འདོད་པའི་སྐྱོན་ཡང་ཐམས་ཅད་དང་། །སྲེད་པའི་སླུ་བྱེད་རྣམས་ལས་དང་། །སྲིད་པའི་མཚོ་ལས་ཆགས་བྲལ་གྱིས། །མྱང་བར་དགའ་བ་འདི་དག་ཀྱང་། །དམྱལ་བ་ཡི་ཡང་རྒྱུ་རྣམས་ཡིན། །འདོད་པའི་ཡུལ་གྱི་འགྱུར་ལྡོག་དེས། །ལྡོག་པར་བྱེད་པས་སྦྲུལ་དང་འདྲ། །དེ་ལ་སྡུག་བསྔལ་འདི་རྟོགས་ནས། །འཆི་བདག་སྟོབས་ལས་སྟོབས་མེད་པའི། །སེམས་འདི་ལེགས་པར་འདུལ་བར་གྱིས། །དེ་ཡིས་འགྲོ་བ་འདི་འཁོར་བྱེད། །ནགས་དང་ཉེ་ནགས་བྲག་རྣམས་དང་། །གཞལ་ཡས་ཁང་ཡང་ཐམས་ཅད་ལས། །དུས་ཀྱི་མེ་ཡིས་རྣམ་ལྟུང་བའི། །ལྷ་རྣམས་ཐམས་ཅད་ལྟུང་བར་འགྱུར། །བག་མེད་ཡིད་ཅན་རྨོངས་པ་ཡིས། །ཕྱིར་ཞིང་ཡུལ་རྣམས་དག་གིས་སླུ། །སྲེད་པའི་ཞགས་པས་དམ་བཅིངས་ནས། །ལྷ་རྣམས་ངན་འགྲོ་དག་ཏུ་ལྟུང་། །དེ་ནས་ལྷ་དེ་བཻ་ཌཱུརྱ་ཆེན་པོ་དེར་ཚིགས་སུ་བཅད་པ་འདི་དག་རྣམས་ཐོས་ནས་གང་དགེ་བ་གོམས་པའི་སེམས་དང་ལྡན་པ་དེ་ཐོས་པ་དང་དེ་ལྟར་མཆོག་ཏུ་སྐྱོ་བར་འགྱུར་རོ། །གང་ཡང་ཡུལ་ལ་ཀུན་ཏུ་རྨོངས་པ་དེ་ཡུལ་དེ་ཉིད་ཀྱིས་རྨོངས་པས་སླར་ཡང་དེ་ཉིད་ལ་དགའ་ཞིང་ཀུན་ཏུ་སྤྱོད་དོ། །དེ་ནས་དེ་དག་འཇིག་རྟེན་ཐམས་ཅད་པར་སོང་ནས་ནོར་བུ་ཉེ་བར་བསྐོར་ནས་གཞན་ཡང་ནོར་བུ་འདིའི་འོད་རྣམ་པ་དེ་སྲིད་དུ་གྱུར་པ་ལ་ལྷ་མཆོག་ཏུ་ངོ་མཚར་སྐྱེས་ཏེ། དེ་ནས་ལྷ་དེ་རྣམས་རང་བཞིན་ཁོ་ནས་བག་མེད་པར་གནས་པར་འགྱུར་བས་ཡུལ་དུ་མའི་བདེ་བ་ལ་རྣམ་པར་རྟོག་པ་དུ་མས་རྣམ་པ་དུ་མར་དགའ་བར་བྱེད་དོ། །བདེ་བ་གང་ཡིན་པའི་བདེ་བ་ཡང་དཔེ་བརྗོད་པར་བྱ་བར་ནུས་པ་མ་ཡིན་ནོ། །དེ་ནས་ལྷ་དེ་དག་རྣམས་ཕྱིར་ཡང་བག་མེད་པར་གནས་པར་གྱུར་པས་སྣ་ཚོགས་པའི་རྔ་སྒྲ་དང་། རོལ་མོའི་སྒྲ་ཉེ་བར་བསྒྲགས་པར་གྱུར་པས་གང་ན་ཆུ་ཆེན་པོ་ཞེས་བྱ་བའི་ཆུ་ཀླུང་དེར་ཉེ་བར་འགྲོའོ། །བག་མེད་པ་བརྟན་པོའི་སྲེད་པའི་ཞགས་པས་ཤིན་ཏུ་དྲངས་པར་གྱུར་པ། ཡུལ་ལ་ལྟ་བ་བརྟན་པོ་ཐོགས་པ་མེད་པའི་དུས་ནས་གོམས་པ་དེས་དྲངས་པར་གྱུར་པས་གང་ན་ཆུ་ཆེན་པོའི་ཆུ་ཀླུང་ཡོད་པ་དེར་ཉེ་བར་ལེགས་པར་འགྲོ་བ་རྣམ་པ་སྣ་ཚོགས་པའི་རྔ་སྒྲ་དང་གླུས་སྦྲེལ་བའི་སྙིང་ཕན་ཚུན་ལྷན་ཅིག་ཏུ་དགའ་བར་བྱེད་དོ། །