱིས་ཀྱང་སྡོམ་པ་འཇིག་པར་མི་བྱེད་ལ། རང་གི་སྐྱེ་བོ་དང་། གྲོགས་པོ་དང་། ཡིད་འཐུན་པ་རྣམས་ཀྱིས་ཀྱང་འཇིག་པར་མི་བྱེད་ཀྱི་ལེགས་པར་གནས་པ་དང་ལྡན་པ་དེ་ལ་གཉེན་བཤེས་ཀྱི་སྐྱེ་བོ་རྣམས་ཀྱིས་མཆོད་པར་བྱེད་དོ། །ཡིད་ཆེས་པའི་གནས་སུ་འགྱུར་རོ། །སློབ་དཔོན་བཞིན་དུ་ཡང་སློབ་དཔོན་རྣམས་ཀྱིས་ཀྱང་ལེགས་པར་སྒྲུབ་པར་བྱེད་དོ། །སྡོམ་པ་བདུན་འཛིན་པ་རྣམས་ནི་རྒྱལ་པོས་ཀྱང་མཆོད་པར་བྱེད་དོ། །གྲོགས་པོ་དང་། སྐྱེ་བོ་དང་། གཉེན་བཤེས་རྣམས་ཀྱིས་ཀྱང་དེ་བཞིན་ཏེ། དེ་ལ་སྐྱེ་བོ་ཐམས་ཅད་ཀྱིས་ཕུན་སུམ་ཚོགས་པར་རྫས་སྒྲུབ་པར་བྱེད་དོ། །འདི་ལ་ཡང་དོན་མ་ཡིན་པ་ཅུང་ཟད་ཙམ་ཡང་བྱ་བར་མི་ནུས་སོ། །དེ་མཆོག་ཏུ་ནོར་དང་ལྡན་པར་འགྱུར་རོ། །དེ་རྫས་རྣམས་ཕུན་སུམ་ཚོགས་པས་སྦྱིན་པ་ནི་གཏོང་བར་བྱེད་དོ། །བསོད་ནམས་དག་ནི་བྱེད་དོ། །གཅིག་ཏུ་ལེགས་པར་གནས་པའི་བློ་ཉམས་པ་མེད་པའི་རྒྱུ་དེ་དག་དང་གླེང་གཞི་དེ་ལས་ལུས་ཞིག་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་ལྷ་རྣམས་སུ་སྐྱེའོ།