གང་ན་རི་དེ་ཡོད་པར་རབ་ཏུ་དགའ་བའི་ཡིད་ཀྱིས་མཆོག་ཏུ་གསལ་བ་དང་ལྡན་པ་དེའི་གཟི་བརྗིད་འབར་བར་གྱུར་པ་རང་གི་ལས་ལ་ལོངས་སྤྱོད་པས་གང་ན་རྒྱུན་གྱི་རིའི་སྟེང་དེར་འཕྱོ་བའི་སེམས་ཀྱིས་འབབ་པར་བྱེད་དོ། །ཕྱིན་ནས་ཀྱང་མཆོག་ཏུ་རྫུ་འཕྲུལ་ཆེ་བས་ཡན་ལག་ལྔ་དང་ལྡན་པའི་རྔ་སྐད་དང་ཡང་དག་པར་ལྡན་པས་ཕྱོགས་འཇིག་པར་བྱེད་པ་དྲི་མཆོག་གིས་ཀྱང་གསལ་བར་བྱེད་དོ། །ནམ་མཁའི་དཀྱིལ་ན་སྐར་མ་བས་ཆེས་ལྷག་པའི་ལུས་རྩེ་བ་དང་ལྡན་པས་འཁོད་པར་བྱེད་དོ། །འཁོད་ནས་རྫུ་འཕྲུལ་དང་ལྡན་པས་མཆོག་ཏུ་ལེགས་པར་བྱས་པའི་ལས་དང་ལྡན་པས་གང་ནས་དེ་མཐོང་བར་འགྱུར་བའི་རིའི་རྒྱབ་ན་དྲིལ་བུ་གཡེར་ཀ་རྣམས་དང་། འབབ་ཆུ་དང་། ཆུ་ཀླུང་དང་། རྫིང་བུ་དང་། ཚལ་དང་། འཇུག་ངོགས་དང་། མེ་ཏོག་དང་། བྱའི་སྒྲ་སྐད་ཕུན་སུམ་ཚོགས་པ་དང་། ལྷ་རྫས་མཆོག་གི་དྲི་དང་། རབ་ཏུ་དང་བ་དང་། ཉེ་འཁོར་ཡང་ཀུན་ཏུ་མཉམ་པ་དང་། འོད་དང་ལྡན་པའི་རི་དེའི་རྒྱབ་ཏུ་ཕྱིན་ནས་སླར་ཉིད་ཀྱང་ནམ་མཁའ་ལ་འཁོད་དོ། །མཆོག་ཏུ་སྐྱིད་པའི་ལྷན་ཅིག་སྤྱོད་པའི་གྲོགས་རྣམས་དང་བཅས་པ་ལ་ལྷ་ཁ་ཅིག་གི་ནི་བརྒྱ་ཁོ་ནའོ། །གཞན་གྱི་ནི་ཉིས་བརྒྱའོ། །དེ་མིན་རྣམས་ཀྱི་ནི་སུམ་བརྒྱའོ། །དེ་བཞིན་དུ་རང་གི་ལས་ཀྱི་ཁྱད་པར་གྱིས་ཁྱད་པར་དུ་གྱུར་པ་ཡིན་ནོ། །ལྷན་ཅིག་སྤྱོད་པའི་འཁོར་འཕེལ་བ་དང་འགྲིབ་པ་ནི་གཞན་ཁ་ཅིག་གི་ནི་སྟོང་ངོ་། །གཞན་གྱི་ནི་སྟོང་ཕྲག་གཉིས་སོ། །གཞན་རྣམས་ཀྱི་ནི་སྟོང་ཕྲག་གསུམ་སྟེ། དེ་ལྟར་ཇི་སྲིད་དུ་སྟོང་ཕྲག་ཉི་ཤུར་འགྱུར་རོ། །རྣམ་པ་སྣ་ཚོགས་པའི་གར་དང་རྔ་སྐད་ཀྱི་སྒྲས་བསྒྲགས་པར་གྱུར་པ་ན་དགའ་ཞིང་གླུ་ཡང་ལེན་པས་ནགས་ནས་ནགས་གཞན་ཉེ་བར་སྟེན་ཏོ། །དེ་བཞིན་དུ་པད་མའི་ནགས་ནས་རྩི་བྱེད་པད་མའི་ནགས་རྣམས་སུ་འགྲོ་ལ་རྩི་འབྱུང་བ་དང་ཡང་དག་པར་ལྡན་པ་རྣམས་ནས་རྩིའི་ནགས་སུ་འགྲོ་བར་འགྱུར་ཏེ། ལྷ་དེ་དག་རྣམས་རྔ་སྐད་ཡན་ལག་ལྔ་ཉེ་བར་སྒྲོགས་པར་གྱུར་པའི་རི་དེའི་རྒྱབ་དེ་ན་གཞན་དགའ་བ་ལྷག་པར་གྱུར་པའི་ཁམས་མཆོག་དང་རབ་ཏུ་ལྡན་པར་གྱུར་པ་རྣམས་ལ་འདི་ལྟ་སྟེ། གང་དག་རྡོ་ཡིན་པ་དེ་དག་རྣམས་ནི་ཐམས་ཅད་ཀྱང་རིན་པོ་ཆེའི་རང་བཞིན་མཆོག་ཏུ་རྣམ་པར་བཀྲ་བའི་ཆ་ཤས་ཀྱི་སའི་ཆ་རྣམས་ཡིན་ནོ།