།དེ་ལྟར་ན་ཇི་ལྟར་མྱ་ངན་མེད་དམར་པོའི་མདོག་ཀུན་ནས་འབར་བས་ཀྱང་བཅུ་དྲུག་གི་ཆར་ཡང་མི་ཕོད་དོ། །དེ་ཁོ་ན་བཞིན་དུ་འདི་དག་རྣམས་དེ་ལ་རྣམ་པ་དུ་མར་ལྷའི་བདེ་བ་ཉམས་སུ་མྱོང་བར་བྱེད་ལ་དེ་ནས་སླར་ཡང་ལྷ་གསར་དུ་སྐྱེས་པ་དེ་གང་ན་འཐབ་བྲལ་གྱི་མངའ་བདག་ཡོད་པ་དེར་ལྷན་ཅིག་སྤྱོད་པའི་འཁོར་དང་བཅས་པ་རྣམས་ཉེ་བར་ལེགས་པར་འགྲོ་བའོ། །ཕྱིན་ནས་ཀྱང་སྤྱི་བོའི་སྟེང་དུ་ཐལ་མོ་སྦྱར་བ་བྱས་ནས་ཕྱག་འཚལ་ལོ། །དེ་ནས་ཕྱག་འཚལ་བའི་གསར་དུ་སྐྱེས་པ་དེ་ལ་མུ་སུ་ལུན་དྷས་ཚིགས་སུ་བཅད་པ་སྨྲས་པ་ཇི་ལྟར། ཚུལ་ཁྲིམས་ཡོན་ཏན་གསུམ་ལྡན་པ། །གང་ཞིག་སྔོན་བྱས་པ་ཡི་ལས། །ལས་དེའི་རྣམ་པར་སྨིན་པ་ནི། །བདེ་བ་འདི་དག་ཉེ་བར་གནས། །བག་མེད་དབང་དུ་འགྲོ་བ་ཡིས། །དེ་ཟད་པར་ནི་མི་བྱའོ། །ཕྱིར་ཞིང་དགེ་བའི་ལས་གཞན་ཡང་། །རབ་ཏུ་བརྩོན་པས་དེ་དག་བྱ། །དགེ་བའི་ལས་རྣམས་བཟང་པོ་ཡིན། །མི་དགེ་བ་ཡང་སྤང་བར་བྱ། །དགེ་དང་རྗེས་འབྲལ་བདེ་བའི་མཆོག །མི་དགེས་ཇི་བཞིན་དོན་མིན་ཡིན། །སྟོབས་དང་སྤྲོ་བ་མ་ལོག་པར། །མི་གང་དགེ་བའི་ལས་བྱེད་པ། །དེ་ནི་རྟག་ཏུ་བདེ་འགྱུར་དང་། །མྱ་ངན་འདའ་བར་འགྲོ་བ་ཡང་། །གང་ཞིག་བག་མེད་ཀུན་རྙེད་ནས། །མི་གང་དགེ་ལ་མི་འཇུག་པ། །དེ་ནི་དགེ་བའི་ལས་ཀྱི་མཐའ། །ཟད་ནས་དམྱལ་བར་རྒྱུག་པ་ཡིན། །རབ་ཏུ་བརྩོན་པས་ལེགས་བྱས་པའི། །དགེ་བ་ཤིན་ཏུ་རྣམ་དག་གིས། །གང་ལ་སྡུག་བསྔལ་མི་དམིགས་པའི། །བསོད་ནམས་གོ་འཕང་དེ་འཐོབ་བོ། །གང་ཡང་དབང་རྣམས་དབང་གིས་དང་། །ཡུལ་རྣམས་ལ་ཡང་དེ་བཞིན་ཏེ། །འཆིང་བ་ཀུན་གྱིས་དེ་བཅིངས་ནས། །འཁོར་བའི་ལམ་དུ་འཇུག་པ་ཡིན། །སྡིག་པའི་ཆོས་ཀྱིས་མ་གོས་པའི། །ལེགས་པར་སྦྱངས་པའི་གསེར་འདྲ་བ། །སྲིད་པའི་དགོན་པ་ལས་གྲོལ་ནས། །དེ་ནི་ཀུན་ནས་བདེ་བར་གནས། །དོན་མིན་འདི་རྣམས་རྩ་བ་ནི། །གང་ཞིག་བག་མེད་རྗེས་སྟེན་པའོ། །དེ་ཉིད་སྤངས་པ་མཆོག་ཡིན་ཏེ། །སྐྱིད་ཆེན་ཐམས་ཅད་བྱེད་པ་ཡིན། །བདེ་དང་ཡང་དག་ལྡན་པ་ཡིན། །གསར་སྐྱེས་དེ་ནི་ཁྱོད་ཡིན་པས། །ཇི་ལྟར་ཆུ་ལ་ཉ་རྗེས་འགྲོ། །དེ་བཞིན་བློ་ཡིས་རྗེས་སུ་བསྒྲུབས།