Degé Kangyur volume 68, F.78.a

ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ་བསྐོར། ཆོས་ཀྱི་དུང་ཀུན་ནས་བུས། ཆོས་ཀྱི་རྔ་རབ་ཏུ་བརྡུངས། ཆོས་ཀྱི་སྒྲོན་མ་འབར་བར་མཛད། ཆོས་དང་འཐུན་པར་ཆོས་སྒྲུབ་པ་དག་ལ་སེམས་ཅན་གྱི་ཁམས་རབ་ཏུ་བཙུད། དམ་པའི་ཆོས་ཀྱི་ཚུལ་རབ་ཏུ་བསྟན་ཅིང་དགེ་བའི་རྩ་བ་གང་གིས་རང་སངས་རྒྱས་རྣམས་རང་སངས་རྒྱས་ཉིད་རྟོགས་པར་འགྱུར་བ་དང་། དགེ་བའི་རྩ་བ་གང་གིས་ཉན་ཐོས་རྣམས་ཉན་ཐོས་ཉིད་རྟོགས་པར་འགྱུར་ཞིང་རིག་པ་གསུམ་དང་། མངོན་པར་ཤེས་པ་དྲུག་རྟོགས་པར་འགྱུར་བ་དང་། སོ་སོ་ཡང་དག་པར་རིག་པ་མངོན་དུ་འགྱུར་ཞིང་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། དགེ་བའི་རྩ་བ་གང་གིས་སེམས་ཅན་རྣམས་ཀྱི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ངན་སོང་ངན་འགྲོ་ལོག་པར་ལྟུང་བ་ལས་ཡང་དག་པར་འདའ་བ་དང་། འདོད་ཆགས་དང་། ཞེ་སྡང་དང་། གཏི་མུག་ཉོན་མོངས་པ་དང་། ཉེ་བའི་ཉོན་མོངས་པ་སྤོང་བ་དང་། ཚེ་རིང་བ་དང་། གནོད་པ་ཆུང་བ་དང་། མདོག་བཟང་བ་དང་། གཟུགས་བཟང་བ་དང་། གཟི་བརྗིད་ཆེ་བ་དང་། དབང་ཆེ་བ་དང་། རིགས་མཐོ་བ་དང་། ལོངས་སྤྱོད་ཆེ་བ་དང་། ཤེས་རབ་ཆེ་བ་དང་། མི་དགེ་བའི་རྩ་བ་ཐམས་ཅད་སྤངས་པ་དང་། དགེ་བའི་རྩ་བ་ཐམས་ཅད་དང་ལྡན་པ་དང་། ཐ་ན་ཕྱག་གཅིག་འཚལ་བ་དང་། ཐལ་མོ་གཅིག་སྦྱོར་བ་དང་། མེ་ཏོག་གཅིག་འབུལ་བ་དང་། སེམས་དང་བ་གཅིག་ཙམ་སྐྱེད་པའི་སེམས་ཅན་གང་ལགས་པ་དེ་དག་ཐམས་ཅད་ལ་རྗེས་སུ་ཡི་རང་སྟེ། རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་ངོ་། །​གཙོ་བོ་དང་། དམ་པ་དང་། རབ་དང་། ཕུལ་དང་། བླ་ན་མ་མཆིས་པ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh285.html?part=UT22084-068-019-99#UT22084-068-019-99