Degé Kangyur volume 66, F.263.a

མཛད་ཀྱི་སྙིང་པོའི་ཆོས་ཉིད་དོ། །​རིགས་ཀྱི་བུ་ཡང་དེ་བཞིན་གཤེགས་པས་ཆོས་ཀྱི་སྒོ་གཅིག་ཐུགས་སུ་ཆུད་དེ། རིགས་ཀྱི་བུ་གང་ལ་འགྲོ་བ་མེད་པ་དང་། འོང་བ་མེད་པ་དང་། རྒྱུ་མེད་པ་དང་། རྐྱེན་མེད་པ་དང་། འཆི་འཕོ་མེད་པ་དང་། སྐྱེ་བ་མེད་པ་དང་། བླང་བ་མེད་པ་དང་། དོར་བ་མེད་པ་དང་། འགྲིབ་པ་མེད་པ་དང་། འཕེལ་བ་མེད་པ་དང་། རིགས་ཀྱི་བུ་གང་རང་བཞིན་གྱིས་རང་བཞིན་མེད་དེ། གང་ལ་དཔེར་བྱ་བར་མི་ནུས་པ་དང་། གང་ཡི་གེ་དང་ངེས་པའི་ཚིག་གིས་བརྗོད་པར་མི་ནུས་པའི་ཆོས་ཀྱི་སྒོ་གཅིག་པོ་དེ་དེ་བཞིན་གཤེགས་པས་ཐུགས་སུ་ཆུད་དོ། །​བཀོད་པའི་རྒྱལ་པོ་བསྟན་པ་ཡི་གེ་མེད་པའི་ཟ་མ་ཏོག་རྣམ་པར་སྣང་མཛད་ཀྱི་སྙིང་པོའི་ཆོས་ཀྱི་རྣམ་གྲངས་འདི་བཤད་པ་ན་ས་བཅུ་ལ་གནས་པའི་བྱང་ཆུབ་སེམས་དཔའི་མིག་ལ་རྡུལ་ཕྲ་རབ་ཇི་སྙེད་སྣང་བར་འགྱུར་བ་དེ་སྙེད་ཀྱི་སེམས་ཅན་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །​དེ་སྙེད་གཅིག་གིས་དགྲ་བཅོམ་པ་ཉིད་མངོན་དུ་བྱས་སོ། །​དེ་བས་ཆེས་མང་བའི་སེམས་ཅན་དག་སེམས་ཅན་དམྱལ་བ་ནས་ཤི་འཕོས་ནས་ལྷ་དང་མིར་སྐྱེས་སོ། །​བྱང་ཆུབ་སེམས་དཔའ་དུ་མ་ནི་ས་ཐོབ་པར་གྱུར་ཏོ། །​བྱང་ཆུབ་སེམས་དཔའ་དུ་མ་ནི་ཏིང་ངེ་འཛིན་བརྒྱ་སྟོང་མངོན་དུ་གྱུར་ཏོ། །​མང་དུ་ཅི་དགོས་ཏེ་གཏམ་འདི་ནི་སུ་ལ་ཡང་དོན་མེད་པར་མ་གྱུར་ཏོ། །​དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་སྒྲ་གཅན་ཟིན་ལ་བཀའ་སྩལ་པ། སྒྲ་གཅན་ཟིན་ཁྱོད་ངའི་ཆོས་ཀྱི་ཚུལ་འདི་གཟུང་བར་སྤྲོ་བར་གྱིས་ཤིག །​བཅོམ་ལྡན་འདས་ཀྱིས་བཀའ་སྩལ་མ་ཐག་ཏུ་སངས་རྒྱས་ཀྱི་མཐུས་འཁོར་དེ་ནས་བྱང་ཆུབ་སེམས་དཔའ་བྱེ་བ་ཕྲག་དགུ་སྟན་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་ཚུལ་འདི་བདག་ཅག་གིས་གཟུང་བར་བགྱིའོ། །​སླད་མའི་ཚེ་སླད་མའི་དུས་ན་བྱང་ཆུབ་སེམས་དཔའི་སྣོད་དུ་འཚལ་བར་བགྱིས་ལ། འཇིག་རྟེན་གྱི་ཁམས་མི་མཇེད་དུ་ཡང་དག་པར་བཤད་པར་



The English translation of this folio by 84000 Translating the words of the Buddha can be found at:
https://read.84000.co/translation/toh259.html?part=UT22084-066-017-245#UT22084-066-017-245