གང་ལ་སྐྱེ་བ་དེ་མི་དམིགས། ཇི་ལྟར་སྐྱེ་བ་དེ་མི་དམིགས་ཏེ། འདོད་ཆགས་དེ་མི་དམིགས་པ་ནི་འདོད་ཆགས་ཀྱི་རྒྱུས་སྡིག་པའི་ལས་མི་བྱེད་ལ། དེའི་དཀར་པོའི་ཆོས་རྣམས་འཕེལ་བར་འགྱུར་ཞིང་དེ་མ་སྨད་ཅིང་བསྔགས་པར་འགྱུར་ཏེ། དེས་ན་ལྷ་དང་། ཀླུ་དང་། གནོད་སྦྱིན་དང་། མི་དང་། མི་མ་ཡིན་པ་དང་། སངས་རྒྱས་དང་ཉན་ཐོས་རྣམས་ཀྱིས་བསྔགས་པར་འགྱུར་རོ། །དེ་ཆོས་ཐམས་ཅད་ཁས་མི་ལེན་ཅིང་ཡང་དག་པར་རྗེས་སུ་མི་མཐོང་། ཆོས་ཐམས་ཅད་ནམ་མཁའ་དང་མཉམ་པར་སྟོང་པར་མཐོང་ཞིང་དེ་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ལ་ལྷག་པར་མོས་པར་འགྱུར་ཏེ། འཇིག་རྟེན་རྣམས་ཕྱིན་ཅི་ལོག་ལ་ཡང་དག་པར་ཞེན་པ་མཐོང་བ་ན་དེ་ཞེ་སྡང་མེད་པ་དང་། གནོད་སེམས་མེད་པ་བཟོད་པ་མཆོག་ལ་རབ་ཏུ་གནས་ནས་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་རྣམས་ལ་བརྩོན་འགྲུས་རྩོམ་ཞིང་སེམས་ཅན་རྣམས་ཡོངས་སུ་སྨིན་པར་བྱེད་དོ། །དེ་ཅིའི་ཕྱིར་ཞེ་ན། གལ་ཏེ་གནོད་སེམས་དང་ལྡན་ན་ནི་ཁོང་ཁྲོ་བ་མང་བར་འགྱུར་རོ། །ཁོང་ཁྲོ་བ་མང་བ་ལས་ནི་གཞན་དག་ལ་ཁྲོ་བའི་ཚིག་རྗོད་པར་བྱེད་དེ། དེ་མི་དགེ་བའི་ལས་མངོན་པར་འདུ་བྱེད་དོ། །དེ་མི་དགེ་བའི་ལས་མངོན་པར་འདུ་བྱེད་པས་མི་དགེ་བའི་སྲིད་པ་མངོན་པར་སྐྱེད་པར་འགྱུར་རོ། །ཤཱ་རིའི་བུ་ཡང་བཟོད་པ་དང་ལྡན་པའི་བྱང་ཆུབ་སེམས་དཔའ་ནི་བཟོད་པར་བྱེད་དོ། །དེ་ཅིའི་ཕྱིར་ཞེ་ན། གང་བཟོད་པའམ། མི་བཟོད་པའི་ཆོས་རྡུལ་ཙམ་ཡང་མི་དམིགས་པ་དེས་ན་གཞན་མི་ཤེས་པའི་སེམས་ཅན་གང་ཡིན་པ་དེ་དག་ལ་སྙིང་རྗེ་སྐྱེད་པར་བྱེད་དེ། སེམས་ཅན་ཀུན་ནས་གཤེ་བར་བྱེད་པ་དང་། ཀུན་ནས་ཁྲོ་བར་བྱེད་པ་དང་། ཡོངས་སུ་སྤྱོ་བར་བྱེད་པ་དེ་དག་ཉིད་ལ་སྙིང་རྗེ་སྐྱེད་པར་བྱེད་དོ། །དེས་ན་བྱམས་པ་ཆེན་པོ་བསྒོམས་པ་ཡིན། དགེ་བའི་ཆོས་རྣམས་ཀྱང་བསྒོམས་པ་ཡིན་ཏེ། བཟོད་པ་དེ་དང་ལྡན་ན་བཟོད་པ་མཆོག་ཐོབ་པ་གང་ཡིན་པ་འདི་ནི་རྗེས་སུ་འཐུན་པའི་བཟོད་པ་ཡིན་ཏེ། དེ་སྙིང་རྗེ་ཆེན་པོ་དང་ལྡན་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་སེམས་ཅན་རྣམས་ལ་ཆོས་སྟོན་པར་བྱེད།