།དེ་དེ་ལ་སྐྱེས་པ་ན་ཡང་འདིའི་བདེ་བའི་ལས་བྱེད་པ་པོར་གྱུར་པས་ལྷའི་བདེ་བ་དུ་མས་གནས་པ་ཡིན་ཏེ་ཤ་དང་རུས་པ་དང་ཆུ་སེར་རྣམས་དང་བྲལ་བ་དང་རང་ཉིད་ཀྱི་འོད་དང་ལྡན་པས་རྟག་ཏུ་ཡང་བདེ་བར་གནས་སོ། །འདོད་པའི་ཡོན་ཏན་རྒྱ་ཆེན་པོ་ལ་རྟག་པར་རྒྱུན་དུ་འདོད་པ་ཐམས་ཅད་ཉམས་སུ་མྱོང་ངོ་། །དེས་དེ་ལྟ་བུའི་ཡོན་ཏན་དང་ལྡན་པའི་ལྷ་རྫས་ཀྱི་བདེ་བ་ཉེ་བར་ལོངས་སྤྱོད་པར་གྱུར་པ་ན་ལྷ་མོ་བརྒྱ་སྟོང་གིས་ཡོངས་སུ་བསྐོར་བ་ནི་གཟའ་དང་སྐར་མའི་ཚོགས་ཀྱིས་ཇི་ལྟ་བར་གསལ་ཞིང་འཚེར་ལ་ཇི་ལྟ་བ་བཞིན་དུ་རི་རབ་ལྷུན་པོ་རྣམ་པར་མཛེས་པར་གྱུར་པ་དེ་བཞིན་དུ་ལྷ་དེ་ལེགས་པར་བྱས་པའི་ལས་རྣམས་ཀྱིས་སྤྲུལ་པའི་འོད་ཀྱི་ཕྲེང་བ་རྣམས་ཀྱིས་རྣམ་པར་མཛེས་སོ། །རྟག་ཏུ་གཅིག་པུ་མངོན་པར་གསལ་བར་བྱས་ཤིང་དེ་ལྷ་རྣམས་ཀྱིས་ཡོངས་སུ་བསྐོར་ནས་དགའ་བར་བྱེད་དེ་འདོད་པའི་ཡོན་ཏན་ལྔ་རྣམ་པ་དུ་མར་ཡན་ལག་ལྔས་ཡིད་དུ་འོང་བར་གྱུར་པ་སྒྲ་དང་། རེག་བྱ་དང་རོ་དང་གཟུགས་དང་དྲིའི་བདེ་བ་རྣམས་ཀྱིས་ཉེ་བར་འཚོ་བར་བྱས་ནས་དེ་འདི་སྙམ་དུ་སེམས་ཏེ། ཡུལ་ཆེས་དགའ་བ་གཞན་གང་དག་ཏུ་བདག་གིས་ཉེ་བར་འགྲོ་བར་བྱ། དེའི་སེམས་བསྐྱེད་པ་དང་དུས་གཅིག་ཏུ་དགེ་བའི་ལས་ཀྱིས་དེ་ཡིད་སོང་བའི་ལྷ་མོ་རྣམས་ཀྱིས་མངོན་པར་མཐོང་ནས་སྨྲས་པ། ཇི་ལྟར་ལྷ་ཡུལ་གཅིག་གི་བདེ་བས་ཉེ་བར་གནས་པ་འདིར་བདག་ཅག་ཅི་ལ་སྡོད་ཡུལ་གཞན་རྣམས་སུ་འགྲོ་བར་བྱ་སྟེ། མཐའ་ཡང་གང་ཁང་བུ་སྟོང་ཡོད་པ་ཞེས་བྱ་བའི་རྩེ་མོ་རིན་པོ་ཆེ་སྣ་ཚོགས་ཀྱིས་རྣམ་པར་བརྒྱན་པ། ལྷ་བརྒྱ་སྟོང་ཕྲག་དུ་མས་བསྟེན་པ་དེར་བདག་ཅག་རྣམས་འགྲོ་བར་བྱའོ། །དེས་ཚིག་འདི་ཉེ་བར་བཟུང་ནས། གང་ཡང་ཉེ་བར་འགྲོ་བའི་ནགས་དང་གང་ཡང་དེས་མངོན་པར་བརྗོད་པ་ལ་ལྷ་དེ་མཆོག་ཏུ་དགའ་བའི་ཡིད་ཀྱིས་བརྗོད་པ་ཇི་ལྟར་འདོད་པ་དེ་ལྟར་བདག་ཅག་འགྲོ་བའོ། །དེ་ནས་ལྷ་དེ་དག་ནམ་མཁའི་དཀྱིལ་དུ་འཕགས་ནས་གང་ན་ཁང་བུ་སྟོང་གི་རྩེ་མོ་རིན་པོ་ཆེའི་ཁམས་དུ་མ་དང་ལྡན་པ། ལྷ་མོ་བརྒྱ་སྟོང་དུ་མ་སྒྲ་སྒྲོགས་པ་གང་ལ་དཔག་ཚད་ལྔ་བརྒྱར་ཤིན་ཏུ་དགའ་བ་དུ་མའི་གླུ་སྙན་པ་ལེན་པ། གར་གྱིས་ཆགས་པར་བྱེད་པའི་དགའ་བའི་རང་བཞིན་གྱི་སྒྲ་ཐོས་སོ། །ནམ་མཁའི་དཀྱིལ་དུ་སོང་བའི་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་ནས་གླུ་དེ་དག་ལེན་པར་འགྱུར་ཞིང་རབ་ཏུ་དགའ་བར་གྱུར་པའི་ཡིད་ཀྱིས།