Degé Kangyur volume 66, F.44.b

།རྒྱལ་པོ་ཆེན་པོ་ཕུང་པོ་ལྔ་པོ་དེ་དག་ནི་སྙིང་པོ་མེད་པ་ཡིན་ན་བྱིས་པ་སོ་སོའི་སྐྱེ་བོ་རྣམས་ནི་སྙིང་པོར་འདུ་ཤེས་སོ། །​རྒྱལ་པོ་ཆེན་པོ་ཕུང་པོ་རྣམས་ནི་ཁ་དོག་ངན་པ། དྲི་ང་བ། ཁྲག་དང་རྣག་འབྱུང་བ། ཤིང་དང་། བོང་བ་དང་། ལམ་དང་མཚུངས་པ། སྙིང་པོ་མེད་པ། གཡོ་བ་མེད་པ་དང་། དགའ་བ་དང་མི་དགའ་བར་འབྲེལ་བ། སྲེད་པའི་ལུ་གུ་རྒྱུད་ཀྱིས་ཕན་ཚུན་སྦྲེལ་བ། ཉོན་མོངས་པ་མང་བ། སྨད་པ་ཡིན་ན་སྙིང་པོ་མེད་པ་ལ་སྙིང་པོར་འདུ་ཤེས། མི་རྟག་པ་ལ་རྟག་པར་འདུ་ཤེས། མི་སྡུག་པ་ལ་སྡུག་པར་འདུ་ཤེས། མི་གཙང་བ་ལ་གཙང་བར་འདུ་ཤེས། བདེན་པ་མ་ཡིན་པ་ལ་བདེན་པར་འདུ་ཤེས་སོ། །​རྒྱལ་པོ་ཆེན་པོ་ཕུང་པོ་ལྔ་ནི་རང་གི་ལས་ཀྱིས་རྣམ་པར་བྲིས་པ་སྟེ་རྒྱལ་པོ་ཆེན་པོ་དཔེར་ན་རྨ་བྱའི་མཇུག་ཚོགས་ཚོན་སྣ་ལྔ་པ་དེ་ལ་རི་མོ་མཁན་གྱིས་བྲིས་པ་ཡང་མེད། ཚོན་ཀྱང་ཅི་ཡང་མེད་དེ། དེ་ནི་རང་གི་ལས་ཀྱིས་རྣམ་པར་བྲིས་པ་ཉིད་དོ། །རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་རྣམས་ཀྱང་རང་གི་ལས་ཀྱིས་རྣམ་པར་བྲིས་པ་ཕན་ཚུན་གྱི་རྐྱེན་ལས་བྱུང་བ་དག་གོ། །​དེ་ནས་འཁོར་དེའི་ནང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མི་ཕམ་དབང་ཕྱུག་ཅེས་བྱ་བ་དེ་སྟན་ལས་ལངས་ཏེ། བཅོམ་ལྡན་འདས་ལ་བསྐོར་བ་བྱས་ནས། བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་ལུས་བཏུད་ལུས་སྨད་དེ་སོར་མོ་བཅུ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་ཕུང་པོ་འདི་དག་ནི་ཁ་དོག་ངན་པ་དྲི་ང་བ། ཁྲག་དང་རྣག་འབྱུང་བ། ཤིང་དང་། བོང་བ་དང་། རྩིག་པ་དང་། ལམ་དང་འདྲ་བ། སྙིང་པོ་མ་མཆིས་པ། གཡོ་བ་མ་མཆིས་པ་ལགས་ན་བྱིས་པ་སོ་སོའི་སྐྱེ་བོ་རྣམས་ནི་སྙིང་པོར་འདུ་ཤེས་ཏེ། ཡང་དག་པ་མ་ལགས་པ་ལྡོངས་པ། རྨོངས་པ་དང་འདྲ་བ། གཏི་མུག་ལ་གཞོལ་བ། མུན་པ་དང་རབ་རིབ་དང་། ལིང་ཏོག་གིས་ཀུན་ནས་ཁེབས་པ། ལྟ་བ་ཐམས་ཅད་ཀྱི་ཚང་ཚིང་ཐིབས་པོས་གཏིབས་པ་ལགས་སོ། །​བཅོམ་ལྡན་འདས་ཆོས་ཀྱི་ཕུང་པོ་བཞི་པོ་འདི་དག་ནི་ཟབ་སྟེ། ནམ་མཁའ་དང་མཚུངས་ཤིང་འདྲ་བ་ལགས་སོ། །



The English translation of this folio by 84000 - Translating the words of the Buddha can be found at:
https://read.84000.co/translation/toh247.html?part=UT22084-066-005-107#UT22084-066-005-107