བཅོམ་ལྡན་འདས་གཙུག་ཏོར་ཅན་གྱི་སྐུ་གཟུགས་བཻ་ཌཱུརྱའི་རང་བཞིན་དང་ཨིན་དྲ་ནཱི་ལའི་ཡང་རང་བཞིན་གྱི་གདན་ཆེན་པོ་ལ་ཉེ་བར་ཞུགས་པ་སྐྱིལ་མོ་ཀྲུང་ལེགས་པར་བཅས་པ་དེའི་རྩིག་ངོས་ལ་ཡང་མདོ་མངོན་པར་བྲིས་པ་ཇི་ལྟར་བརྒྱད་པོ་འདི་ནི་དགེ་སློང་དག་ལྷ་དང་མི་རྣམས་ཀྱི་ཡང་དགེ་བའི་ཆོས་རྣམས་ཀྱི་བར་དུ་གཅོད་པ་ཡིན་ཏེ། དེ་ལ་བརྒྱད་པོ་གང་ཞེ་ན་འདི་ལྟ་སྟེ། དགེ་སློང་དག་དང་པོ་ཉིད་དུ་བག་མེད་པ་བག་མེད་པས་ཉེ་བར་བཅོམ་པའི་ལྷའམ། མི་རྣམས་ཀྱང་རུང་སྟེ། གང་དགེ་བ་རྗེས་སུ་སྒྲུབ་པ་ན་འཇིག་རྟེན་གྱི་ཡང་མ་ཡིན་ལ་འཇིག་རྟེན་ལས་འདས་པའི་ཡང་མ་ཡིན་ཏེ། འཇིག་རྟེན་པའི་ནི་ལེ་ལོས་བག་མེད་པ་བག་མེད་པར་གནས་པས་ལས་ཀྱི་མཐའ་རྣམས་འགྲིབ་པར་འགྱུར་ཏེ། གང་མཛའ་བོ་ཡིན་པ་དེ་དག་རྣམས་ལ་མ་བལྟས་པས་དེ་དག་ནི་བར་མར་གནས་པར་འགྱུར་རོ། །གང་ཡང་དགྲ་བོ་ཡིན་པ་དེ་དག་རྣམས་ནི་ཆེས་མི་བཟད་པར་གྱུར་ནས་གོ་སྐབས་དག་ཚོལ་ཞིང་གླགས་རྣམས་གཅོད་པར་འགྱུར་བས་བག་མེད་པ་དང་བག་མེད་པར་རྒྱུ་བ་དེ་དག་རྣམས་ཀྱི་ཡང་འཇིག་རྟེན་པའི་ཆོས་ཀྱི་ལས་ཀྱི་མཐའ་རྣམས་དེ་བཞིན་དུ་འགྱུར་རོ། །དེ་ལས་ཀྱི་མཐའ་ཉམས་པ་དང་། དགྲ་བོ་རྣམས་ཕལ་ཆེ་བ་དང་། གཉེན་འབྲེལ་རྣམས་ཡོངས་སུ་ཉམས་པ་དང་། དབུལ་པོ་དང་གཞན་ཁ་དྲག་པར་ཡང་འགྱུར་རོ། །ཁ་ཉེན་པ་རྣམས་མཐར་ཐུག་པ་ནི་འདི་ཡིན་ཏེ། འདི་ལྟར་དབུལ་པོ་ཞེས་བྱ་བའོ། །དབུལ་བས་དངངས་པའི་སྐྱེས་བུ་ནི་གྲོགས་བཤེས་དང་། གཉེན་བཤེས་དང་རྩ་ལག་རྣམས་དབང་ཆེ་བར་འགྱུར་རོ། །བརྣབ་སེམས་དང་། གནོད་སེམས་དང་། ལོག་པར་ལྟ་བ་རྣམས་རབ་ཏུ་ཕལ་ཆེ་བར་འགྱུར་རོ། །དེ་མི་དགེ་བ་སྤྱོད་པ་པོ་ཞེས་ཟེར་ནས་བློ་གྲོས་ངན་པ་དེ་ལ་ལྷ་རྣམས་སྡང་བར་འགྱུར་ཏེ། ལྷ་རྣམས་ཐམས་ཅད་ཀྱིས་མི་དགེ་བ་སྤྱོད་པ་དེ་ཡོངས་སུ་སྤོང་བར་འགྱུར་ལ་སེམས་ཅན་འཚེ་བ་པོ་རྣམས་ཀྱིས་དེ་གཙེས་པས་དུས་བྱེད་པར་འགྱུར་རོ། །ཚོང་པ་ཡིན་པར་གྱུར་ན་ཡང་བག་མེད་པས་བག་མེད་པའི་སྤྱོད་པས་བར་སྐབས་སུ་ནོར་ཉམས་པར་འགྱུར་རོ། །འདི་ན་བག་མེད་པས་དགེ་སློང་ངམ་གཞན་ཡང་རུང་སྟེ། དགེ་བསྙེན་རྣམས་ཀྱང་བསམ་གཏན་བྱེད་པ་ན་བརྩོན་པ་དང་ལྡན་པར་མི་འགྱུར་རོ། །ལུང་དུ་བསྟན་པའི་བསམ་གཏན་གྱིས་ཟག་པ་རྣམས་ཟད་པར་བྱེད་པ་ནི་མ་ཡིན་གྱི་ཟས་ཀྱི་རོ་རྣམས་འབའ་ཞིག་ལ་ཆགས་པས་ཟས་ཀྱི་དུས་ལ་ཤིན་ཏུ་ཡང་ལྟའོ།