འཚེ་བ་མེད་པ་ཉིད་དང་། ཐོས་པ་མང་བ་དང་། སྦྱིན་པ་དང་། དུལ་བ་དང་། ཡང་དག་པར་སྡོམ་པ་དང་། འདོད་པ་རྣམས་དོན་དུ་གཉེར་བ་མེད་པ་ཉིད་དང་། གནོད་སེམས་ཐམས་ཅད་ལ་དོན་དུ་གཉེར་བ་མེད་པ་ཉིད་དང་། མྱུར་དུ་མངོན་པར་འབྱུང་བ་ཉིད་དང་། ཕྲ་མ་མེད་པ་ཉིད་དང་། ཁྲོ་བ་མེད་པ་ཉིད་དང་། དགེ་བའི་ཆོས་ཡང་དག་པར་ལེན་པ་དང་། ཡེ་ཤེས་ཀྱི་སྤྱོད་པ་དང་། སེམས་ཅན་ཐམས་ཅད་ལ་བྱམས་པའི་སེམས་ཉིད་དང་། མི་འཐུན་པ་རྣམས་སྡུམ་པར་བྱེད་པ་དང་། འཁོར་བའི་འདམ་གྱི་ཟམ་པ་ཉིད་དང་། ཆོས་ཀྱི་གཏམ་བྱེད་པ་ཉིད་དང་། བཟོད་པའི་སྟོབས་སོ་སོར་རིག་པར་བྱེད་པ་དང་། ལས་ཀྱི་རྣམ་པར་སྨིན་པ་ལ་རྟོན་པ་ནི་ཤཱ་རིའི་བུ་ངེས་པར་བྱང་ཆུབ་སེམས་དཔར་འགྱུར་ཏེ། ཤཱ་རིའི་བུ་འདི་ནི་བྱང་ཆུབ་སེམས་དཔས་བརྩམས་པའི་བྱང་ཆུབ་སེམས་དཔའི་ཡོན་ཏན་རྣམས་ཡིན་ནོ། །ཤཱ་རིའི་བུ་གང་ལ་བྱང་ཆུབ་སེམས་དཔས་བརྩམས་པའི་བྱང་ཆུབ་སེམས་དཔའི་ཡོན་ཏན་གྱི་ཆོས་འདི་དག་མེད་པ་དེ་དག་ནི་བྱང་ཆུབ་སེམས་དཔའ་ཚུལ་འཆོས་པ་ངན་འགྲོའི་གནས་དང་ལྡན་པར་རིག་པར་བྱའོ། །ཤཱ་རིའི་བུ་ཆོས་བཞི་པོ་འདི་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་པ་ཡིན་ཏེ། བཞི་གང་ཞེ་ན། ཆོས་དང་ཆོས་ཤེས་པ་དང་། སྦྱིན་པ་དང་སྦྱིན་པ་ཤེས་པ་དང་། ཞལ་ཏ་བྱེད་པའི་བྱ་བ་ཤེས་པ་དང་། ཐོས་པ་མང་པོ་བཙལ་བ་ཤེས་པའོ། །ཤཱ་རིའི་བུ་ཇི་ལྟར་ན་བྱང་ཆུབ་སེམས་དཔའི་ཆོས་གང་ཞེ་ན། འདི་ལྟ་སྟེ། དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་དང་། ཆགས་པ་མེད་པ་དང་། ཞེ་སྡང་མེད་པ་དང་། གཏི་མུག་མེད་པ་དང་། དགེ་བ་བཅུའི་ལས་ཀྱི་ལམ་འདི་རྣམས་ནི་བྱང་ཆུབ་སེམས་དཔའི་ཆོས་ཞེས་བྱའོ། །དེ་ལ་ཆོས་ཤེས་པ་གང་ཞེ་ན། གང་དེ་རྣམས་ཚུལ་བཞིན་སྒྲུབ་པར་བྱེད་ཀྱི་ལོག་པར་མི་སྒྲུབ་པ་སྟེ། སྦྱིན་པ་དང་། དུལ་བ་དང་། ཡང་དག་པར་སྡོམ་པ་འདི་ནི་ཆོས་ཤེས་པ་ཞེས་བྱའོ།