དེ་དང་བྲལ་བའི་ཡིད་ཀྱིས་བག་མེད་པ་བག་མེད་པར་རྒྱུ་བ་སངས་རྒྱས་འབྱུང་བ་དང་བྲལ་བར་གྱུར་པ་མཐོང་བ་བག་མེད་པ་གོམས་པར་གྱུར་པ་སྲིད་པའི་གདུང་བའི་སྡུག་བསྔལ་ཆེན་པོ་ཉེ་བར་གནས་པ་རྣམས་ལ་འཆི་བའི་ལྟས་བྱུང་བའི་འབྲལ་བར་འགྱུར་བའི་སྡུག་བསྔལ་རབ་ཏུ་འབྱུང་བས་བུད་མེད་རྣམས་ཀྱི་ཚོགས་ཀྱིས་ཡོངས་སུ་སྤངས་པར་གྱུར་པའི་འཇིགས་པ་ཆེན་པོ་ཉེ་བར་གནས་པ། འོབས་བཞིན་དུ་རབ་ཏུ་ལྷུང་བར་གྱུར་པ་ན་གང་དག་བཤད་པའི་ཡུལ་ལ་ཉེ་བར་སྤྱོད་པ་དེ་དག་གི་ཚོགས་པ་དེ་རྣམས་ཀྱང་ལན་བརྒྱར་ཡང་མི་མཐོང་བར་དེ་འཇིག་རྟེན་གཞན་དུ་འགྲོ་བར་འགྱུར་ལ། དེ་དག་རྣམས་རྗེས་སུ་འགྲོ་བ་མ་ཡིན་པ་དང་འཆི་བའི་དུས་ན་བདེ་བ་རྣམས་ཤེས་པ་ཡང་མ་ཡིན་ནོ། །དབུགས་འབྱིན་པར་ཡང་མི་འགྱུར་རོ། །ཡུལ་དེ་དག་རྣམས་ནི་ཉམས་པ་ཡིན་ཞིང་ཡུལ་རྣམས་ནི་སྐྱུགས་པ་དང་རྣག་ཏུ་གྱུར་པའོ། །ཡང་སྲིད་པར་ཀུན་ཏུ་སྐྱེད་པ་དང་། དེ་ལས་འབྱུང་བར་འགྱུར་བ་གང་ཡིན་པ་དེ་ནི་བག་མེད་པས་བག་མེད་པར་གནས་པས་བྱས་པའི་ལས་དེས་ཀུན་ནས་གནས་པས་སྲིད་པ་གཞན་དུ་འགྲོ་ཞིང་རྗེས་སུ་འགྲོ་སྟེ། དེ་ཡུལ་གྱི་སྲེད་པའི་ཟུག་ཟེར་གྱིས་བག་མེད་པས་དུས་བྱེད་པར་འགྱུར་རོ། །ཡོངས་སུ་བཏང་ཞིང་ལྷ་ཐམས་ཅད་ཀྱིས་ཡོངས་སུ་བཏང་བ་དང་། ཀུན་ནས་སྐྲག་པ་དང་། ཡུལ་གྱིས་ཀུན་ནས་རྨོངས་པས་ཀྱང་དུས་བྱེད་དེ། དེ་དུས་ཀྱི་ཆོས་དང་ལྡན་པས་དམྱལ་བ་དང་ཡི་དགས་དང་། དུད་འགྲོ་རྣམས་སུ་སྐྱེའོ། །དེ་ལྟ་བས་ན་མིའམ་ལྷ་ཡང་རུང་སྟེ། བག་མེད་པ་མི་བྱའོ། །དེ་ནས་དེའི་ཚེ་བཅོམ་ལྡན་འདས་གཙུག་ཏོར་ཅན་དེས་ཚིགས་སུ་བཅད་པ་བརྗོད་པ། ཇི་ལྟར། ལྷ་རྣམས་ཡུལ་གང་བདེ་བ་ཡིས། །རྟག་པ་ཉིད་དུའང་སྟེན་བྱེད་པ། །དེ་ནི་ཉམས་དང་དེ་ནས་ཀྱང་། །ལས་རྣམས་འགྲོ་ཞིང་རྗེས་སུ་འགྲོ། །བདེ་བ་རྣམས་ལ་བསགས་པ་མེད། །ལས་རྣམས་ལ་ནི་བསགས་པ་ཡོད། །བདེ་བ་ཡིས་ནི་རྨོངས་པའི་ལྷ། །ལས་རྣམས་ཀྱི་ནི་དབང་གིས་འགྲོ། །ད་ལྟར་བ་ཡི་ཡུལ་གྱི་བདེ། །དེ་ནི་དགེ་བ་བྱེད་མིན་པས། །ཡུལ་རྣམས་ཀྱིས་ནི་ལེགས་སྐོམ་ལྷ། །དེ་བཞིན་རྣམ་པར་གཡེང་ཡིད་ཅན། །