།གཞན་ནི་རྔ་སྐད་ཡན་ལག་ལྔ་པ་རྗེས་སུ་ཆགས་པས་དེ་གང་གིས་འདོད་པ་ཀུན་ཏུ་སྐྱེད་པས་ཡོངས་སུ་སྐོར་ཞིང་ལྷན་ཅིག་སྤྱོད་པ་རྣམས་ཀྱང་རྒྱན་དང་ཆ་ལུགས་དུ་མའི་གཟུགས་འཛིན་པ་མང་པོ་རྣམས་ཀྱིས་ཡོངས་སུ་བསྐོར་ནས། གང་ན་རྒྱལ་པོ་དེ་འོང་བར་གྱུར་པ་དེར་འགྲོ་བར་འགྱུར་རོ། །ལྷ་གཞན་ནི་རང་ཉིད་ཁོ་ན་ལྷའི་རྙིང་པ་མེད་པ་མེ་ཏོག་ལྷ་རྫས་ཀྱི་དྲི་དང་ལྡན་པའི་མེ་ཏོག་གི་ཆར་འབེབས་པར་འགྱུར་ཞིང་གང་ན་འཐབ་བྲལ་བའི་མངའ་བདག་འོང་བར་གྱུར་པ་དེར་ཉེ་བར་ལེགས་པར་འགྲོ་བའོ། །ཡང་ལྷ་གཞན་ནི་གསེར་གྱི་རྔ་ཆེན་པོ་དང་པི་བང་དང་ཁར་རྔ་དང་སིལ་སྙན་དང་། གཞན་གྱི་སྒྲ་སྙན་པ་དང་གླུ་ལེན་པ་དང་ལྡན་པས་གང་ན་འཐབ་བྲལ་བའི་བདག་པོ་མུ་སུ་ལུན་དྷ་འོང་བ་དེར་ཉེ་བར་འགྲོ་བའོ། །ཡང་ལྷ་གཞན་མེ་ཏོག་དྲིར་ལྡན་ཆེན་པོའི་ཆང་གིས་མིག་རྣམ་པར་འགྱུར་བ་རྣམས་ལྷ་རྫས་ཀྱི་ཕྲེང་བ་ཐོགས་ནས་ནམ་མཁའ་ལ་གནས་པའི་གོས་རླུང་གིས་རྣམ་པར་གཡོ་བར་གྱུར་པས་གང་ན་འཐབ་བྲལ་གྱི་བདག་པོ་དེ་ཡོད་པར་ཉེ་བར་འགྲོ་བར་འགྱུར་རོ། །ཡང་ལྷ་གཞན་ནི་ནམ་མཁའི་དབྱིངས་སུ་འཕགས་ནས་འཐབ་བྲལ་གྱི་མངའ་བདག་མུ་སུ་ལུན་དྷ་གང་ན་བ་དེར་འགྲོའོ། །དེ་ལྟར་ལྷ་དུ་མ་རྣམས་རྒྱན་དང་ཆ་བྱད་དུ་མ་དང་གཟུགས་དུ་མ་རྣམས་ཀྱིས་ཏེ། ཇི་ལྟར་ལས་དམན་པ་དང་འབྲིང་དང་ཁྱད་པར་དུ་འཕགས་པས་གཟུགས་དང་ཆ་བྱད་དང་རྒྱན་དང་ལྡན་པ་རྣམས་གང་ན་འཐབ་བྲལ་གྱི་མངའ་བདག་དེ་ཡོད་པ་དེར་མཆོད་པ་རྣམས་བྱ་བའི་རྒྱུ་མཚན་གྱིས་སོ་སོ་ནས་ཉེ་བར་ལེགས་པར་འགྲོ་བའོ། །དེ་ནས་ལྷའི་རྒྱལ་པོ་དེ་ལྷའི་ཚོགས་ཐམས་ཅད་ཀྱིས་མངོན་པར་བསྟོད་པར་གྱུར་ཅིང་གང་ན་རྩེ་མོ་དེ་ཡོད་པ་དེར་ལེགས་པར་ཕྱིན་ནོ། །རྩེ་མོ་དེ་ཡང་ཕྱིར་ཞིང་ཉིད་དུ་ཤིན་ཏུ་དགའ་བར་ལྷའི་རྒྱལ་པོ་དེས་མངོན་པར་མཐོང་བར་འགྱུར་རོ། །མངའ་བདག་དེས་སེམས་ཅན་རྣམས་ལ་འདོད་པའི་ཡོན་ཏན་དང་ལྡན་པའི་ཡུལ་ལྔའི་བདེ་བ་ལ་ཉེ་བར་ལོངས་སྤྱོད་པར་བྱེད་དེ། དཔེ་མེད་པ་རྣམ་པ་དུ་མའི་ལྷ་རྫས་རྣམས་ལེགས་པར་བྱས་པའི་ལས་ཀྱི་མཐུས་ཉི་མ་རེ་རེ་ལ་འཕེལ་བར་འགྱུར་བའི་ནགས་དང་ཉེ་བའི་ནགས་དང་། མཚེའུ་དང་པད་མའི་ནགས་ལ་འདོད་པ་དུ་མ་ལོངས་སྤྱད་ནས་ལྷ་རྣམས་དང་ལྷན་ཅིག་རྩེས་པར་གྱུར་པས་འཐབ་བྲལ་གྱི་མངའ་བདག་དེ་གང་ན་འཇིག་རྟེན་ཐམས་ཅད་པའི་རྩེ་མོའི་སྟེང་གིས་ཡོད་པ་དེར་ཉེ་བར་ལེགས་པར་འགྲོ་བར་འགྱུར་རོ།