Degé Kangyur volume 66, F.273.b

ལ་ལར་ནི་བྲམ་ཟེའི་གཟུགས་དང་། ཆ་ལུགས་དང་། སྤྱོད་ལམ་སྟོན་ཏོ། །​གང་དང་གང་གིས་བདག་གི་སྐྱེ་བ་འབྱུང་བར་སྟོན་པ་དེ་དང་དེ་དག་ཏུ་རྒྱལ་རིགས་དེ་འདྲ་བ་དག་ལ་ཆོས་འཆད་པར་བྱེད་དེ། སྔོན་མ་བྱུང་བ། སྔན་ཆད་མ་བྱུང་བ། ཐམས་ཅད་མཁྱེན་པའི་བཤད་པ་ཟབ་མོ་ཟབ་པའི་མདོ་སྡེ་དང་། གཟུངས་དང་། བཟོད་པ་དང་། ས་དག་འཆད་པར་བྱེད། སྟོན་པར་བྱེད་དེ། དེའི་ཕྱིར་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བ་དེ་སྔོན་གྱི་སྡིག་པ་མི་དགེ་བའི་ལས་ལ་ངོ་ཚ་བར་བྱེད། དམོད་པར་བྱེད། འཆགས་པར་བྱེད། གཏོང་བར་བྱེད། སྤོང་བར་བྱེད་ཅིང་། དེ་སྦྱིན་པ་དང་། དུལ་བ་དང་། སྡོམ་པ་དང་། རྟུལ་བའི་སྤྲོ་བ་ཆེན་པོ་ལ་གནས་ཤིང་མཐོ་རིས་ལ་གཞོལ་བར་འགྱུར་རོ། །​བྱམས་པ་བློན་པོའི་ལྟུང་བའི་རྩ་བ་ཡང་ལྔ་སྟེ། ལྔ་གང་ཞེ་ན། གང་ཡང་བློན་པོ་མཆོད་རྟེན་གྱི་རྫས་འཕྲོག་པར་བྱེད་དམ། ཕྱོགས་བཞིའི་དགེ་འདུན་གྱི་རྫས་འཕྲོག་པར་བྱེད་པ་འདི་ནི་ལྟུང་བའི་རྩ་བ་དང་པོའོ། །​གང་ཡང་གྲོང་འཇོམས་པར་བྱེད་པ་དང་། ལྗོངས་འཇོམས་པ་དང་། གྲོང་ཁྱེར་འཇོམས་པར་བྱེད་པ་འདི་ནི་ལྟུང་བའི་རྩ་བ་གཉིས་པའོ། །​ཡང་བློན་པོ་གང་ཆོས་སྤོང་བར་བྱེད་དེ། ཉན་ཐོས་ཀྱི་ངེས་པར་འབྱུང་བ་བཤད་པའམ། རང་སངས་རྒྱས་ཀྱི་ངེས་པར་འབྱུང་བ་བཤད་པའམ། ཐམས་ཅད་མཁྱེན་པའི་ངེས་པར་འབྱུང་བ་བཤད་པ་སྤོང་བར་བྱེད། འགོག་པར་བྱེད། སྦེད་པར་བྱེད་པ་འདི་ནི་ལྟུང་བའི་རྩ་བ་གསུམ་པའོ། །​ཡང་བློན་པོ་གང་བཅོམ་ལྡན་འདས་ཀྱི་ཕྱིར་རབ་ཏུ་བྱུང་བ་ལ་གཙེ་བར་བྱེད་ན། བསླབ་པ་འཛིན་ཀྱང་རུང་། མི་འཛིན་ཀྱང་རུང་། ཚུལ་ཁྲིམས་དང་ལྡན་ཡང་རུང་། མི་ལྡན་ཡང་རུང་སྟེ། དེ་དག་གི་གོས་ངུར་སྨྲིག་དག་འཕྲོག་པར་བྱེད། ཁྱིམ་པར་བྱེད་དམ། ལུས་ལ་ཆད་པས་གཅོད་དམ། བཙོན་རར་འཇུག་པར་བྱེད་དམ། སྲོག་གཅོད་པར་བྱེད་པ་འདི་ནི་བློན་པོའི་ལྟུང་བའི་རྩ་བ་བཞི་པའོ། །​ཡང་བློན་པོ་གང་མཚམས་མེད་པ་ལྔ་ལས་མཚམས་མེད་པ་གང་ཡང་རུང་བའི་ལས་བྱེད་ཅིང་སོགས་པ་འདི་ནི་ལྟུང་བའི་རྩ་བ་ལྔ་པ་སྟེ།



The English translation of this folio by 84000 - Translating the words of the Buddha can be found at:
https://read.84000.co/translation/toh260.html?part=UT22084-066-018-338#UT22084-066-018-338