ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ།

The Acceptance That Tames Beings with the Sky-Colored Method of Perfect Conduct

Samyagācāra­vṛtta­gaganavarṇavina­yakṣānti

Degé Kangyur volume 67, F.109.b

བའང་མེད་པ་དང་། འདུ་ཤེས་དང་འདུ་ཤེས་མེད་མིན་ཐོབ་པའང་མེད་པ་འདི་ཡང་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །​རིགས་ཀྱི་བུ་གང་ཕུང་པོ་དང་། ཁམས་དང་། སྐྱེ་མཆེད་ལ་འདུས་བྱས་དང་། འདུས་མ་བྱས་སུ་རྟོག་པ་འདི་ནི་གཉིས་པའོ། །​གང་ཡང་འདུ་བྱེད་སྐྱེ་མཆེད་ཐམས་ཅད་ལ་མི་རྟོག་ཅིང་རྣམ་པར་མི་རྟོག་པ་དང་། ཆོས་ཐམས་ཅད་ནམ་མཁའ་དང་མཉམ་པར་ཡང་དག་པར་རྗེས་སུ་མཐོང་བ་འདི་ཡང་རིགས་ཀྱི་བུ་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །​རིགས་ཀྱི་བུ་གང་ཡང་འཇིག་རྟེན་པ་དང་། འཇིག་རྟེན་ལས་འདས་པའི་ཆོས་ལ་སྙེམས་པ་འདི་ནི་གཉིས་པའོ། །​གང་ལ་ལ་འཇིག་རྟེན་པ་དང་། འཇིག་རྟེན་ལས་འདས་པའི་ཆོས་ལ་མི་འཇུག་མི་འགྲོ །​རྣམ་པར་མི་འགྲོ །​མི་རྒལ་ཞིང་འགྲོ་བ་ཡང་མེད། རྣམ་པར་འགྲོ་བ་མེད་པ་འདིའང་གཉིས་སུ་མེད་པའི་ཆོས་ལ་འཇུག་པའོ། །​རིགས་ཀྱི་བུ་གཞན་ཡང་གང་ལ་ལ་མིང་དང་གཟུགས་ལས་ཕུང་པོ་དང་། ཁམས་དང་། སྐྱེ་མཆེད་འབྱུང་བར་རབ་ཏུ་ཤེས་པ་འདི་ནི་གཉིས་པའོ། །​ཕུང་པོ་དང་། ཁམས་དང་། སྐྱེ་མཆེད་དང་། མིང་དང་གཟུགས་བྲལ་བ་ལ་སྒྱུ་མའི་རང་བཞིན་གྱི་ལྟ་བ་ཀུན་ཏུ་འགྲོ་ཞིང་ཀུན་ཏུ་མི་འགྲོ །​ཡོངས་སུ་མྱ་ངན་ལས་མ་འདས་པ་འདི་ཡང་བྱང་ཆུབ་སེམས་དཔའི་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །​རིགས་ཀྱི་བུ་གཞན་ཡང་གང་རྣམ་པར་ཤེས་པ་འབྱུང་བར་རབ་ཏུ་ཤེས་པ་འདི་ནི་གཉིས་པའོ། །​གང་ཡང་འབྱུང་བ་མེད་པ་སྐད་ཅིག་མ་དང་སྐད་ཅིག་མ་མ་ཡིན་པ་ལ་འདུས་བྱས་ཐམས་ཅད་དུ་མྱུར་དུ་རབ་ཏུ་ཤེས་པ་འདི་ཡང་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །​རིགས་ཀྱི་བུ་གཞན་ཡང་བདག་གིར་བྱ་བ་དང་། རྣམ་པར་ཤེས་པར་ཡོངས་སུ་ཤེས་པ་དང་། ང་ཡིར་བྱ་བ་དང་། སྐྱེ་མཆེད་ལ་ཆགས་པ་འདི་ནི་གཉིས་པའོ། །​གང་ལ་ལ་བདག་དང་བྲལ་བའི་རྣམ་པར་ཤེས་པ་ཐོབ་པ་བདག་གི་རང་བཞིན་ལྟ་བ་གཉིས་དང་བྲལ་བ། སྐྱེ་མཆེད་ཉམས་པ་མེད་པ། བདག་གིར་བྱ་བ་དང་། ང་ཡིར་བྱ་བ་དང་བྲལ་བ་འདི་ཡང་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །​གང་ལ་ལ་རིག་པ་དང་། རྣམ་པར་གྲོལ་བར་རྟོག་པ་འདི་ནི་གཉིས་པའོ། །

eKangyur, UT4CZ5369-I1KG9193-0000, page 218 (109b).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh263.html?part=UT22084-067-002-1235#UT22084-067-002-1235