Degé Kangyur volume 66, F.283.a

།བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ལ་དེ་ལྟར་རྟོགས་ན་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །​འདི་ལྟ་སྟེ། བཅོམ་ལྡན་འདས། བྱ་བ་རཱ་ཛ། མན་ཏ་ཀྵཱ་ཡ། ཛི་ན་ཛ་ཡ། ཛ་ན་ནི་མ་མུ་ནི་ཧ་ར། ཨ་ན་ཡ་ཕ་ལ། གུ་ཎ་གརྦྷ། ནི་ཡ་མ་སུ་རི་ནཱ་ཡ། བུ་པ་ཤ། ཤ་ཏ་ཤ་པ། ཤ་མ་ཤ་ན། ཏ་ཐ་ཀ་མ། ཤ་མཾ་གུ། མཱ་ཏུ་ཤི་ཥ། ཤ་མ་ཙེ་ཏ་ནཱ་ཡ། ཀླེ་ཤཱན་ཏ་སཾ་ཤོ་ཥ་ཎེ་སྭཱ་ཧཱ། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །​རིགས་ཀྱི་བུ་ཁྱོད་ཀྱིས་མིག་ལས་རྒྱལ་བར་བྱེད་པ་སེང་གེའི་འགྲོས་ཀྱི་ཕྱིར་བསྒྱིངས་པའི་གཟུངས་འདིས་སེམས་ཅན་དག་འཆི་བའི་ཚེ། ཐ་མའི་རྣམ་པར་ཤེས་པ་ལ་ཉོན་མོངས་པའི་སྒྲིབ་པ་དང་། ལས་ཀྱི་སྒྲིབ་པ་དང་། ཆོས་ཀྱི་སྒྲིབ་པ་ཡོད་པ་སྤྲུག་པ་དང་། སངས་རྒྱས་ཀྱི་ཞིང་ཡོངས་སུ་དག་པར་གཏོང་ནུས་སོ། །​ཁྱོད་ནི་འཇིག་རྟེན་གྱི་ཁམས་དཔག་ཏུ་མེད། གྲངས་མེད་པར་འགྲོ་བ་དང་། སེམས་ཅན་རྣམས་ལ་སྙིང་རྗེའི་དབང་གིས་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་དུ་གཟུགས་དང་། ཆ་ལུགས་དང་། སྤྱོད་ལམ་སྣ་ཚོགས་ཀྱིས་ཐེག་པ་ཆེན་པོའི་མདོ་སྡེ་སྣ་ཚོགས་འཆད་པ་དང་། སེམས་ཅན་ཡོངས་སུ་སྨིན་པར་བྱ་བ་དང་། རྒྱལ་རིགས་གདོལ་པ་ནས་དགེ་སྦྱོང་གདོལ་པའི་བར་དུ་སྡིག་པའི་ཆོས་ལས་སྤང་བ་དང་། ཐམས་ཅད་དགེ་བའི་ཆོས་ལ་གཞག་པར་ནུས་སོ། །​བཅོམ་ལྡན་འདས་ཀྱིས་འདི་བསྟན་པའི་ཚེ་ལྷ་དང་མིའི་སྐྱེ་དགུ་དཔག་ཏུ་མེད། གྲངས་མེད་པ་དག་གིས་ཏིང་ངེ་འཛིན་དང་། གཟུངས་དང་། བཟོད་པ་སྣ་ཚོགས་ཐོབ་པར་གྱུར་ཏོ། །​གཞན་དག་ཀྱང་ས་བཅུ་ལ་ཡེ་ཤེས་སྐྱེས་པར་གྱུར་ཏོ། །​སྲོག་ཆགས་ཁྲི་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །​སེམས་ཅན་རྣམས་ཀྱི་རྩོད་པ་གང་། །​ཅི་ཡང་རུང་སྟེ་དེ་དག་གི། །​གཞི་རྩ་སྤངས་ནས་ལྟ་ཀུན་གྱི། །​གཞི་རྩ་མྱུར་དུ་འགྱུར་བ་ཡིན། །​བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ།



The English translation of this folio by 84000 - Translating the words of the Buddha can be found at:
https://read.84000.co/translation/toh260.html?part=UT22084-066-018-357#UT22084-066-018-357